Publicidá

Blog Archive

Contact Me

Nombre

Correo electrónico

Mensaje

Hover Setting

default

Farturruta Miradores del Navia - Bar Castrillón


Señes: Castriyón - Bual
Teléfonu: 985 979 985


Facebook: https://www.facebook.com/Bar-Castrill%C3%B3n-177483235637152/


Calidá: 3/5
Preciu: 10€


Comentarios:  Güei voi a falavos d'una farturruta que va a prestavos. Tienlo tou: paisaxes espectaculares, bon accesu y aparcamientu, baxa dificultá, circular y una maravía de chigre-tienda onde comer como nel paraísu a preciu de risa. ¿Empezamos?


Empezamos nel Área Recreativa de la Ponte de Castriyón. Tien una zona amplia para aparcar los coches. Espectaculares vistes del embarcaderu, y un pocu más allá, meses escondíes onde podéis comer nuna redolada maraviyosa. Inclusive podéis davos un chapuzón. La ruta ye circular, asina que podéis faela en cualesquier de los dos sentíos, el mio encamientu ye que sigáis el sentíu que vos cunto porque ye menos dura.


Son 11,5km, unes 4h y media a ritmu normal y parando a faer semeyes, inclusive con dalguna esviación para metenos nel ríu. Asina que empezamos a caminar sobro les 10 y picu y pa les 3 menos dalgo tábemos comiendo nel chigre-tienda. Tou perfectu.


Cruciamos la ponte, xubimos unos 300m pela carretera, y la derecha tomamos la pista que marca la ruta. La ruta ta en perfectu estáu de caltenimientu y perbién indicada, nun hai perda. Xubimos y vamos atopándonos miradores naturales sobro'l banzáu de Doiras y el ríu Navia.


Miradores que, según vamos xubiendo son más espectaculares.


Al kilómetru, atopamos col pueblu abandonao del Rebollal, anque tien actividá porque ta bien conserváu. Mientres tola ruta atopamos ente horros, paneres y cabazos. Dalgunos bien antiguos. Maravíes arquitectóniques de la zona, aprovechando los recursos naturales.


Minidescensu pa empezar la xubida al puntu más altu de tola ruta, Silvón. Vistes precioses al pueblu de Doiras.


Silvón ye un pueblín bien guapu, con teixo incluyíu, nel que paramos na Capiya de San Xoan, qu'enseñáronmos les dos dueñes mui amablemente.


Tien amás una sufresna y un texu en mediu'l pueblu.


Empezamos la baxada hasta'l banzáu y ye ende onde tenemos les vistes más espectaculares sobro los meandros. Paga la pena parase a esfrutar.


Siguimos baxando hasta cruciar la Presa de Doiras.


La presa de Doiras construyose ente 1929 y 1934, con un recrecíu en 1958. Una obra d'inxeniería espectacular. Dende la mesma presa les vistes son espectaculares. Tien tráficu de coches.


Pasada la presa, empecipiamos la xubida escontra Doiras. Al llegar al pueblu, les cases abandonaes de los trabayadores de la presa, y la derecha, la Residencia Viesgo, la "casona" onde vivíen los inxenieros. Pista de Tenis, y piscina con vistes espectaculares.


Merez la pena que detengáis a ver la residencia (per fora).


Nel pueblu, parada téunica nel chigre a tomar daqué. Y a comentar los tiempos pasaos gloriosos llenos de xente y vida nel pueblu. Anguaño namás queden unes 150 persones. Un pueblu qu'amuesa lo importante que foi nel so momentu, y con arquitectura que paga la pena remirar.


Dende ellí, podéis enllazar cola ruta hasta la Cova do Demo, onde apocayá s'afayaron pintures prehistóriques de la Edá de Bronce, y que foi siempres abellugu de pastores y mientres la Guerra Civil. Queda pendiente pa otra visita pela zona.


Salimos del pueblu, y llegamos hasta'l Palaciu de Verdín. Casona del SXVIII con -según comentáronnos los vecinos-, un interior dignu de ver, anque pel  momento nun ye visitable.


