Nueva Visita: Los Llaureles

Señes: Camino de Miyangues, 2 - Torazu - Cabranes

Teléfonu: 629 769 059

Web: http://www.losllaureles.com/
Facebook: https://es-la.facebook.com/LosLlaureles
Twitter [@losllaureles]: https://twitter.com/losllaureles
Instagram [@losllaureles]: https://www.instagram.com/losllaureles/

Calidá: 5/5
Preciu: 41€

Aconseyamos: Acuta Menú Degustación + Habitación, reláxate y date un homenaxe.
Anterior Visita: https://www.lesfartures.com/2018/02/nueva-visita-los-llaureles.html

Comentarios:  Faer 4 menúes degustación al añu (ún per estación), más unes xornaes alcohóliques (más dalguna sorpresa que va haber pal 2019) nun ye nada fácil. Anovase, investigar, ellaborar, papase de la to redolada y del mundu, viaxar pa conocer otres cultures y afaelo a una aldega asturiana, son coses naturales pa Carlos Gallego, pero bien poco habituales nel mundu la cocina.

La evolución ye constante, y cada vegada que vamos préstamos más el so menú degustación. Magar ye ciertu que cada menú degustación tien los sos platos estrella, d'esos que nun puedes escaecete, la idea xeneral del menú ye redonda y la sensación n'acabando ye que tas deseyando volver comelo en cuanto puedas.

Amás, a un preciu más qu'afechu, 41€. Con platos con muncho trabayo detrás, onde curien la presentación, los colores, les testures y, amás, el sabor. Y con una puesta n'escena pol so hermanu Josa Gallego que raspia la perfeición. De la redolada poco puedo añedir a les semeyes, ye ún de los restoranes más guapos d'Asturies, y tien un encantu especial distintu vaigas a la hora que vaigas, a comer o a cenar.

Empezamos con Güevos y Oriciu. Güevu de falpayar con alga cruxente de base y arroz. Pa comer cola mano como si fuere sushi. El cruxente de l'alga, la yema desfaciendose y los granos d'arroz crean un taragañu fascinante na boca. De xacíu, l'apurra intensu del oriciu. Xenial.



Sopa Tom Yum. Sopa típica de Tailanda, con lleche de cocu y caldu de pitu. Lleva chili y cítricos pa dar intensidá. Gambes, frutos secos y filantru. Pa sirvir la sopa sobro'l platu, y esfrutar cómo s'entemez tou. Distintes testures de los fideos, col picante y l'apurra del cocu.

Bien bona.

Gyoza emberzada. ¿Un pantrucu de gyoza? Pos sí. Maraviyosa combinación con un amiestu de testures espectacular, la gyoza col cruxente de la verdura. La gyoza ta rellena de xata asturiana. Pero lo meyor ye'l caldu que baña'l platu, consomé de trufa con güesos de vaca que-y da un toque xenial. De los mios favoritos.

Sabayón de Cava. Base d'espluma de cava, con yema de güevu, fritura de piel de pitu, crema pastelera d'espárragu blancu, recímanu d'uva de mar, granáu d'arbeyu, y percima, llámines de micuit de coríu. Otra maravía de contraste de testures, la espluma yá'l toque cruxente del pitu son brutales.

Platazu. 

Carabineru & Callos. Otra brutalidá de combinación. Callos de xata espectaculares, picantes, amstaos con una croqueta cremosa de gambes. Coronáu por un carabineru y frebes.

Coliflor turrada. Crema de coliflor sobro base de xamón, sardina afumada, quesu manchego y remolacha. Otru xuegu xenial de testures y sabores, onde predomina la combinación de la sardina col quesu. Sabor intenso.

Takoyakis a la Madrilana. Takoyaki d'oreya de gochu con un mueyu bravu picante de verdá y llámines d'atún percima. Contraste de gochu y atún bien bonu. Y col toque picante, más.

Saramollete n'escama. Foi complicáu quedame con un platu de too'l menú, porque tuvo tou a un altor xenial, pero ésti foi'l mio favoritu. Base de crema de cogordes. Arroz negro infláu y saramollete. Namás, nada menos. Xenial la fritura del salmonete coles sos escames "en cresta", que-y dan un toque cruxente maraviosu. Espectacular platu.

Sicasí, el que menos sosprendió foi este Pria a la carbonara. Un homenaxe al quesu con una combinación de parmesano y pría afumáu con pasta. Ricu, pero baxa'l nivel respecto a l'anterior.

Llegamos a los dos postres, el de transición foi'l Kluay Buat Chii My way. Una panacota de lleche de cocu, xeláu de plátanu y agua d'azahar. Lleva menta, garrapiñaes y cacagüeses. Otru xuegu de testures y sabores. Predomina la menta, anque la anidia'l platano. Bien bonu.

Y otru de los favoritos foi la cencellez, pero al empar la esplosión na boca del Pan, Chocolate y Aceite. Dulce y saláu al empar, con tropezones nel xeláu y cruxente nel pan. Coles boles d'aceite arbequina esplotando na boca pa entemecer tolos sabores. Xenial. Lleva de base un crumble de galleta con un toque d'aceituna verde.

Panes Artesanales fechos na casa.

Pa beber, Castrobey Distintu. 2015. Caiño tintu frescu y con un importante toque acedu. 6 meses en barrica de carbayu francés. Foi bien con tol menú, anque tampoco namoró.

Cada vegada ye meyor, cada vegada nos presta más, y cada vegada van superandose. Los colores del iviernu, la chimenea prendía, eses vistas, una atención impecable, y platos que te recuerden a Asturies mientres percuerres el mundu enteru y ves pela cristalera un valle espectacular. ¿Qué más pueespidir? Pos va haber más, ¡que llegue yá 2019 pa volver a Los Llaureles!