Fame, la cerveza del Abrelatas

Llevamos muncho años reinvindicado l'amiestu de gastronomía y cerveza, salir un pocu del monopoliu del vinu pa probar coses nueves y distintes. Dalgún de los meyores restoranes del mundu yá ufierten les sos esperiencies gastronómiques coles sos propies cerveces, ellaboraes en sitios bien esclusivos, como Roca & Carbó del Celler de Can Roca y Agullons, o la fallida Inedit de Ferrán Adriá con Estrella Damm.

Equí n'Asturies, a pesar de tener grandes cerveceros, nengún cocineru animóse a crear la so propia cerveza pa introducila nos sos restoranes, hasta qu'a Borja Alcazar del Abrelatas encendióse-y la bombiella y púnxose en contactu con ún de los nuesos cerveceros más brillantes y orixinales de too'l panorama peninsular: Diego Cotoya de Cerveza Cotoya.

Dos alloriaos, caún nel so campu, con munches moliciones de mancomún y l'amor al productu llocal como nexu d'unión, coles mires de crear daqué únicu, distintu, bebible, que guste non namás a un públicu especializáu na cerveza, y amás, usando productu de cercanía. A priori daqué bien complicáu de consiguir, y que costó más d'un quebraderu de cabeza.

Lo primero yera decidir qué estilu de cerveza faer. Una cerveza gastronómica ha de tener l'abondu cuerpu p'aguantar una comida, pero ensin pasase n'alcohol pa que nun clise'l platu que vamos comer. El tragu ha de dexar ganes de siguir comiendo, y nun fartucar, pero tamién ha de quitar la sede. Asina que tres munchos alderiques, Borja y Diego decidieron a faer un estilu Saison. Otru requisitu yera que la cerveza fuera dafechu artesanal, ensin nengún tipu de conservante o aditivu añedíu.

¿Qué ye una cerveza Saison? Una cerveza con un toque cítrico y seco bien marcáu, con xeneralmente poco grau alcohólicu, un toque amargosu, refrescante, y qu'harmoniza a la perfección col cielu la boca avezáu a la sidra acedo que tenemos los asturianos. Un estilu de cerveza perdesconocío, y que si prebes, va namorate.

Les cerveces Saison yeren les típiques de les granxes na zona de Bélxica, como n'Asturies la sidra. Ensin un agua en condiciones pal consumu, la xente bebía cerveza de baxa graduación pa quitar la sede.

Pero faer una cerveza estilu saison nun yera abondu, había que potenciar esa acidez d'una manera asturiana. Y qué meyor qu'añediendo materia primo nueso, esclusivo y al empar desconocíu pa munchos asturianos. Asina surdió la idea d'añedir a la cerveza uva albarín. Cítrica y floral, apurre acidez, arume y estructura a la cerveza. Y amás, hai poca y ye complicada de consiguir. Amás, tenía que ser uva 100% asturiana.

Pa ello, falamos con Carlos Ron, director de la bodega asturiana Vitheras, pa mercar uva albarín, percotizada yá que'l vinu fechu con uva albarín blancu suel escosar les sos esistencies. En plena vendimia, y ellaborando el so famosu vinu blanco Vitheras, fuimos a Cangas a recoyer 60kg d'uva cola qu'ellaboraron la Cerveza Fame.

Yá de vuelta a la fábrica de Cotoya, hubo que despalillar la uva a mano pa evitar amargores pocu prestosos na resultancia final. Y a falta de pisada, hubo cotoyada d'uva, yá que acabamos prensando la uva con botelles de Cotoya (mientres les bebíamos, claro ta).

Anque acabamos afayando'l métodu cerveza + uva yera poco eficaz, asina que pasamos al clásicu embudu más morteru. Una vegada llográu'l mostiu, y bebida la so parte correspondiente, empezamos a ellaborar la cerveza. La ellaboración ye bien cenciella, namás precisamos agua, malta, lúpulu y lleldu. En función d'estos 4 elementos, col agua como ingrediente principal, vamos llograr ún o otru estilu de cerveza.

Primero maceramosla, pa convertir l'almidón (del amiestu d'agua con malta) n'azucre que darréu va lleldar.

Una vegada llográu'l mostiu, peneramos pa desfacer la pasta sólido del granu y entamamos la cocción. Ye nesi momentu cuando añedimos el lúpulu y darréu el mostiu d'uva albarín. El lúpulu ye l'encargáu de da-y l'amargor y arumes a la cerveza, yá'l albarín va apurrir acidez amás de la malta especial escoyida pa ello.

Una vegada cocida la cerveza, queda esfrecela y dexala nel so depósitu lleldando. Esti procesu llevó 2 meses, y dura más o menos en función del tipu de cerveza qu'ún quiera.

A finales del 2018, la cerveza yá taba llista para embotellar. Asina que de forma manual y dafechu artesana, una a una, fueron embotellando les 400 botelles que formen el primer llote de Fame. Esti procesu consta del enllenáu de la botella, del corcháu y del chapáu de caúna.

El formatu escoyíu ye de 75cl. Al ser una cerveza gastronómico ye'l más cómodu para una comida, y amás ye más elegante pa sirvir na mesa.

Dos meses de guarda, pa que la cerveza faiga la segunda fermentadura na botella (d'ende que sía necesariu poner una chapa percima'l corchu, yá que cuerre'l peligru de que los corchos salgan volando mientres el procesu) en rima (posición horizontal) y a temperatura constante de 20º.

Y por fin podemos esfrutar de FAME nes nueses meses. Una cerveza bien llograda pa ser el primer llote, con inda marxe de meyora, y que ye perfecta pa comer casi con cualesquier cosa. Formatu elegante, etiqueta sobria y bien guapa, y una cerveza que sospriende y gusta a tol mundu, perfecta pa empecipiase nos sabores más auténticos de la cerveza si namás tas acostumáu a tomar cerveza industrial.

Presentose na charra que David Montes (cocineru del Grupu Manzano) y David Castañón (yo mesmu) dimos nel Festival de Cerveza de La Felguera (ún de los meyores del Estáu) sobro Cerveza y Gastronomía, xuntu coles conserves d'AsturSabor.

Primer cerveza gastronómico asturiano, ellaborada amás con uva albarín de Cangas. Daqué nuevu y sorprendente qu'has de probar. Pel momento, namás puedes bebela nel Abrelatas, anque adulces va dir ampliando llocales onde atopala (yá ta anunciada nel menú xaponés que va faer en Mayu Los Llaureles, por casu). ¿Y tu? ¿Vas quedar son sede de fame?