Farturruta San Xuan de Beleño-Abiegos-Sobrefoz - Casa Benigna

 

Señes: Sobrefoz - Ponga

Teléfonu: 985 843 106

Web: http://apartamentosponga.es/

Facebook: https://www.facebook.com/barcasabenignasobrefoz/

Calidá: 4/5

Preciu: 15€

Comentarios: Ponga ensin dulda ye'l paraísu por afayar, Reserva de la Biosfera dende 2018, ta llena de rincones que nin siquier conocemos los asturianos, y de pueblos que lluchen por sobrevivir calteniendo la so esencia.

Llévovos a una farturruta preciosa, de les más guapes que fixi, desconocida y onde namás cruciamos con un paisanu en tola ruta que llevaba un tueru a un sitiu onde lu pudiera recoyer col tractor. Dafechu virxe, algamadizu pa tola familia, con un pasu onde hai que tener un pocu de cuidáu si'l ríu ta crecíu, y con unes vistas espectaculares sobro dalguna de los montes más míticos d'Asturies.

A la fin, parada a comer en casa Benigna, un míticu de la gastronomía asturiana que va a encantavos. Tien amás apartamentos rurales por si queréis quedar a dormir.

Empezamos en San Xuan (de Beleñu, el dios del sol de los ástures), aparcamos casi a la fin del pueblu, nel parking del Centru d'Interpretación (que podéis visitar a la vuelta). Nesi puntu vais atopar un mapa descriptivu de la ruta, anque nós faigamos una pequenu cambéu que yá vos cuntaré.

San Xuan ye un pueblu famosu, amás de pola so guapura yá'l so centru, pol Guirria. Tradicional desfile d'antroxu que se celebra'l 1 de Xineru, onde'l Guirria, un ser metá trasgu, metá home, desfila por tol pueblu besando y achuchando a toles muyeres, echando ceniza a quien trata de torgalu, mientres lu acompañen los homes solteros del pueblu a caballu recoyendo casa per casa l'aguilandu.

Empezamos la baxada travesando'l pueblu, perbién calteníu y con cases precioses.

Empezamos a acolumbrar el Tiatordos, que va acompañanos en casi tola ruta.

El primer tramu ye de baxada escontra'l ríu Ponga, per pista formigonada. Dexamos l'antiguu llavaderu.

Mientres la mayor parte de la baxada acompáñennos la maxestuosidá del Tiatordos (1951m esquierda. "La montaña perfeuta"), en mediu la Foz de la Escalada y a la derecha, Peña Taranes (1681m), n'honor a Taranis, antiguu dios ástur de la truena. Yá xubimos dambes, pero con bocata, nun da tiempu pa faer farturruta.

Siguimos baxando, yá per pista de tierra, hasta llegar al Ríu Ponga, y atopamos esta pequena maravía de ponte cascada.

La sienda sigue por una maravía de monte llenu de castañales, con un pequenu recuestu de xubida.



Pero nel intre llanea. El desnivel total de la farturruta son 300m, bien fácil.



Volvemos baxar, y atopamos una ponte natural, que crucia'l ríu de forma soterraña.

Nesi momentu, atopamos un cartelu y tenemos que tomar una decisión: la ruta ye circular. De San Xuan dir a Sobrefoz, de Sobrefoz a Abiegos y d'Abiegos volvemos al coche a San Xuan. En total son 11Km, fáciles de faer, unes 4h a bon ritmu. Nós queríamos comer en Sobrefoz, una vegada en San Xuan, tendríamos de coyer el coche y dir a Sobrefoz. Pero queríamos facer tou caminando, polo que fiximos la ruta a la nuesa manera: fuimos hasta Abiegos, volvimos a esti puntu y xubimos a Sobrefoz a comer. Acabante comer baxamos tranquilamente pol mesmu camín a San Xuan y volvimos al coche parando a faer toles semeyes de ríos y cascaes (que lleven so tiempu). En total, camines daqué más de los 11km pero como faes parte acabante comer, faise llevaderu.

Como vos dicía, esviamos escontra Abiegos.

Al poco, una ponte de madera con esta maravía.

Yá sabéis les riegles, cuando atopéis una portiella zarrada, déxala como ta. Pero sí, vais pel camín correutu. A éstes el camín ta señalizáu en tou momentu.

Ye asina de guapu.



Y tien estes vistes.

