Publicidá

Blog Archive

Contact Me

Nombre

Correo electrónico

Mensaje

Hover Setting

default

Sidra Viuda de Angelón

Señes: La Teyera S/N - Nava
Teléfonu: 985 716 770



Web: http://www.sidraviudaangelonpomar.es/
Facebook: https://www.facebook.com/sidrapomar.viudaangelon/
Twitter: [@sidraangelon] https://twitter.com/sidraangelon
Instagram: [@sidraviudaangelonpomar] https://www.instagram.com/sidraviudaangelonpomar/


Ye complicáu ser oxetivu con amigos a los qu'almires, y más con daqué que depende tantu del gustu personal como la sidra asturiano, pero creo que sí podemos afirmar qu'el Llagar Viuda  de Angelón ye'l llagar más innovador de sidra que tenemos nesti país. Que sía'l meyor o non, eso vas decidilo tu. Yo téngolo claro.


El Llagar Viuda de Angelón empezó la so andadura en 1947, de la mano d'Alfredo Ordóñez, y púnxo-y el nome n'honor a la so madre, que yera conocida nel pueblu como la "Viuda de Angelón". Los sos 5 fíos (Alfredo, Ángel, Carmen, Susana y Fran) criáronse en llagar, entre pumares y botelles de sidra, y tres la muerte del so padre, tomaron les riendes del mesmu. N'especial Fran, qu'estudió enoloxía pa faese cargu de la ellaboración de la sidra.


Dende entós (fai yá 20 años), pasaron munches coses, ente elles la creación de la marca Prau Monga (una de les pumaraes pertenecientes al llagar) pa inscribise dientro de la DOP Sidra d'Asturies, y, la más importante, la compra, fai casi 10 años, de Grusifas, o lo que ye lo mesmo, Sidra Pomar; cuando ésta taba en quiebra, pa revitalizar la zona y caltener a los trabayadores. Esta pasión amuesa que tamos énte daqué más que una empresa que realiza productos: ye una forma de vida.


D'esta manera, el llagar organízase en dos partes estremaes, pero complementaries, y que la so conxugación n'equilibriu supon, de dalguna manera, el futuru de la sidra n'Asturies.


Per un lláu  tenemos el llagar de Sidra Natural, con dos marques más que conocíes, Viuda de Angelón Prau Monga. Una sidra que sigue ellaborandose de forma tradicional, colos sos trasiegos en lluna menguante, les sos barriques de madera de más de 50 años, pero coles téuniques más modernes aplicaes a la sidra, como prenses neumátiques, controles de temperatura o toneles en fibra de vidriu. Nueves técniques aplicaes a la tradición, p'ameyorar el sabor, el caltenimientu y evitar la contaminación, pero ensin perder la esencia de la nuesa sidra.


Consiguen un sabor reconocible, propiu del llagar, nestos tiempos tan complicaos d'estandarización, y qu'evoluciona dende los llotes más tienros na primavera, hasta la so esplosión de sabor a finales del branu. ¿Meyor la so sidra DOP que la so sidra normal? Va por llotes, porque básicamente tienen la mesma mazana, que ye mazana asturiana. Prau Monga de les sos propies pumaraes y Viuda de Angelón de productores asturianos, y puntualmente, cuando hai escasez de collecha asturiana, de productores de fora.


A unos metros del llagar tradicional, atópase'l Llagar Pomar, y ellí, amás de les sos oficines y la so tienda (nun dexéis de visitala), ye onde Fran empezó a esperimentar con delles ellaboraciones de la sidra siempres partiendo de la so sidra natural. Un xeniu llocu, ente tubos d'ensayu nun llaboratoriu faciendo prebes nuna nave enorme, arrodiáu de pumaraes, investigando y sacando al mercáu productos nuevos, distintos, únicos n'Asturies ya inclusive nel mundiu.


Si a la base de la calidá de la mazana asturiana sumamos el talentu, la imaxinación de Fran y les hores de trabayu de los sos hermanos, llogramos productos únicos que tán sentando la base del futuru de la sidra asturiano, y, en parte, mundial, onde nun esiste la calidá nin la riqueza de la nuesa materia primo. La nuesa sidra natural siempres va tar ehí, pero pa toos aquellos momentos onde nun mos echen la sidra, nun tea disponible, o a cencielles, prúyanos probar un sabor distinto, esti tipu de sidra ye un complementu perfeutu que va siguir creciendo y normalizándose na sociedá asturiana como nel restu de países sidreros. Reinvindicar la sidra como motor económicu, con una bébora ecolóxico, saludable, moderna y qu'al empar, conéctanos colos nuesos ancestros.


