Publicidá

Blog Archive

Contact Me

Nombre

Correo electrónico

Mensaje

Hover Setting

default

Ferroviario: Preba de Quesos d'Aitor Luis Vega con Vinos Piérola

Señes: Gascona 5 - Oviedo / Uviéu
Teléfonu: 985 225 215


Facebook: https://www.facebook.com/elferroviario/
Instagram: [@el.ferroviario] https://instagram.com/el.ferroviario


Comentarios: 18 quesos, 6 vinos y unes 60 persones nuna sala. Este ye'l resume de la llocura qu'entamaron nel Ferroviariu, cola presentación incluyida d'un quesu que va dar muncho que falar. Y amás, foi tou un ésitu. Organización de 10, atención de primera y ambiente didáctico ya informal onde quesos y vinos convivieron en territoriu sidreru.


La preba tuvo dirixida por Aitor Luis Vega y Oscar Rubio, pela parte quesera. Vieyos conocíos y almiraos de Les Fartures. Y de'l grupu Piérola recibimos la visita de Cosme Sauca y Sergio Santorum.


Piérola lleva ellaborando vinos na rioxa alavesa dende 1966, en Moreda (nun confundir con Morea d'Ayer 😁), con uves que s'abastecen namás de la zona al 50% ente propies y ayenes.


Empezamos col so Fernández de Piérola Tempranillo Blanco, viuo perfeutu pa empezar, frescu y nuevu; pero que nun aguantó la primer turniada de los quesos.


Una de les sorpreses de la nueche foi un esceicional Requesón con Miel de La Saregana. Con cuyar, suave y con un toque a miel. Bonísimu. Comercialicen amás mantequilla y yogures, que si podéis, probáilos (Los yogures suel tenelos l'Abrelatas).


Pría 3 Lleche Blanco. Ellaboráu a partir de lleche pasteurizao de vaca, a la que s'añede nata d'oveya y de cabra. Esto-y da un sabor importante a nata, con una testura xenial. Suave y ricu.


Mahón Semi. De lleche cruo de vaca. Mauración de 2 meses y con un importante toque saláu. Foi onde más se notó que se precisaba un vinu más potente.


Camudamos a ún de los favoritos de la nueche. Fernández de Piérola Viura. La Viura o Macabéu ye una uva qu'adulces van recuperandose y que cayó en desusu por cuenta la so poca intensidá arumosa. Sicasí, ye una uva qu'avieya perbién na barrica, y que se cría sobro les sos enguedeyes mientres 6 meses Bien ricu.


Llegáu a esti puntu, Aitor presentó a Pascual Fernández, de Quesos Rey Silo, que nos faló de la sos quesería y presentónos el so nuevu quesu Rey Silo con Magaya.


El so primer quesu foi un Besos de Rey Silo. Espectacular Afuega'l Pitu con lleche cruo de vaca, con 15-20 díes de mauración. Pequeñu, perpequenu, con una testura y un sabor maraviyosu.


Siguimos col so Rey Silo Blanco, igual que Besos, pero más grande y con unos díes más de mauración. Unos 20-30. Menos cremosu, y más compactu. Tamién crez n'intensidá. Bien bonu, anque yo soi un namoráu del Besos.


Y a lo último, presentáronnos la so última creación, Mássimo de Rey Silo con Magaya. Pa los non conocedores de la cultura la sidra, la magaya ye la borra que queda de mayar la mazana pa llograr la sidra duce. Esa borra aprovéchase y entemezse cola alimentación del ganáu por cuenta del so altu valor nutritivu. Nesti casu, ellabórase como base un Rey Silo, y déxase maurecer mientres 7 meses. Los postreros 28 díes entemecenlu cola magaya, que "contamina" el quesu, da-y un toque acedu y apurre una corteza con fungu que ye comestible. Ello ye que probémoslu ensin y con corteza, y a mi gustóme más con ella. Gran quesu, apostando polo asturiano, y xuniendo dos mundos bien paecíos: quesu y sidra.