A la fin del camín, llegáis a la carretera que xune Sobrefoz con Abiegos. Nel pueblín de Llandelestosu. Los últimos metros faense por carretera.



Dende la carretera atopáis un mirador.

Con vistes a Abiegos.

Antes de llegar, atopáis esti mini cascada.

Damos una vuelta pol pueblu. Paga la pena.

A la entrada xusto, tenéis la Casona de Merreguera, de 1742.

Una plaza bien guapa, ya inclusive chigre onde paramos a reponer fuerces.



Volvemos sobro los nuesos pasos. Podéis dir hasta Sobrefoz pela carretera, pero vos encamiento que volváis a meter pol camín qu'atopáis en Llandelestosu, y baxéis hasta l'indicador que pon a Sobrefoz. Si hasta agora la ruta foi guapa, asegúrovos que queda lo meyor.

Indicador. Sentíu Sobrefoz.

Como vos dicía, empieza lo guapo. Síguese la sienda xuntu al ríu y equí tenéis que dir con un pocu de cuidáu. Cuando fuimos nós veníamos de díes de nieve y agües y baxa el ríu bien crecíu, polo que tuvimos qu'andar un pocu ente les piedres pa siguir el camín. En condiciones normales pasáis ensin problema.

Empieza una mini xubida cola agua baxando pel camín. Cuidao colos regodones, qu'esguilen. Pa xubir y pa baxar. Recomendable cayáu.

Vamos ganando altor al ríu per un camín preciosu.

Nel intre empezamos a atopar cases, yá tamos en Sobrefoz, nos barrios de Güiles y Yanu, con casones como esta de la semeya del SXVIII.

Siguimos un cachín per carretera y llegamos a núcleu urbanu de Sobrefoz. Un pueblín bien guapu onde paga la pena perdese.

Na plaza del pueblu atopa'l nuesu destín, Casa Benigna. Un míticu de la gastronomía asturiana, qu'empezó siendo chigre-tienda y qu'agora, namás como restorán, ye ún d'esos sitios que paga la pena la visita, anque sía ensin farturruta.

Como veis, terraza guapa, y dientro zona de barra. Por un estrechu pasiellu, pasando la cocina, un comedor con 4 meses, y más tras, baxando unes escaleres un ampliu comedor. Sía comoquier, reserva que suel enllenase si vais de fin de selmana.

Pa comer carta o menú. Nós pidimos el menú: de sábadu, con 3 platos esceicionales y postre, 15€. Una maravía. Llamentable pa nós como consumidores que tengan que poner que nun se comparten menúes ... 15€, por dios.

Empezamos por Sopa de Fégadu. Bonísima. Trupa y con dalgún cachu de carne.

Y Sopa de Cocíu. Bien bona tamién.

De segundu, sí o sí, Fabada. Fecha del día. La faba, grande y de les bona, mantequilla pura na boca. Y con pota al centru para tripitir. Eso sí, a otru día seguro qu'inda taba meyor.

Col so Compangu. La morciella tira a dulce y el chorizu tien un toque picantín bien ricu. El tocín maraviyosu

Y de terceru, Cabritu. Maraviyosu. De los meyores que probemos.

Y Xabalín. Bien ricu. Amás bravu, con muncho sabor. Ambos acompañáos de pataques, con salsina y pimientos.

De normal esperamos un postre que nun tea al altor de los platos, pero nesti casu non. Tenéis que probar la so famosa Copa de Quesu los Beyos. Ye maraviyosa. El quesu los Beyos ye'l quesu ellaboráu na zona, un quesu fuerte, pero que lu faen nuna copa en forma de crema y entemécenlu, a escoyer, con Nueces y Miel o con Carambelu y Chocolate.

Con Carambelu y Chocolate.

Con Nueces y Miel. Probái los dos, faéime casu.

Comida espectacular por 15€. Con agua, vinu y casera. Y café de pucheru.

Dempués damos una vuelta pol pueblu, pa baxar la fartura.

Y volver hasta San Xuan de Beleñu pol coche.



Una de les Farturrutas más guapes qu'alcuerdu. Tienlo tou, paisaxe con dalguna de les montañes más pimpanudes d'Asturies, ríos, tabayones, pontes, pueblos preciosos, y un restorán baratísimo que paga la pena la visita namás pol menú. Va ser difícil superala.