Festival da Luz

Siempres falamos con enveya que n'otros territorios los cocineros tán muncho más xuníos y miren más por asoleyar la so gastronomía a pesar de les sos diferencies personales. Bien, pos tenemos, por fin, una xeneración de cocineros asturiana (güeyu, que los más conocíos yá lleven un tiempu faciéndolo) que vino pa camudar les coses, non namás na so nueva visión de la cocina, sinón tamién na forma de comunicala. Y eso, queramos o non, ye indispensable anguaño.

A 22 Manes fixo enforma por ello, un espaciu onde munchos cocineros conociéronse por primer vegada, y a partir d'ehí empezaron a surdir eventos de mancomún y a forxase xuniones, cordialidá y, na mayoría los casos, amistá. Amosose que les coses siempres funcionen meyor n'equipu, y que cuando tol mundu apurre, sal meyor. Y que, amás, puede faese ensin perder la identidá de caún, porque la visión que caún tien de la cocina, y por tantu del mundu, ye complementaria.

Tres la collaboración nos eventos d'A 22 Manes con Mahou, surdió la posibilidá de que 4 cocineros allegaren como convidaos al Festival da Lluz entamáu en Boimorto (A Coruña) por Lluz Casal. Un festival benéficu, n'una ambiente dafechu rural, qu'entemez música, ecoloxismu (anque sigan usando vasos de plásticu), mercáu llocal y, tamién, gastronomía.

Una gastronomía onde dafechu predominen los cocineros gallegos de casa, pero qu'adulces va abriendose a Asturies. L'añu pasáu namás allegó como invitao Mariano Mier, d'El Quintu Sabores, pero anguaño xuniéronse-y, amás, otros trés. Y qué trés: Borja Alcázar del Abrelatas, Luis Menéndez d'A Qatar y Carlos Gallego de Los Llaureles.

Caún col so estilu, Borja falando de Sariegu, el so güelu de 92 años y la cocina de so madre, Luis del so nuevu cambéu de local a Umami mientres faía unos buñuelos d'infartu, Mariano con esa sorrisa permantente falando de los sos viaxes pel mundu aplicaos a la so cocina, y Carlos entemeciendo Asia con Cuba y Gamonéu. Toos col llocal a españar con más de 100 persones (los pinchos quedaron pequeños), con muncha complicidá ente'l públicu y el restu de cocineros; y exerciendo d'embaxadores de la gastronomía asturiana.

Tou un arguyu qu'indica'l camín a siguir, inclusive pa los futuros festivales que se faigan n'Asturies.