Nueva Visita: El Quinto

 

Señes: Av. Manuel Llaneza, 50 - Gijón/Xixón
Teléfonu: 633 094 168

Facebook: https://www.facebook.com/El-Quinto

Instagram: [@el_quinto_sabores] https://www.instagram.com/el_quinto_sabores/

Calidá: 4/5

Preciu: 35€

Anterior Visita: https://lesfarturesast.blogspot.com/2020/05/el-quinto.html

Comentarios: La versión más asturiana d'El Quinto, con un menú degustación que van tener disponible hasta marzu-abril, basáu en productu asturianu que mira'l mar, col toque esóticu habitual que-y da Mariano Mier a tolos sos platos.

Esi amiestu funcióna-y perbién al Quinto. Tas nuna vinatería de barriu, con un ambiente maraviyoso y muncha vidilla, y al empar, ta comiendo especies esótiques con productu asturianu. 30€ por persona más lo que bebas.

Nós pa beber, pidimos Fame. La cerveza ellaborada por Cerveza Cotoya pal Abrelatas, a la que punximos un granín de sable, y de la que nos sentimos bien arguyosos. Ta bien bona. El toque acedu coles especies yá'l picante que-y da Mariano a casi tolos sos platos, va xenial pa llimpiar la boca.

Empezamos con unes Anémones con Alioli Marín. Sabor puro a mar de les anémones de mar, con  un toque cruxente del rebozáu y picante. Bien riques.

Zamburiñes con Cocu y Kimchi. Pa tomar d'un bocao col caldu. Volandeiras a la plancha onde predomina'l sabor a cocu, pero siempres col toque picante presente.

Mui bona.

Navayes a la Plancha con Espluma de Lleche de Tigre. Vuelve'l sabor a cocu pero con un toque cítricu. Pol caldu, tán templaes. Nun namoraron.

Okonomiyaki. Yá conocíamos la famosa tortiella xaponesa de Mariano. Base de farina d'arroz y güevu, verdures, cámbaru y bacon. Vien con mueyu con un toque picante, y atún llamináu que se mueve col calor ya-y da un puntu espectacular al platu. Platu xenial.

Atún Coloráu, Llagostinos y Guacamole. De los favoritos de la nueche. Refrescante con un toque picante. Bien ricu.

Siumai de Corderu Xaldu con Ramen Soup y Wakame. El mio favoritu. Testures con un caldu bonísimo. El Siumai pa tomar con paliyos yá'l ramen pa beber.

Biryani Masala de Merluza del Pinchu. La merluza ta perfecta, desfaise. Perbaxo, arroz pakistaní, bien especiáu con un sabor importante de xenxibre. Ricu.

Y acabamos col Tacu de Chili Crab. Esplosión na boca. Pica, pero pica, ¿eh? Cruxente, y tamién con xenxibre. Nun namoró.

De postre, Pastel de Té Verde Xaponés y Crema d'Ablana. Un coulant de té verde rellenu de crema d'ablana con un xeláu de llimón. Bien ricu. L'ablana quéda-y xenial.

Y Cóctel de Café Expresso con Llicor 43. ¡Qué alcordances! Llicor 43. Bien ricu.

Con Fame, pagamos 73€.