El Pintu & Collacios - Sixto's

 

Señes: Calle de la Libertad, 11 - La Pola Llaviana
Teléfonu: 984 045 505

Facebook: https://www.facebook.com/El-pintu

Instagram: [@el_pintu_laviana] https://www.instagram.com/el_pintu_laviana/

SIXTO'S

Señes: C/ Muelle de Oriente, 3 - Xixón
Teléfonu: 984 290 602

Web: https://www.sixtosrestaurante.es/es/
Facebook: https://www.facebook.com/Sixtos-Restaurante/

Instagram: [@sixtosgijon] https://www.instagram.com/sixtosgijon/

Calidá: 4/5

Preciu: 40€

Anterior Visita: https://lesfarturesast.blogspot.com/2020/11/el-pintu-collacios-farragua.html

Comentarios: Nueva edición d'El Pintu & Collacios, esta vegada con más Collacios que nunca. L'invitáu especial foi Andrés Póo, cocineru y propietariu del Sixto's, anque munchos ya lo conocéis de les sos andances con los Manzano y el Tomate Bistró. Dende va unos años empecipió l'andadura en solitariu nel Sixto's, llocal en plenu centru de Xixón, con vistes al muelle deportivu, que siempre presta.

A la folixa xunieron David Montes, cocineru del grupu Manzano, Alberto Ojeda, de Confitería d'Albert, Javi Farpón, de Casa Farpón y Mai Vigil, de La Coctelería de Mai. Daqué tien el Pintu pa que se apunte tanta xente.

Llunes, Martes y Xueves col llocal a españar.

Empezamos con La Poda. Sauvignon Blanc 2018. Frutal, güel y sabe. Gustónos.

Diego empezó bien fuerte. Alcachofa Frita con Xugu de Cocíu. Ún de los meyores platos que comí n'El Pintu. Amiestu de testures, con un caldu que casi paez xelatina, con una intensidá espectacular, sabor a cocíu de la to güela y amestando col cruxente de l'alcachofa, les migues de boroña y de choscu. Espectacular.

Andrés nun se quedó tras y tráxonos la so Croqueta Cremosa de Chorizu. Pa comer 20, anque teníamos dos per cabeza. Cremoses de verdá, raspiando lo llíquidu, rebozáu perfeutu, yá'l chorizu integráu. Son nidies a pesar de lo que predicía'l chorizu.

Morciella, Pera y Pataca Afumá. Otra maraviyosa combinación de Diego. Compota de pera, morciella matachana, miel y crema de pataca con quesu San Simón ahumao. Amiestu de testures, y de picante duce. El miel y la matachana dan un contraste brutal.

Pulpu del Pedreru con Aguachile de Tomate Tostáu. Otru espectáculu, esta vegada d'Andrés. Lleva cebolla colorada, cilantru y corteza de gochu. El pulpu, perfectu. Nel so puntu. Amiestu de testures, y llixeru toque picante. Encantónos.

Camudamos al tintu, Comoloco. DO Jumilla, frescu, entra perbién.

Garbanzos, Bacaláu y Espinaques. Los callos de bacaláu de Diego son una de les coses que tenéis que probar sí o sí. Una maravía. Lleva amás xel d'alga codium y hortelana. Testura ya intensidá. Brutal.

Y acabamos col Tacu Mexicanu de Rabu de Vacunu n'adobu d'Andrés. Lleva un mueyu de "frijoles" y cebolla encurtida. Envolubrar, comer y zucar los deos. Felicidá. Bonísimo.

Inspiráu en México, Alberto propúnxonos el so Tacu Asturianu de postre. Bizcuechu de cítricos con compota de mazana, galleta d'ablana, toffee, granizáu de mazana, nuez garrapiñada y xel de mazana. Xenial. Encantónos.

Andrés animose a los postres con Cremosu Cítricu, Chocolate y Cruxente d'Ablanes. Otra maravía refrescante con un toque cruxente.

Munches rises, muncho talentu na cocina, llenazu total ... de verdá, non podéis perder El Pintu & Collacios. Una de les coses más guapes que-y pasó a la gastronomía asturiana de los últimos tiempos.