Comercialicen una variedá enorme de productos, pa tolos públicos y casi pa cualesquier circunstancia. Empezamos por 1947. Una sidra de mesa, esto ye, una sidra natural estabilizao y penerao pero que nun precisa que la echen. Güel y sabe a sidra, tien cuerpu y ye perfeuta p'arroces y pexes. Más llixera qu'un vinu blanco, en graduación, pero non en sabor, y con 4 meses en barrica de carbayu, lo que fai d'ella, la primer sidra crianza ellaborada n'Asturies. El mesmu Fran diz d'ella que ye una "sidra sele".


Tien más acidez volátil que una sidra normal, y un toque a madera que-y queda xenial. Tou un ésitu n'EEXX. Medaya Oro nel Salón Internacional de la Sidra de Gala (SISGA) 2019


Sidra Pomar. ¿Quién nun s'alcuerda de los míticos cañeros de Sidra Pomar qu'había repartíos per toda Asturies? Cuando lo normal n'Asturies yera tomar cañes de sidra y non de cerveza industrial de fora d'Asturies. Inda queden un par d'ellos aguantando y en Madrid más de 10 cañeros de sidra Pomar pa beber una sidra esplumoso, llixero, con daqué d'azucre y qu'entra sola. Perfecta pa enfrescar y quitar la sede. Nel llagar, amás d'ellaborala en barril pa pinchar en cañero, puedes mercala en botella. Medaya Oro nel Salón Internacional de la Sidra de Gala (SISGA) 2019


Sidra Pomar Sin. La mesma sidra pero ensin alcohol.


Pomar Rosée. Maxinái la Sidra Pomar de siempre, pero con un color rosao llográu de forma natural, ensin nengún aditivu artificial (y ehí ta siempres la diferencia) por dexar reposando la sidra cola mesma magaya de la mazana colorada. 5% d'alcohol de pura fruta na boca, refrescante y que nun empalaga nada. Tou un ésitu en Suramérica. Perfecta pal vermut o con quesu, con arumes de fruta que recuerden al lambrusco italianu. Medaya Premium nel Salón Internacional de la Sidra de Gala (SISGA) 2019


Viuda de Angelón con Miel. Miel que vien de los mesmos truébanos que tienen na pumarada Prau Monga. Un botellín de sidra que lleva cuyarada y miel de miel per botella, y que'l so principal méritu ye estabilizar la fermentadura de la sidra yá'l miel. Refrescante, con un toque importante a miel (indispensable que te guste'l miel), pero que nun llega a empalagar y calteniendo l'acidez típica de la sidra asturiano. Amás con un diseñu nuevu, ventureru y que ruempe con tolo establecío nel mundu la sidra.



Crema de Mazana Pomar. Lo más paecío a un llicor ensin ser un llicor. 17% d'amiestu de crema de lleche y mazanes, nidia y pa tomar bien fría al terminar les comíes o con café.


Angelón Pera. Históricamente n'Asturies siempres hebo Sidra de Pera, yá ta documentado dende Plinio y Estrabón na era romana, y hasta fai 200 años yera bien habitual ellaborar sidra de pera cuando s'escosaba la mazana (sumando la dificultá de traer mazana de fora d'Asturies), asina qu'el llagar llanzóse va unos años a recuperar l'antigua tradición d'ellaborar sidra con pera. Y comercializóse con muncho ésitu, tanto n'Asturies como nel restu del mundu. Fecha amás n'esclusiva con peres del propiu llagar en Villamayor (Piloña). Tres el cambéu de llexislación española sobro la sidra y la denuncia d'un llagar anónimu (asina somos los asturianos), prohibióse qu'el llagar pudiera comercializar una bébora que se llame Sidra de Pera en territoriu español, polo que decidieron esaniciar la comercialización n'España y siguila n'EEXX onde esiste una alta demanda. Anguaño únviase la sidra a EEXX y s'enlata ellí mesmu. Una sidra esplumoso de pera, con un golor maraviyoso amiestu de pera y plátanu y un sabor refrescante con daqué más d'alcohol que la sidra de mazana. Mientres se deciden a comercializala en llata equí, podemos esfrutala de xemes en cuando en barril en dalguna cervecería sol nome Angelón Pera. Ta buenísima.


