Aramburu: Preba de Quesos y Sidra Asturiana para Toptasting

ARAMBURU UVIÉU

Señes: C/ Fierro, 9

Teléfonu: 984 285 781



Web: http://aramburu-asturias.es/

Facebook: https://www.facebook.com/AramburuAsturias/
Twitter: [@AramburuAstur] http://www.twitter.com/AramburuAstur/
Instagram: [@aramburuastur] https://www.instagram.com/aramburuastur/

Conocimos a David y Marcos va unos años cuando nos falaron del proyectu Toptasting. Bona xente, coles idegues clares y apostando por anovar dientro d'Asturies, asina que decidimos siguilos de cerca porque la idea gustónos enforma.

Toptasting ye una aplicación pal móvil onde, en cuenta de puntuar sitios, puntúes directamente'l platu. Asina la comparancia ye por productu o por platu, y los rankings de fabada, hamburgueses, arroces ... tán xenial pa que la xente vaiga a tiru fixu.

Entamaron un eventu na so aplicación, y pallo convidáronnos a medios rellacionaos cola gastronomía a faer una preba a ciegues de quesos asturianos con Sidra Brut. Y qué meyor sitiu pa faelo qu'Aramburu Uviéu, amás, con Roberto de maestru de ceremonies. Inmeyorable.

2 tandes de 6 quesos y ente medies, 5 botelles distintes de Sidra Brut pa probar.

Empezamos por Besos de Rey Silo, Una de les xoyes queseres que tenemos n'Asturies, y que nun dexa de collechar premios internacionales. Quesu (pequenu) y cremosu, que s'ellabora con lleche cruo de vaca. Con una maduración pequena, tien una intensidá de sabor buenísima.

Siguimos con un Lazana. Una de les maravíes desconocíes asturianes. De Llazana (Les Regueres). Quesu de lleche cruo de vaca. Mantegosu, de sabor intenso, un toque d'ablana y pa comelo tou, inclusive la corteza. Buenísimo.

Cueva Llonín. Quesu de pasta blando de Peñamellera, suave, de testura fascinante y buenísimo. Ún de los favoritos de la nueche. Tien una alcordanza al Camembert, d'ende que lo llamen el cameembert asturianu.

Orígen de Lazana. Meyor inda qu'el Lazana. Maraviyosu quesu de lleche cruo de vaca nuna rueda de 5kgs.

Rei Silu. Otra maravía, un afuega'l pitu que nun ta na DOP por tar elaborao con lleche cruo de vaca. Fascinante quesu.

Acabamos la primer tanda con Tres Lleches de Pría Azul. Amiestu de 3 lleches típica de la zona de Llanes con lleche pasteurizao de cabra, oveya y vaca. Bon quesu azul.

Empezamos cola Sidra. Agora que s'avera la dómina navidiega, la idega yera prebar a palpu toles sidres brut adscrites dientro la DOP Sidra d'Asturies, esto ye, con mazana 100% y con certificáu de calidá, y puntuar les que más nos prestaren. Hubo dalguna sorpresa.

Esisten dos categoríes ellaborando Sidra Brut, granvás y champenoise. La primera realiza la segunda fermentadura de la sidra nun depósitu y la segunda na mesma botella. El segundu ye más aballador y costosu, pero tamién llogra meyores resultaos "a priori".

Pomarina. Segunda meyor clasificada. Ameyoró enforma dende la última vegada que la probemos. Ellaborada por métodu granvás, pertenez al Llagar El Gaiteru. Bon color, burbuya fina, golor a mazana y sabor intenso, un pelín pasada de gas, pero bien rica.

Poma Aurea. Del Llagar Trabanco, ellaborada por métodu granvás. Per pocu gas, paecía más bien una sidra de mesa. Nun ta mal de sabor.

EM. De llagar El Gobernador. Per debaxo en calidá dende la última vegada que la probemos.  Defeutu claru de golor a pegamentu. Ellaborada pol métodu champenoise. Decepcionó la que tendría de ser la segunda meyor sidra.

Solaya. La postrera en llegar a les brut na DOP. De llagar Quelo, con segunda fermentadura na botella (métodu champenoise). Nótase que ye la postrera en llegar ya inda-y queda munchu percorríu, pero ye bonu que se vaiga sumando ufierta a la variedá d'esplumoses.

Y acabamos con Práu Monga. La mesa foi unánime. La meyor ensin dulda de toes. Segunda fermentadura na botella pol métodu champenoise pa una sidra Brut Nature Reserva con 4 años d'ellaboración. La xoya la corona, ún de los meyores productos ellaboraos n'Asturies y a un preciu realmente algamadizu.

Siguimos cola segunda tanda de quesos asturianos. Varé Lleche Cruo, otra maravía asturiana de Varé (Sieru), primer quesu ecolóxico d'Asturies  y que ye toa una delicia na boca. Ún de los mios favoritos.

Beyos de Vaca. Quesu de la zona d'Amieva, de lleche de vaca. Suave anque más acedu que los anteriores, con una fascinante combinación ente la testura de la corteza y del interior.

Cueva Pregondón. De lleche crudo de vaca, madurecíu 7 meses nuna cueva de Gamonéu, pero ensin afumar. Quesu d'Amieva. Quesu fuerte con un toque secu, que pide a gritos sidra. Bien bonu.

Gamonéu del Monte. Nun nos afayaron l'ellaborador, pero ye un Gamonéu que sabe a Gamonéu. Buenísimo.

Casín Mary Gel. Muncho méritu que'l quesu casín aguante, yá que Casín consiguió una Denominación de Orígen cuando namás quedaba una quesería, agora afortunadamente yá son 4 y ye un quesu que sigue creciendo. Ún de los quesos más vieyos d'Europa, fechu con lleche de vaca casina y que ye puru espectáculu.

Teyedu. Quesu Cabrales de Pepe Bada de lleche cruo de vaca. Poco más qu'añedir a ún de los meyores quesos del mundu. Perfeutu, elegante. Foi'l favoritu de toos ensin dulda.

Bona compañía, lo meyor de los quesos asturianos y lo meyor de la sidra brut asturiana. Amiestu inmeyorable. Llarga vida a Toptasting y a siguir entamando munches nueches tan prestoses.