Cimmeria ye la tierra natal de Conan. Ye una tierra escura, aveseda, con grandes y tétricos montes ya interminables llombes azotaes polos vientos del norte. Enllena de bárbaros y grandes guerreros arrexuntaos en tribus. Duros como la tierra onde-yos tocó vivir, pero amarradiegos y amigos de la bona cerveza.
D'esta descripción podríamos camentar que Conan ye asturianu, pero lo de que xuru sabemos, ye qu'el Cimmeria, el nuesu Cimmeria, sería la so cervecería de cabecera. Cervecería de decoración clásica (y preciosa) asitiada mui cerca del centru d'Uviéu. Cuadrada, con meses de madera, y decorada con posters de cerveces y de Conan.
Al mandu, David y María, los Cimmerios. Dos xeólogos qu'en 2012 abandonaron los sos oficios en Madrid para tornar a la so Asturies dòrixe y dedicase a la so verdadera pasión, la cerveza. Naquella dómina, xusto antes del boom de la cerveza artesano, nun había munchos llocales que se dedicaren n'esclusiva a la cerveza, asina que'l so apueste foi bien ventureru.
Entamaron con 4 cañeros de cerveza, y 150 referencies en botella. Na actualidá, tienen 10 cañeros rotativos de cerveza, y caltienen les 3 neveres con 150 botelles, que van rotando. David, amás, coleccionaba botelles de cerveza, pasión que tuvo qu'abandonar por mor del boom actual de la cerveza y a la falta d'espaciu p'almacenales ... tien unes 2000 botelles pente dellos sitios.
En 2015, David llogró la certificación BJCP (Beer Judge Certification Program), y ye una de les poques persones n'España que la tien. Una titulación qu'acredita so nivel cerveceru y capacítalu pa dar cursos de formación y prebes, amás pa ser xuez en cualesquier concursu del mundu adscritu a esta asociación americana.
Dende 2008 lleven faciendo la so propia cerveza na so casa, anque en 2015 decidieron faela a nivel profesional nes instalaciones de Cerveza Cotoya. Fozana ye una amber ale, suave, qu'entra perbien. La ilustración de la etiqueta cuerre al cargu de Pablo Marcos, ilustrador clásicu oficial de Conan de los años 80, y que-yos fixo esi regalazu.
Toos tenemos claro que la cerveza pide comida, y más cuando tomamos cerveces potentes. Amás, ye una bébora que, al tener tanta variedá d'estilos, amiesta perfectamente con cualesquier comida. Por eso, incluyeron una pequena carta d'alimentos en fríu que te van a encantar. Dende empanaes a una esbilla impresionante de quesos asturianos.
Un gran sitiu pa tomase la meyor cerveza del mundu. Y acompañalo de grandes quesos. Cuando-yos entrugues a David y María si pagó la pena'l cambéu de Xeoloxía per Cerveza, de Madrid por Asturies, nengunu de los dos dulda un segundu, y la sorrisa de prestu que-yos queda dempués diz que nun mienten.
¡Por Crom! ¡Llarga vida a Conan, David y María; y al Cimmeria!
No hay comentarios
Publicar un comentario