Camudamos d'un vinu, al postreru blancu. Un semidulce, Bs. 75% viura y 25% malvasía. Córtase la fermentadura pa que nun sía tan duce, anque los toques a piescu ganen claramente.


Montagnolo. Un quesu azul y cremosu alemán (anque nun lo paeza pol nome). Facilón y perfeutu pa empecipiase nel mundu los quesos azules. Otra corteza pa morrer.


Volvimos a casa, a Les Regueres. A probar l'espectacular Origen de Lazana. Quesu de lleche cruo de vaca. Mantegosu, de sabor intenso, un toque a ablana y pa comelo tou, inclusive la corteza. Bonísimo.


Moncedillo Rojo. Lleche cruo d'oveya y cuayo natural de corderu, de Segovia. Un quesu cremoso con poques selmanes de mauración y que la so corteza ta bañada con pimentón duce de la Vera, lo que-y da un toque afumáu interesante. Mui ricu.


Pasamos a los tintos, col so tintu "básicu". 8m. Un 100% tempranillo xoven ellaboráu en depósitos d'aceru.


Ovín de Cabra. De Nava. Fechu con lleche pasteurizao de cabra. Los quesos yá se ponen más intensos y piden a berros camudar el vinu blanco pol tintu.


Pesebre Viejo. Un manchegu de Cuenca buenísimo, de lleche cruo d'oveya, y con 14 meses de mauración.


Varé de Vaca Lleche Cruo Ecolóxicu, otra maravía asturiana de Varé (Sieru), primer quesu ecolóxico d'Asturies y que ye toa una delicia na boca. Ún de los mios favoritos. Tien proteína cristalizao, que-y da un toque cruxente fascinante.


Camudamos al Fernández de Piérola Crianza. El so vinu más conocíu. 18 meses en barriques de carbayu francés y americanu, entra perfeutamente y dexa un toque a vainilla bien ricu.


Yá empezábamos a amorrentar, pero inda nos quedaben dos tandes de quesos y otru vinu por probar ... Gouda Brabander L'Amusse. Quesu holandés con 1 añu de madración. Nesos @2 meses consigue crear unos mini cristales de proteína que-y dan una testura y un sabor increíble.


Pa la presentación del siguiente quesu, cuntamos con Tom, comercial de la quesería Quicke's, que nun perfeutu castellan esplicónos la ellaboración del so quesu Cheddar.


Nada que ver col que suel acompañar ciertes hamburgueses (?) de grandes cadenes de comida rápida. Bien bonu.


Gouda Trufáu Boerenkass. Quesu holandés con 12 meses de mauración, de lleche cruo de vaca y a la que la qu'añaden trufa, que-y da un importante sabor y golor. Una maravía.


Acabamos los vinos cola so xoya de la corona, Fernández de Piérola Reserva. Ensin dulda, el meyor de la nueche. Entra perbien y aguanta na boca. Viñeos vieyos de la zona, y 24 meses en barrica americana y francesa. Amás tien bona rcp nel mercáu.


Acabamos con un Moluengo, acompañáu d'un pan d'algues. Tien el plus que l'afinador saca esti quesos nel so puntu óptimo de vienta, en cuenta de sacalo cuando cumple les condiciones llegales pa ello. Quesu d'Albacete, de cabra. Lleva un palín nel centru por qu'amacere bien, y alredor una corteza con ceniza vexetal que tamién se come. Bien ricu.


Peñoceo, el nuevu quesu azul de cabra de La Peral. Bien bonu.


Roquefort Papillon. Esti quesu yá nun precisa nenguna presentación, quesu azul francés de lleche d'oveya. Perfeutu colofón pa rematar una gran preba.

Más completa imposible. Gran preba d'El Ferroviariu. Xenial compañía y perbon productu.


No hay comentarios

Publicar un comentario