Invitación al últimu capítulu de la Cofradería d'Amigos de los Quesos, onde se nomaba nuevu cofrade a Luis Argüelles, vieyu amigu de Les Fartures.
Pa ello, pidióme presentar la Sidra qu'acompañaría la preba de quesos, escoyida por Roberto Aramburu, toos ellos de la zona de Llanes. Una maravía comprobar tanta variedá namás nun sitiu como Llanes. Nun sabemos lo que tenemos.
Empezamos con un Porrúa Frescu, nidiu, bien ricu, y qu'inclusive, propúsose na mesa probar con unes anchoes de la zona. Cueva Llonín, vieyu conocíu, que nun taba nel so meyor momentu. Trés Lleches de Pría Azul, que nunca falla. Un azul "algamadizu", pa casi tolos públicos, pero con munchos matices. Porrua Cabra, una de les sorpreses de la nueche. Vidiago n'Aceite, ensin dulda, el trunfador de la nueche, maraviyosu. Y Picu Urriellu Picón de Cabra y Vaca, un Cabrales de lleche cruo, con una maduración d'ente 3 y 6 meses. Bien bonu.
Pa beber, Angelón Pera. La sidra de pera de Viuda de Angelón, que yá cuesta enforma atopar n'Asturies porque se comercializa casi n'esclusiva pa EEXX.
1947. Sidra de mesa, una sidra penerao y estabilizao, que nun fai falta echar. Ye una sidra que güel y sabe a sidra, anque se tome como si fuera un vinu. Colos quesos va xenial. Foi la meyor combinación.
Y de regalu, Angelón Llimón, la maravía que tanto trunfó esti branu. Sidra con un toque cítricu, pa beber ensin parar.
Mención especial merez la Confrería pol so llabor, a lo llargo de tantos años, a favor de la dignificación de los quesos asturianos, que se ve compensada cola celebración l'añu que vien del certame internacional más famosu alredor del mundu del quesu: World Cheese Awards. Uviéu va ser per unos díes la capital mundial del quesu, y eso ye, en gran parte, gracies al trabayu d'esta Cofradería. Vaiga dende equí la mio felicitación. L'eventu va riquir munches manos y esfuerzos, y espero que los organizadores cunten con ellos: poques manes meyores va haber.
No hay comentarios
Publicar un comentario