Señes: El Peligru - Tinéu
Teléfonu: 985 901 109
Web: http://www.pensioncasavicente.com/
Calidá: 4/5
Preciu: 16€
Comentarios: Voi llevavos a una Farturruta preciosa y que nun ye nada conocida. Ello ye que cuando fuimos, nun cruciamos con naide pel camín. Son unos 5Kms en total, día y vuelta. Algamadiza pa tola familia y con distintos paisaxes y ambientes con unos contrastes espectaculares. Los 5kms son llevaderos, y depende del tiempu que paréis na poza y a faer semeyes, en 2h o 2h y media tenéis la ruta fecha, como muncho.
Comentarios: Voi llevavos a una Farturruta preciosa y que nun ye nada conocida. Ello ye que cuando fuimos, nun cruciamos con naide pel camín. Son unos 5Kms en total, día y vuelta. Algamadiza pa tola familia y con distintos paisaxes y ambientes con unos contrastes espectaculares. Los 5kms son llevaderos, y depende del tiempu que paréis na poza y a faer semeyes, en 2h o 2h y media tenéis la ruta fecha, como muncho.
Salimos de El Faidal, Tinéu. Un pueblu preciosu. Tienes sitiu p'aparcar a la entrada del pueblu, al pie de la ermita de San Llorienzo. Paga la pena perder un pocu de tiempu visitando'l pueblu, bien ciudao, con horros, paneres y antiguos caserones.
Xusto na zona de la ermita, atopamos un indicativu d'empiezu de la ruta.
Travesamos el Barriu de la Llencia y vamos ganando altor. Si volvéis tras, les vistes son precioses.
Pel momento, les pista ta en bon estáu ya indicada.
Tres esa baxada, atopamos un par de caserones. Cuidao porque la inercia va llevavos a siguir. Pero si vos fixáis, a la derecha, hai un cartelu qu'indica que debéis esviar a la derecha.
Equí'l cartelu.
Cuando fuimos nós, el camín taba dafechu tomao pola vexetación, sobremanera, felechos. Asina que vos encamiento calzáu qu'agarre (porque si ta moyáu, esguila) y pantalón llargu pa nun volver con dalguna cachiparra.
Sía comoquier hai camín y báxase perfectamente. Amás, al poco clarea. Esperemos qu'en curtiu vaya rozalu pa que se pueda pasar meyor.
La baxada ye espectacular, ente castañales y dalgún carbayu.
Y esto casi pel branu. Imaxináos na seronda o inclusive neváu pel hibiernu.
La baxada ye paralela al regueru de Llavadoiru, de fechu podéis ver dalguna cascada. Llega un momentu en que lo hemos de cruciar, y nun hai nenguna ponte pa faelo. Nun hai fondura, y hai piedres poles que pasar si nun queréis moyar les botes. Sía comoquier, si l'agua baxo más crecida, hai que tener cuidáu, d'ehí la importancia siempres d'unes bones botes de monte.
La sienda nun tien perda. Amás ta indicada en tou momentu.
Y vamos atopando estes preciosidaes.
Baxamos un pocu, y atopamos una mesa con un antiguu molín d'agua esbarrumbáu.
Con un panel esplicativu: “En este umbrío recodo del camino, a orillas de la Reguerina, perviven las ruinas de un antiguo molino de harina propiedad del pueblo de El Faedal. Aprovechando el caudal permante del riachuelo, los vecinos bajaban hasta aquí son sus mulas cargadas de grano para la molienda, excepto cuando la seca era tan grande que la corriente no llevaba fuerza para mover el rodezno”. Movió unes dinamos que produció la primer enerxia elléctrica d'El Faidal nos años 40 del sieglu pasáu.
Una pena que tea asina calteníu. Nun sabemos la riqueza que tenemos. Un camín algamadizu, preciosu, ensin caltener, con molinos ensin caltener y ensin aplenas espublizar. Una vergoña.
Inda se caltien la canal escavada pela que baxaba l'agua.
A unos 300m siguiendo la Regueirina, y siguiendo l'estrueldu de l'agua, atopamos cola Poza del Zaramatu. Impresionante rincón, n'absoluta soledá y arrodiáu de naturaleza virxe.
El sitiu ye daveres impresionante. Pa sentase nuna piedra y esfrutar. A la izquierda amás, tien otru molín antiguu.
Abandonamos la poza. Y siguimos la ruta. Hasta agora baxamos, asina qu'agora toca xubir. Son unos 300m de desnivel, faense llevaderos.
Y equí vien la maxa del occidente: una vegada salimos del monte de castañales y carbayos, ábrese una vista espectacular. Contraste de paisaxes increíble.
Atoparéis dellos desvios, escontra esquierda y derecha. Pero vos aconseyamos caltener la ruta y siguir hasta la torreta d'eletricidá, y ehí vais atopar la marca la ruta. A nós costónos un pocu porque fuimos probando por dellos. Asina que faéime casu.
Ye l'Altu de la Portieḷḷa, y dende ellí podéis ver los pueblinos d'alredor.
