Cena de la Sidra de Gala 2019 - Premios SISGA

RESTAURANTE AMARES NH XIXÓN
Señes: Paseo del Doctor Fleming, 71 - Xixón
Teléfonu: 985 195 755

Web: http://www.amaresrestaurante.com

Facebook: https://www.facebook.com/amarescoslada/
Instagram: [@amaresrestaurante] https://www.instagram.com/amaresrestaurante/

Anterior Visita: https://lesfarturesast.blogspot.com/2019/06/cena-de-la-sidra-de-gala-2018-premios.html

Comentarios: Un añu más, Asturies foi'l centru sidreru mundial gracies a la Fundación Asturies XXI. Celebróse l'IX Salón de la Sidra de Gala en Xixón, esto ye, sidra que nun s'echa, con representación de 12 países (unos 50 llagares), y un fin de selmana enllenu d'actividaes alredor de la sidra.

Un intercambiu cultural perricu, pa conocer problemes, moliciones y duldes particulares de cada territoriu, pero tamién p'aunir fuerces, crear xuniones y lluchar xuntos p'asitiar la sidra nel cuidáu que se merez. Y amás, un importante intercambiu económicu, con alcaldes y representantes d'árees comerciales de munchos países y que pueden abrir nueves víes económiques cola sidra como nexu d'unión.

Una pena que'l Principáu d'Asturies nun vea esi potencial y nun unvie a los sos representantes pa sacar partíu a esos nexos. Sobremanera, porque cuando fales con persones rellacionaes cola sidra d'otros territorios, reconocen Asturies como la madre de la sidra, como l'epicentru mundial del qu'aprender, en cuando a ellaboración, plantíu de mazana, pero tamién, de consumu, rede de sidreríes y de cómo la sidra forma parte de la vida de los asturianos.

Les actividaes principales tan centraes na Cena de Gala que se produz el vienres de nueche, nesta ocasión nel Restorán Amares, perteneciente al Hotel NH, con una preciosa terraza esterior onde pudimos empezar a romper el xelu charrando ente collacios.

Yá sentaos na mesa, y con un amiestu de persones de distintos países, probemos el menú qu'empezó con un Timbal de Bacaláu con Vinagreta Kumato yá'l so Pilpil con Pétalos de Mazana Rosa. Lo meyor ensin dulda de tola cena. Bien ricu.

Con Sidra 1947, del llagar Viuda de Angelón. La primer sidra de mesa crianza, avieyada mientres 4 meses en barriques de carbayu americanu y francés. Una maravía.

Y Mr. Plūme Dry. Sidra letona, sidra de mesa con 6,5% y un toque muncho más a mazana asada por mor al tipu de mazana qu'utilicen allá enriba.

Llombu de Merluza Gratináu con Centollu y Tallarinos de Verdura. Nun trunfó.

Probémosla con Posma. Sidra brut de Tenerife. Puntazu exóticu faer sidra en Tenerife, que resultó premiada nel Sisga. Nun nos gustó.

Sicasí, sosprendiónos pa perbién Brut Tori 17. Sidra estonio, fecha pol métodu champanoise, bien equilibrada y con bien bon sabor. Una de les meyores de la nueche.

Corderu Rellenu d'espinaques, piñones y boletus con praliné de pistachos. Ricu.

Col corderu, tomamos L'Insoumise. Una brut semi-seca francesa, con esi sabor típico de les mazanes de la zona. Nun trunfó.

Cider Talk. Semiseca checa, nun ta nada mal.

Y Guzman Riestra Semiseca. Maraviyosa. Encántame esta sidra.

Pa los postres, Bizcochu de Nueces, Praliné de Castaña Asao y Mousse de Sidre'l Duernu. Normal.

Con Sidra Valnera. Una sidra semiseca con miel, anque si nun te dicen que tien miel tienes que ser finu pa notala. Ye redonda, con un bonu amiestu d'ácidu y dulce, y ta bien rica.

Honey Cyser. Lo contrario que l'anterior, sabor a miel bien marcáu y poca integración cola sidra. Sidra checo.

Mousse de chocu-blancu y Maracuyá. Bona presentación, pero abondo desaboríu.

Kuura Ice Cider. Esceicional sidra de xelu finlandés.

20 Mazanes Valverán. Otra sopresa. Muncho meyor qu'otros años que lu probemos. Un saltu de calidá pa bien.

Colos cafés, llegaron los llicores de sidra, y echamos enforma de menos el nuesu aguardiente Salvador del Obispo, porque nengún tuvo al altor. Lecristallier. Llicor de sidra del piamonte.

Txopinondo. Llicor de sidra del País Vascu francés, que nun va pasar a la posteridá.

Mientres la cena, partiéronse los premios que decidió'l xuráu, compuestu por un representante de cada llagar participante nel SISGA, el día anterior.

Los premios d'esti añu tuvieron Asturies como trunfadora, sobremanera col Llagar Viuda de Angelón, que foi premiao en 5 de les 6 categoríes a les que se presentó, con@2 premium (9,7 de puntuación media) y 3 oros (9 de puntuación media). Gran reconocencia a un llagar que nun para d'anovar ensin escaecer la tradición, y que nun para de collechar premios en tol mundu. Tamos bien arguyosos de Fran y la so familia.

A otru día, de 12 de la mañana a 9 de la nueche. La tastia abierta a tol públicu pa probar estes sidres y munches más que traíen los distintos llagares. Nel Palaciu de Revillaxixéu, una redolada dafechu preciosa, ambiente sidrero, alcuentru de cultures distintes y munches ganes de pasalo bien.

Pagues 6€, copa na mano y puedes beber tola sidra del mundu que quieras. ¿Qué más se puede pidir? ¡¡IX años de SISGA y esperemos que por munchos más!!