Nueva Visita: Abrelatas

Direición: Ería del Hospital, 5 - La Pola Sieru

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Anterior Visita: http://lesfarturesast.blogspot.com.es/2016/12/restaurante-abrelatas-xornaes.html
Calidá: 4/5
Preciu: 30€

Comentarios:  Yá sabéis que somos unos namoráos de Borja Alcázar yá'l so Abrelatas. Desque lo afayamos gracies a David Vilasboas de Kocima nun cansamos de dir probalo y esfrutalo. Y gústanos tou, dende la so cocina más tradicional, cola so madre Mary Lluz al mandu los fogones, hasta'l so puntu más creativu, onde Borja dexa llibre esa maraviyosa cabeza que tien.

Por cuenta de la vista de Bodega Vidas al Llagar Viuda de Angelón, xuntámonos 6 persones, neños incluyíos, a comer nel Abrelatas. Y punximos en manos de Borja, lo único que nun dexamos a la so elección foi la bébora, anque ehí tamién coincidimos.

Empezamos con un Macaron de Compota de Chorizu Asturcelta y Ablana. Esi homenaxe a Campoviejo que tanto nos presta, pero amás tirando de gochu asturcelta. Y ye que Borja ye ún de los cocineros que más apuesten por esti productu tan nuesu y que tantes allegríes nos ta dando.

Siguimos con una de les sos sorpresa d'anguaño, el so Bombón de Chocolate con Lleche y Carrillera de Gochu Asturcelta. Merecía muncho más nel Campeonatu de Pinchos d'Asturies, porque la combinación del chocolate de Jose Antonio Darriba xuntu col amenorgamientu de carrillera ye ... espectacular. Pa tomar en dos bocaos y con una presentación magnífica.

De primer platu, un Arroz con Pulpín del Pedreru de Tazones Guisáu y Crema Llixera de Pataca. Per orixinal la crema de pataca percima l'arroz, pa mi yera daqué nuevu. Debaxo, un arroz perfeuto, con un pulpu que taba increíble. Bona ración amás. Nada qu'envidiar a los nuesos meyores arroceros.

Y p'acabar, ún de los platos fuertes de la casa, la carne. Chuleta de Vaca Vieya Frisona de Sariegu. Borja mata les sos propies vaques tres años de curiar la so alimentación pa dempués vendeles nel restorán, pero nesti casu, yera d'un vecín de so de Sariegu. Espectacular.

Y nun podíamos más, asina que nun hubo postres.

Pa beber, tiramos de los productores de la mesa. Empezamos con Prau Monga Brut Nature Reserva, casi 4 años d'ellaboración pa un productu que nun tien nada qu'envidiar a los meyores caves y champagnes, y qu'en tienda nun pasa de los 8€. Burbuya fina, Golor a panadería (fantásticu) y elegancia y persistencia na boca. Una maravía que va bien con casi cualesquier cosa y qu'enxamás cansamos de beber.

Y 7 Vidas Blanco. Albarín blancu de maduración temprana. Vinu fresco del añu, que güel y sabe, y aguanta na boca. Toque de mazana y piescu y foi xenial col arroz y la carne. Mui recomendable. Tienen un CienMontañas blancu, qu'amás de too esto añede un tiempu en barrica y ta buenísimo.

Pagamos por tou 170€. Da igual que vaigas al Abrelatas a buscar cocina tradicional, o cocina creativa, que vas salir encantao. Una gociada compartir sobremesa con tanto talentu, y tanto apasionáu. Xente que llucha escontra vientu y marea para consiguir sacar alantre lo meyor de los nuesos productos: vinos, sidra, gastronomía. Distintes xeneraciones xuníes pol talentu y la pasión.

Acepta TicketsRestaurant.