Como tamos no cimero, el camín de vuelta a El Faidal ye tou baxada.
Y con vistes bien guapes.
Llegamos a El Faidal, camudamos y garramos el coche. Nel mesmu pueblu nun hai chigre nin restorán, asina que nun queda otra que movese en busca de restorán. Pela zona tienes bonos sitios onde comer, como Casa Emburria o Casa Lula. Pero nós teníamos plan p'acabante comer (pa eso tenéis que siguir lleendo), asina que fuimos a otru de los grandes de la zona (y d'Asturies), Casa Vicente. Son 25kms en coche, pero paga la pena, pol sitiu y pol paisaxe.
Casa Vicente ta nun pueblu nomáu El Peligru (mola, eh?). Y xusto en frente tienes una escampada grande onde aparcar. Reserva, porque s'enllena. La so opción ye tomar el menú. Y cuidáu, que ye de los meyores sitios onde vas comer. Una maravía.
Según entres zona de barra.
Tien tamién una terraza, anque nun taba'l día pa ello.
Dientro, comedor grande, con una gran parrilla presidiendolo tou.
Y Loli, poques gracies, a los mandos.
Pa beber, Agua y Deva. Cerveza artesano de Tinéu.
Yá vos dicía que pa comer namás hai menú, y ello ye que nin te lo canten. Nin falta que fai, ponte en manes de Loli, que vas comer de viciu. Y si nun acabes el platu ... preparárate.
Empezamos con Chorizu y Quesu. Preguntamos si'l chorizu yera de casa, y como respuesta, traxéronnos otru platu. Empezaba'l show. Y de xacíu que yera caseru.
Traxéronnos amás un pocu de Pastel de Cabrachu.
Yéramos dos pa comer, y dixéronnos que de primeru había Pote Asturianu y Fabada, y que nos diben a traer una de cada pa que los probáramos tou.
Asina que Pote. El pote ye al estilu occidental, ensin faba y más caldosu. Bien ricu.
Y Fabada. Ricos los dos, pero pa mi gana la fabada. Con caldu más gordo, pero con una faba esceicional. La morciella tien un toque picantín, pero nidia. Bien rica.
Dícennos que si traen más (en cada pota había pa repitir 4 vegaes), asina que preguntamos que qué había de segundu, cuando nos lo dixeron, nin se mos ocurrió pidir más ... Pimientu Relleno de Carne. Bonísimo, con un rellenu abondosu pero maraviyosu de sabor, desfaise na boca. Vien con patates frites.
Y la especialidá de la casa, Parrilla. Costielles y Chorizos Criollos. Qué maravía. Les costielles desfáense. De xacíu, en cuantes ven el platu vaciase vienen a ufiertate más y casi tienes qu'insistir que tas a puntu d'españar. El chumichurri nin lo tocamos.
Tabemos a piques d'arrenunciar al postre, porque nun podíamos más, y esperábamos a ver qué había de postre pa probalo y poco más ... Cuando Loli pregúntanos qué puntu queremos pal Entrecot. ¿Perdona? ¿Entrecot? ¿Pero hai más? ¿Tamos llocos? Pos sí, había entrecot. Y qué maravía d'entrecot. Pidímoslu poco fechu, y qué gociada de carne. Parte sola. Vien acompañáu d'unes pataques frites y d'una ensalada, a los cualos arrenunciamos cortesmente.
De postre, Requesón con Freses. Y Requesón con Arándanos. Bien bonos los dos.
Tuvimos talantando tola comida cuántu costaría'l menú, porque tampoco lo pon a la entrada y nin preguntamos. Tirando por baxu diximos qu'unos 25-30 per cabeza, pero que tenía de ser un menú de 50 per cabeza tranquilamente. Bonu, pos pagamos 16€ per cabeza. YE-PEC-TA-CU-LAR. Nun esiste meyor relación calidá-preciu.
Un indispensable de la gastronomía asturiana. A éstes tien pensión tamién. Y ye llugar de camín pel camín primitivu a Santiagu. Acutái. En serio.
Había que baxar a fartura de dalguna manera, asina qu'el nuesu plan de tardi foi visitar el Carbayón de Valentín. Ta a 6kms d'El Peligru, y paga la pena la visita.
Documentado dende antes del descubrimientu d'América, envalórase que tien más de 1000 años. Non mui alto, d'unos 11m d'altor, y con unos impresionantes 11m de diámetru de tueru, ye, probablemente, el carbayu más antiguu d'Asturies. Declaráu Monumentu Natural en 1995, y Árbol Xigante en 2008.
Un sitiu máxicu al que lu construyeron alredor una capiya, una panera y un palaciu.
Como véis, una Farturruta maraviyosa: sitios máxicos, tabayones, apenes conocida, con un templu de la cocina tradicional y ún de los árboles más antiguos d'Europa. ¡Qué suerte tenemos n'Asturies y qué poco la conocemos!
No hay comentarios
Publicar un comentario