Nueva Visita: Secreto a Voces

Señes: Cai Manuel Pedregal, 8 - Uviéu / Oviedo

Teléfonu:  948 184 134

Web: http://secretoavoces.net/

Facebook: https://www.facebook.com/Secreto-a-Voces-Oviedo
Twitter [@SecretoaVocesOv]: https://twitter.com/secretoavocesov
Instagram [@secretoavocesoviedo]: https://www.instagram.com/secretoavocesoviedo

Calidá: 4/5
Preciu: 20€

Comentarios: Secreto a Voces yá va tiempu que dexó de ser el llocal de moda na Ruta los Vinos pa consolidase ufiertando una propuesta sólida, pero siempres buscando la innovación y la sorpresa. Son "culos de mal" asientu, y eso ye d'agradecer anguaño.

Una de les coses que más me presta del Secreto ye que, a pesar de la so decoración impactante, con eses lluces y colores que conviden más al cóctel qu'a comer, Edén yá'l so equipu consiguen que te sientas como en casa y bien a gustu en tou momentu. Xente encantadora que s'esmolez pa que tengas una bona esperiencia nel so local.

Cenamos un día ente selmana a una hora na que s'entemez l'ambiente la cena y la primer copa. Y ési ye ún de los aciertos del llocal, l'amiestu d'ambientes, toos compatibles, nel mesmu espaciu. La fin de selmana ye complicao atopar mesa. Asina qu'acuta.

Otru de los sos puntos fuertes ye, amás de la variedá de carta y del so constante movimientu (anque los clásicos nun los toquen), ye qu'ufierten medies raciones y que eso te da pie a xugar y probar más coses.

Pidimos 3 medies raciones pa 2 persones. Traxéronnos de aperitivo una Crema de Quesu con Xenxibre y Pimentón.  Gana'l xenxibre. Enfresca y llimpia la boca de mano.

Amás va perfecta pa untar na so amuesa de panes que tienen, de chapata, de maíz, de malta y de granes con farina integral.

Empezamos con Foie Mi-Cuit con Marmiellu, Chocolate y Ablanes. Meyora en reposando unos minutos. Dos bonos cachos onde s'entemez el foie col marmiellu, y cruxente d'ablana. Pa untar en tostaes.

Langostinos Crunch con Mayonesa de Maracuyá.  4 llagostinos nuna fonte con mayonesa presentada nun bote de crema dentífrica. Amiestu ganador del cruxente col cítricu.

Acabamos con un Steak Tartar de Black Angus con Yema Curada y Xeláu de Mostaza a les Fines Yerbes. Perbonu. Especiáu y pa fundir el tenedor hasta que nun quedó nada.

Pa beber. Agua y una copa de Sidra Brut EM. Tienen una bona carta de vinos con representación asturiana.

Tamién son famosos los sos cócteles, y como diximos antes, ye'l local perfeutu pa picar daqué y tomase la primer (y segunda, y tercer) copa. Tratu de 10, bebida de primera y ... tamién la cocina.

Pagamos por tou 43€.