Nueva Visita: Abrelatas

Señes: Ería del Hospital, 5 - La Pola Sieru

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Anterior Visita: https://lesfarturesast.blogspot.com/2019/10/abrelatas-meson-el-centro.html

Calidá: 4/5
Preciu: 42€

Comentarios:  Yá sabéis que nun cansamos nunca de dir al Abrelatas, y que ye ún de los nuesos locales favoritos. Hai munches coses que nos presten del Abrelatas, pero güei vamos resaltar que ye un sitiu de calidá pa tolos precios. Si quies picar daqué baratu, puedes faelo (y más con ese peazo de Menú del Día) y si quies date un homenaxe ... tamién puedes faelo.

Güei voi a cuntavos l'últimu homenaxe que me metí nel Abrelatas. Tenía dos oxetivos, probar un nuevu platu que de xuru va ser un ésitu na carta y probar la chuleta de vaca de 20 años qu'en curtiu va protagonizar unes xornaes de la carne como les que vos cuntamos equí.




Empezamos con una Mantequilla Artesana de Sariegu batida n'Almíbar. D'antiguo usábase la mantequilla casera como protector d'estómagu antes d'una bona fartura, sobremanera en díes festivos. D'ende la tradición d'empezar los menúes con mantequilla. Ésta ta bien nidia y tien esi toque a almíbar que nos presta. Xenial col pan.

Siguimos con un clásicu de la casa que nos encanta, Pulpín del Pedreru de Tazones Guisadino con Crema de Pataca y Ensaladilla de Pataca y Pimentón de la Vera. Nidiu, testures inmenses, amiestu de sabores y un puntu picante. Yá ye un clásicu de la casa. Buenísimo.



Arroz con Kiku al Estilu Llames d'Enriba. Gran parte del ésitu del Abrelatas ye cómo prepara les bases de los guisos, tien el toque perfeutu, y eso pudimos probalo daqfechu de la pota mientres se faía. Salivo namás d'escribilo. Camiento toos que vais saber lo que son los Kikos, non? Bonu, pos maxina-y toa esa potencia na boca, más una carne que se desfái de lo bien fecha que ta y sumáu a un arroz calistráu de toos esos sabores y golores. Perfectos.

De los meyores que comí nunca. Habéis de probalo.

Y acabamos con una Chuleta de Vaca Vieya Asturiana de los Valles de Sariegu de 20 años maurecida 40 díes. Sabor intenso de la carne, tien menos grasa que la fía que comimos va unos años, pero una potencia na boca espectacular. Toque perfectu de brasa, mantequilla na boca ya intensidá suprema. Dafechu xenial.

Pagamos 42€ ensin vinu.

Pidir vinu nel Abrelatas significa beber Asturies, y eso ye una maravía. Punximos en manos de Borja, y empezamos con un Ḷḷumés 2015. Nun han de quedar munches botelles d'esti vinu. Verdejo tintu, elegante, sabrosu y perfectu colos entrantes.

Cuando llegamos al arroz, abrimos un La Foriata La Petite Zorrina 2014. D'esta sí que nun queden apenes botelles. De la bodega Dominiu del Urogallo, que yá abandonó Asturies, y que ye acidez pura. Tien un toque terrosu que tamién nos presta abondo.

Y acabamos con otra curiosidá que desconocía, Dpieiga Tintu 2015. Un vinu gallego, pero casi cola frontera con Asturies y que tien viñeos n'Ibias. Namás 1500 botelles d'un vinu fechu a partir d'Albarín Negru y Mencía, frescu y ensin barrica. Tou por faer, pero tamos nel bon camín.

Como veis, homenaxe tantu na cocina como na bodega. Pocos sitios apuesten por tolo asturiano como l'Abrelatas, y son capaces d'apurrite les meyores calidaes posibles de productos que tán tan cerca de nós y desconocemos. Recuperando amás recetes antigües y entemeciéndoles cola creatividá de la mente de Borja Alcázar. Tou un luxu.