Tres un recuestu de xubida en carretera, esviamos por un camín de tierra a la derecha onde indica direición a Piñeira.


Ésti ye l'únicu puntu onde tenéis de tar un pocu sollertes na ruta, el camín sigue por unes torres de tensión, pero la señalización indica esviación a la izquierda.



Baxamos hasta Piñeira, y nel intre tomamos una esviación a la derecha pa coyer una pista rural, que va llevanos a la última parte del percorríu.


Un monte d'umeros, carbayos y ablanares, que na seronda ha de serespectacular, dirá baxándonos per una senderu hasta'l ríu Roxío.


Parada técnica a faer dalguna semeya nel ríu. Llenu de trampes pa l'aviespa asiática.


Tres una pequeña xubida, siguimos baxando, hasta'l puntu onde'l ríu Roxío xunta col Navia, llugar qu'aprovecharon pa faer una área recreativa, xuntu a la Ponte de Castriyón. Esto ye, el nuesu puntu de partida.


Una ruta daveres preciosa, y fácil pa tola familia.


A 2kms atópase'l pueblu de Castriyón. Podéis xubir caminando y aprovechar la baxada pa reposar la comida, o faer como nós y xubir en coche. A la entrada'l pueblu d'atopa'l Chigre-Tienda Castrillón. Un pocu más allá, cercina'l llavaderu, tenéis una zona p'aparcar el coche.


El Chigre-Tienda ye una maravía d'otru tiempu que, amás de la ruta, yá paga la pena la visita por sigo mesmu. Pol allugamientu, polo guapo que ye, porque paez que recules nel tiempu, polo bien que t'atienden, polo barato que ye y polo bien que se come.


Los Chigres-Tienda n'Asturies tendríen de ser patrimoniu de la humanidá, pol bien que siempres-y fixeron al pueblu, a persones que nun se pueden mover a centros urbanos mayores; por abrir según les necesidaes de los vecinos, y por engrandecer la cocina casera asturiana ensin más pretensión que la de compartir lo que los dueños comen na so propia casa, colos productos d'ellí.


Comimos menú únicu, lo qu'había por -ATENCIÓN-, 10€. Impagable.


De primeru, Fabada. Con compangu caseru. Una faba que va pasar a la posteridá de lo nidia que taba. Yá sabéis que Bual ye zona famosa pola so faba, y damos fe d'ello. Esplotaba nel cielu la boca como pura mantequilla.


De segundu, Xata Gobernada. Con pataques y pimientos. Espectacular. La Xata desfaise, nun fai falta tenedor, el mueyu ta pa morrese. Vien amás acompañada d'una ensalada con tomate de casa que ye una maravía.


Y de postre, Venera. Venera ye un postre típicu del occidente asturianu, de la zona de Navia y Bual. Forma de rosca, y fechos con güevos y almendra. Equí, pa nun faelo tan trupu, dícennos que lo mueyen nun pocu d'anís, pa da-y un toque más xugosu. Ta bien bonu, anque costó acabalo.


Con cafés, clin, vinu perroneru, casera y agua, pagamos 10€. En tou momentu ufiertáronnos repitir lo que quixéramos. Atención, a éstes de primera.


Un sitiu maraviyosu pa perdese. Taba llenu, asina que si vais, meyor acutái.


Maraviyosa farturruta por ún de los sitios más desconocíos y por esplotar d'Asturies. En plenu branu y nun cruciamos con nengún otru senderista na ruta.


Al acabar de comer, y de camín de vuelta, parada nel Castru de Pendia. Mui cerca del famosu Castru de Cuaña. Tien un mirador con unes vistes sobro'l castru impresionantes.


Pero paga la pena averase y pasialo. Llibre y de baldre, y abondo desconocíu, asina que de xuru vas tar solu y vas poder notar la maxa del llugar. Habitáu ente los SIV A.C. y 1 D.C, tien, amás de les típiques construciones, una gran cabana y dos saunes.


No hay comentarios

Publicar un comentario