Pa ellaborar una sidra esplumoso esisten 3 métodos posibles, de más baratos/fáciles a más caros/difíciles: inyectar el gas carbónico como se fai en sidra Pomar, provocar una segunda fermentadura nun depósitu (métodu granvas) o provocar la segunda fermentadura na mesma botella (métodu champagnoise).


Viuda de Angelón Brut ye una sidra ellaborada por aciu el métodu granvás. Nidiu, con un pelín d'azucre, y perfecta p'averase al mundu de la sidra brut yá que ye bien algamadiza. Con una relación calidá-preciu inmeyorable, penerada, con un pelín d'acidez y arumes frutales (inclusive a plátanu).


Prau Monga Brut Nature Reserva. Una de les xoyes de la corona del llagar, y una de los meyores brut nature que s'ellaboren. 4 años mínimu de procesu pa una sidra que llogra'l gas de forma natural con una segunda fermentadura en botella, penerándola, con muncho reposu, y moviendo a mano, casi acaldía, botella a botella por que la borra (la madre) vaiga adulces atropando nel pescuezu de la botella. Cuando yá ta perfectamente depurada, faise un degüelle pa que por presión salga'l sedimentu, rellénase la parte sobrante, y vuelven a corchala.


Burbuya fina, seca, complexa, golor maraviyoso a panadería o lleldu, elegancia y persistencia na boca. Una maravía que marida con cualesquier cosa, seca, refrescante y con un preciu fantásticu (unos 9€). Yo hasta la bebo con chuletones y va de luxu. Medaya Oro nel Salón Internacional de la Sidra de Gala (SISGA) 2019


Diamantes de Hielo. Una sidra que s'ellabora al estilu d'alemanes o canadiendes, y que yá supera a éstes en concursos internacionales. A partir de mostiu conxeláu de mazana, estrayen el corazón, onde s'atropa la parte más rica n'azucres y, tres la so desconxelación, déxenla mientres un mínimu de 2 años nun depósitu pa qu'evolucione de forma natural, desendolcando una sidra col doble d'alcohol qu'una normal (unos 12º) y muncha más azucre residual (unos 140g/l). Una llambionada que güel y sabe a fruta maduro, pero que nun empalaga. El productu más caru del llagar (unos 12€), pa consiguir una botella de 37,5cl precísase l'equivalente a 10 botelles de sidra natural.


Ensin dulda, la meyor combinación con quesos, sobremanera azules (con Cabrales o Gamonéu ta de muerte). Y perfecta pa los postres y rematar cualesquier comida.


¿Paezvos pocu? Pos acabamos cola que foi, ensin dulda, la sensación del branu asturianu. Angelón Llimón. Botellín de 33cl pa una sidra entemecida con un zusmiu natural de Llimón, Naranxa y Llima. Aceda, bien refrescante, pa beber ensin parar, y con casi 6º d'alcohol. Tien un llixeru toque turbiu del zusmiu natural. Asegúrovos que probé les prebes que fixeron colos zusmios procesaos que se merquen nel supermercáu y nun tien nada que ver en sabor. Ye zusmiu natural 100%, estrumen miles de llitros xustu antes d'entemecer cola sidra. Un productu perfectu pal branu, pero tamién pa beber mientres tol añu en cualesquier cafetería. Fría, con xelu, o inclusive pa entemecer con xinebra, vodca o ron. Maraviyosa. Medaya Premium nel Salón Internacional de la Sidra de Gala (SISGA) 2019



Y como ye un culu inquietu, ta trabayando en nuevos productos qu'adulces vais dir probando. Tamién tán invirtiendo muncho dineru en faer una llavadura de cara al llagar de cara a faer entá más curioses les sos visites. Y acaben de reformar un antiguu llagar del SXVIII que preside la zona del llagar de Pomar. Nun paren.


Como veis, un llagar que supo afaese a los nuevos tiempos, pescudar nueves víes y ufiertar alternatives ensin perder la so identidá, inclusive recuperando vieyes tradiciones perdíes. Un exemplu, bien reconocíu en foros sidreros internacionales y asturianos y con tou un futuru pa siguir marcando'l camín a siguir. 5 hermanos lluchando duru, ún d'ellos a la cabeza, dedicando la so vida la sidra y a faenos a los demás la vida más feliz.


Yo, siempres que puedo, pido una de Viuda. Tiénenme ganao. Nun ye pa menos.


No hay comentarios

Publicar un comentario