Alcuentru FoodIzadi

Señes: C/ Jovellanos, 2 - Oviedo (Uviéu)
Teléfonu: 984 034 014

Web: http://www.mesturarestaurante.com/

Facebook: https://www.facebook.com/mestura/
Twitter: [@deloyagastro] https://twitter.com/deloyagastro
Instagram: [@deloyagastro] https://www.instagram.com/deloyagastro/

Alcuentru pa persones rellacionaes coles redes y la gastronomía nel Mestura al cargu de Bodegues Izadi.

Yá conocíamos la Bodega na cena hamornizada en Delabra que vos cuntamos equí, pero nesta ocasión entamáronnos un eventu distintu. Un mini taller fotográficu especializáu en fotografía. Pa ello cuntamos con Victor Hugo de Vicugo Studio, que d'una forma prestosa foi esplicandonos los conceutos básicos de fotografía y les distintes posibilidaes qu'ufierta na gastronomía.

Na parte práctica, pudimos allumar, enfocar y xugar con distintos gadgets fotográficos que Victor diba proponiéndonos. Pa ello combinábamos un platu de la carta del Mestura con una Botella de Izadi.

Mientres practicábamos pudimos tastiar los platos colos distintos vinos de Izadi.

Empezamos con un Izadi Larrosa DO La Rioja. 100% Garnacha de viñeos d'altor. De mano, yá sospriende'l color, rosa palu, muncho más elegante que la mayoría de rosaos que sueles atopar. Golor a pera (sobremanera) y en boca, enfresca, ye jugoso y non empalaga. Bona acidez, amás. Gustónos enforma. Nun somos de rosaos, pero d'ésti ... definitivamente sí.

Siguimos con un Izadi Fermentación en Barrica DO La Rioja. 80% Viura y 20% Malvasía. Cuntáronnos que ye l'únicu de los sos vinos que nun fai fermentadura maloláutica, porque quieren que se note muncho más l'apurra de los 3 meses de madera. Namás faen unes 20000 botelles, y entemecen malvasía con uva viura, que ye típica d'aquella zona, porque la viura ye per bona pero pocu arumosa. Un blancu distintu, onde se nota la madera en ñariz, de color mariellu maciu y na boca, la madera da-y cuerpu y cierta untuosidá. Xenial esi puntu d'acidez.

El so vinu más vendíu ye Izadi Crianza DO La Rioja. 100% Tempranillo pa un vinu equilibráu y elegante, con un preciu xenial pa la calidá qu'ufierta. Gustónos enforma.

Un pasu más alla, va'l so Izadi Selección DO La Rioja 2013. 80% Tempranillo y 20% de Graciano. Graciano ye una uva de la zona que tuvo a puntu d'esapaecer por cuenta que ye poco rentable. Agora l'enclín intenta recuperala y pallo entemecenla con tempranillo, que ye yá una uva más que reconocida por toos. Tintu, color coloráu brillante. En ñariz toque importante de vainilla, y na boca entrada fácil y aguanta

Y acabamos col so  Izadi El Regalo DO La Rioja. 90% Tempranillo, y el 10% restante estremáu ente Graciano, Garnacha y Mazuelo. Vinu escoyíu de les cepes más vieyes de los sos viñeos, con una producción esclusiva y a un preciu mayor, pero con un golor y sabor esceicional. Foi per interesante comprobar les diferencies ente la Selección y El Regalo, y esti Regalo ye inda más redondu. Mui bonu (tamién ye más caru).

Ente vinu y vinu, tapes pa picar del Mestura, coles qu'amás, pudimos siguir practicando la fotografía.