Publicidá

Blog Archive

Contact Me

Nombre

Correo electrónico

Mensaje

Hover Setting

default

Mil Setecientos 52

Señes: Calle Gil de Jaz, 16 - Oviedo / Uviéu
Teléfonu: 985 241 100


Web: http://www.milsetecientos52.com/
Facebook: https://www.facebook.com/Restaurante-1752
Instagram [@restaurante1752]https://www.instagram.com/restaurante1752/


Calidá: 4/5


Comentarios: Mil Setecientos 52 ye'l restorán del Hotel Reconquista (sofitu total dende equí a Los Once Solidarios del Reconquista). Tien una entrada independiente per un llateral del edificiu y a principios d'añu iguáronlu dafechu con bon gustu.


Polo xeneral, solemos fuxir de los restoranes de los hoteles, y más si tán allugaos en plenu centru la ciudá, porque suel haber opciones más interesantes, pero nesti casu, la cena que nos prepararon sosprendiónos pa perbién.


Lo primero a destacar, la decoración. Clásicu pero con un toque más modernu ya informal, pa quitase d'enriba esi arna d'abolengu que trescala tol hotel. La so intención ye abrilo a tolos públicos, y la so cocina y los so precios asina lo amuesen.


Preparáronnos un menú degustación cola carta qu'estrenen de secute, pa que probáramos un pocu de too. Cocina de productu asturianu con un toque creativu. Y bien sabrosa.


Empezamos con un Royal d'Oriciu con Falsu Pesto y Mangu. Refrescante, pa entemecer y tomar cola cuyar. L'oriciu da un toque de picor, pero caltien la suavidá col contraste col aceite y el mangu. Bien ricu.


Mini Vieires con Aire de Cenahoria y Mueyu de Sidra. De mini nada. Volandeires enormes, nel so puntu perfectu, cola espluma de cenahoria yá'l toque allegre de la sidra. Bien riques.


Tortu Asturianu con Chicharro Escabecháu, Aguacate y Microbrotes. Amiestu de sabores y testures. Toque cruxente del tortu, predominando en sabor el chicharro y oldeando col aguacate. Gustónos enforma.


Gyozes de Corderu con Mueyu de Menta y Ras el Hanout. Mini gyozes, bien riques, delgaes. El contraste del corderu cola menta y el raselhanout queda xenial. Un platu con toque árabe.


Tataki de Pulpu Tostáu con Farina de Garbanzu, Escabeche de Tamarindu y Alioli de Remolacha y Artimora. Otru platu de contrastes, el pulpu bien ricu, nun-y fai falta la farina de garbanzu. Yá'l contraste cola artimora y la remolacha va xenial.


Y acabamos con una Zanca de Pitu Caleya Guisáu con Emulsión de Cenahoria. Un clásicu cenciellu que non falla, anque tampoco namoró.


De postre, Tarta de Quesu Requemáu. Una especie d'amiestu de tarta de quesu con testura d'arroz con lleche. Nidiu, pero bien rica. Vien acompañada d'un xeláu de mangu. Gustónos enforma.


Pa beber, EM, Sidra Brut Nature del Llagar el Gobernador. Foi xenial con tola cena.


Nun pagamos, convidónos el restorán. Pero vimos los precios y tán perbién. Tienen amás menú del día. Gustónos el conceutu, la cocina y la decoración, ensin dulda, gran aciertu na reforma.


No hay comentarios

Publicar un comentario