Publicidá

Blog Archive

Contact Me

Nombre

Correo electrónico

Mensaje

Hover Setting

default

El Cabanón: Preba de Cerveces con Andrés Torre y Quesos con Aitor Luis Vega

Señes: C/Estación, 19-21. Avilés
Teléfonu: 678 774 336


Facebook: https://www.facebook.com/Cerveceria-el-Cabanon
Twitter: [@CERVECERIACABAN] https://twitter.com/cerveceriacaban
Instagram: [@pablo_cabanon] https://instagram.com/pablo_cabanon


Comentarios: Por mor del 15 Aniversariu de la Cervecería El Cabanón, Pablo entamó dellos actos, pero'l primeru, ensin dulda, tenía que pasar pola cerveza. Pa ello xunto dos mundos, a priori distintos, pero que son mui, muipaecíos: el quesu y la cerveza.


Siempres acomuñamos el quesu col vinu, inclusive cola sidra; pero per ellaboración y filosofía, el quesu y la cerveza van de la mano. El nuevu boom (que yá nun ye tan nuevu) de la cerveza artesano cola dignificación (y profesionalización) que se ta faciendo del quesu nos últimos años n'Asturies son dos casos d'ésitu dignos d'estudiar y d'asonsañar. Entá queda enforma por faer, pero lo que se ta faciendo, ta faciéndose perbien.


Pa ello, Pablo xuntó a dos de los mayores espertos que tenemos en cada campu nuna preba antolóxica que, ensin dulda, va ser recordada tiempu pola so peralta calidá. Andrés Torre d'El Lúpulu Feroz  y Aitor Luis Vega d'Esclusivas Vega mientres falaben dábense cuenta que'l mundu la cerveza y del quesu tienen prácticamente los mesmos problemes y qu'empiecen a recoyer agora los frutos d'años de reinvindicaciones y llucha.


Empezamos con una Nómada Nature Pils.  Una "rubia clásica" de Nómada, una de les cerveceres artesanes más famoses d'España que'l so 40% foi adquiríu va unos años por Mahou-San Miguel. Foi nesi momentu cuando empezamos a pescanciar que'l movimientu "craft beer" (cerveza artesano) llegó pa quedase. Una rubia ensin penerar nin pasteurizar, lo que-y da una presencia turbio, pero muncho más arume y sabor qu'una rubia normal a la que teamos avezaos. Entra sola y ta bien bona. Tien 4,2% d'alcohol.


Con ella, dos quesos. Massimo de Rei Silu. Esta pequena maravía que tenemos en Pravia. Lleche cruo de vaca con apenes mes o mes y mediu de maduración. Testura blanda, y corteza con mafosu (comestible y perricu). Xenial.


Valençay, lleche cruo de vaca con corteza con ceniza, de la zona de Francia. Un quesu de pasta blando que güel y sabe a cabra, y que ta perbonu. Vien acompañáu amás, d'un dulce de naranxa.


Dambos fueron xeniales cola cerveza.


Camudamos de cerveza, Rogue Azelnut. Una turrada estilu Brown Ale, de 6% proveniente de Rogue, una de les cerveceres artesanes más importantes d'EEXX. Llixera, y con un toque importante a ablana, tamién a carambelu. Casi paez que teamos bebiendo Nocilla con Frai Anxélicu. Distinta y orixinal.


Cantar de Gredos Enmohecida.  Quesu de lleche cruo de vaca con 4 meses de mauración. Corteza fumosa con golor importante a hongu. Testura elástica pero non arenosa (más típica na zona).


Prestános tolo que fai Elvira García.


Idiazabal Afumáu. Pero'l de categoría Pastor, que'l normal ye muncho más industrial. Bocáu con un afumáu sutil que nos prestó. Buenísimo.


Amager The Bastard Princess. Estos daneses tán faciendo dalguna de les meyores cerveces del mundiu. Apocayá camudáronse a una fábrica más grande y estos son los sos primeros llotes, namás con 25 díes, polo que más fresca nun puede ser. Una NEIPA, muncho menos amarga que l'enclín actual, pero con muncha intensidá de golor. Sabor muncho más afrutáu, y toques de mangu y piescu. Esceicional. 6% d'alcohol.


Con ella, Comté Reservation de Marcel Petite. Ún de los meyores quesos curaos del mundiu. Un auténticu espectáculu. Quesu francés de lleche cruo de vaca. Espectacular.


Geo de Lazana. Otra de les maravíes asturianes, abondo desconocíu. De Llazana (Les Regueres). Quesu de lleche cruo de vaca. Mantegosu, de sabor intenso, un toque a ablana y pa comelo tou, inclusive la corteza (que llaven con paños d'agua y sal pa llimpiar el mugor). Buenísimo. Y xenial cola cerveza.


Oppigards Thurbo. Otru de los meyores ellaboradores de cerveza del mundu. Dende Suecia lléganos esti Doble IPA, de 8,5%. Fuerte, amargosa, con muncho sabor y que pide a berros quesos más fuertes.


Gorgonzola. Otru clásicu, esta vegada d'Italia, pa un quesu untáu, potente, de lleche de vaca pasteurizada. Ye la variedá Dolce.


Puertu Carriellu Condimentado. Quesería artesana de Cádiz con cabres de ganadería propia. Equí nótase'l sabor a caprín, y dicen, el toque a frutos secos.


Struise Black Albert. Paecía imposible siguir meyorando'l nivel de les cerveces pero ... Andrés sosprendiónos con una de los meyores Imperial Stouts del mercáu.  13% de cerveza fecho en Bélxica. Abondo desconocida y que cuesta consiguir. Trupa, fuerte, intensa pero ... col alcohol perbién integráu. Perfeuta.


Pesebre Viejo. Quesu manchego curáu, ellaboráu con lleche cruo d'oveya. Con flora bacteriana na corteza que se come, y da-y un puntazo xenial. Unten los quesos con aceite y miel.


Moliterno Al Tartufo. Quesu italiano de Lleche Pasteurizada d'Oveya al que-y echen trufa, con un sabor mui, mui particular. Quiciabes más pa un cachu que pa consumir grandes dosis, y perfectu pa conxugar nuna tabla de quesos y oldear sabores. Bien interesante ver les vetes de trufa negra nel quesu.


La última cerveza foi una Boon Oude Gueuze. Una lámbica de 7% belga. vamos falavos más palantre de les cerveces llámbiques, pero son cerveces de fermentadura de bogayu (colos lleldos del ambiente) que tienen un toque acedu y que namás pueden ellaborase nos periodos d'iviernu. Esto ye, ellaboración y sabor bien asemeyáu a la nuesa sidra. Paga la pena probala.


Col toque acedu, va xenial el quesu azul. Y qué meyor qu'un Peñoceo (Peral de Cabra), quesu indispensable n'Avilés.


Y acabamos con un Cabrales Pepe Bada. Nun pudo ser el Teyedu porque cola nieve d'estos díes, foi imposible entrar na cueva a por ellos. Asina d'artesanu ye'l meyor quesu azul del mundu. Sicasí, en cuenta los 8 meses habituales que tien el Teyedu, "conformamos" cola so versión maurecida 4 meses. Buenísimo igual.


Pasión y talentu. Dos mundos onde la puxanza del productu artesanu y la vuelta al oríxe ta cada vegada más marcáu. Y que tienen problemes asemeyaos. Xenial esfrutar d'Aitor y Andrés, dos apasionaos que tresmiten esa ilusión a tolos presentes. Y viendo lo visto, nun va ser la so última collaboración.


No hay comentarios

Publicar un comentario