Teléfonu: +351 222 010 226
Web: http://www.31porto.pt/
Twitter: [@31porto] https://twitter.com/31porto
Instagram: [@31porto] https://www.instagram.com/31porto
Preciu: 32€
Comentarios: Maraviyosu descubrimientu en Porto. Restorán céntricu, asitiáu nuna bocacái piatonal que va dar a la Plaça da Libertade. Llocal que paez muncho más pequeñu vistu dende fora que lo qu'atopes per dientro. Entrada elegante, decoración cuidada, meses escontra la esquierda con cristalera directa a la cai, y na zona de dientro, zona de comedor más íntima y con lluces baxes, onde tas viendo cómo cocinen.
Xubiendo per unes escaleres, baños y otru comedor enorme, que cuando fuimos nós taba peslláu.
El restorán ufierta cocina portuguesa con un par de vueltes, tanto en sabores como na presentación. Tolo que comimos taba perricu, y con una presentación bien cuidada. Raciones contundentes y muncho trabayu detrás en cada platu. Tien amás un serviciu de cafetería con repostería fecha por ellos mesmos, anque nun llegamos a probala.
Pidimos dos entrantes y dos platos. Y pedimos por demás, porque nun fuimos capaces de llegar a los postres.
Empezamos con un Xampiñón Relleno. Lleva de too: tomate, quesu, aguacate, mermelada de figu. Gustónos, anque tira a dulce y precisa un toque salao pa oldear.
Xampiñones a la brasa con Cebolla Caramelizada. Lleva almendra y mueyu de soya. Amiestu prestosu.
De platos, pidimos Bacaláu con Pan de Maíz y Verduras. Pan de maíz, calabacín, xampiñones, pataca, tomate, pimienta colorada y almendra. Lleva un pocu de vinagre de Porto. Buenísimo.
Y Medallones de Pixín con Xelatina de Hortelana y Gambes. Lo meyor de tola comida. Espectacular. Amasueles, una vieira enorme, calabacín, llagostinos pelaos, y toque de vinagre de Porto, que col mueyu del pixín queda xenial. A estes, el pixín perfectu. El mueyu lleva amás un toque cítricu, y en sabor un toque a sopa de pexe. Platu brutal.
A los postres nun llegamos. Nun tienen carta de vinos, y ufiértennos vinu por copes. Ye un pocu p'ablucar, pero fixo que la cuenta nun xubiera tantu. Sía comoquier, la ufierta ye bona.
Tamién n'esplumosos.
Nós tomamos un Torre de Menagem alvarinho / Trajadura 2018. Ricu. Ensin más.
Pagamos en total 63€. Como veis, perbona opción en Porto. Cocina distinta, céntricu, sitiu elegante, atención mui bona y a preciu más qu'afechu.
No hay comentarios
Publicar un comentario