Farragua - Eseteveinte - Cabo Busto - David Remartinez - Alejandro Tuero

 

Señes: Calle Contracay, 3 - Xixón

Teléfonu: 984 197 904

Web: http://farraguarestaurante.es/

Facebook: https://www.facebook.com/Farragua-Restaurante/
Instagram: [@farraguarestaurante] https://www.instagram.com/farraguarestaurante/

Calidá: 4/5

Preciu: 45€

Comentarios: Nueches especiales que paga la pena viviles. Resulta que fai 1 añu Manu del Eseteveinte xuntó nel so antiguu local a Ricardo de Farragua, David Remartinez (el nuesu periodista gastronómicu favoritu), Johny de Pastelería Cabo Busto y Alejandro Tuero del Kraken.

Repitieron esperiencia, pero camudando d'escenariu al Farragua,  asina qu'averamos tres la gran esperiencia n'El Pintu & Collacios onde quedamos namoraos de Ricardo y la so cocina.

Los vinos corrieron al cargu de Nacho Álvarez de Ná Vinos Chulos, que s'afixo perfeutamente (y nun foi nada fácil) a les esixencies de cada platu. Empezamos con un Fino sherry Señorita Irene. Empezamos fuerte, pero los platos pedíanlo. Finu correctu, conteníu, qu'entra solo.

Ricardo tráxonos les sos Migues a la Remartinez. Un amiestu de les migues estremeñes, tierra de Ricardo, coles migues aragoneses, tierra de David. Caldu d'oreya de gochu, llonganiza, cruxente de pataca, uva ... Intensu, con un caldu maraviyoso. Bien bonu.

A esto, David Remartinez, espertu panero según cuntó na so Puta Gastronomía (que tuvi l'honor de presentar), ellaboró'l pan pa la cena. Bien bonu.

Ún de los favoritos de la nueche, Escabeche de Cítricos con Moxón abiertu al Vapor. Esplosión de cítricos na boca, con amiestu de testures. Enfresca, llimpia, y pide más. Los moxones, bien bonos.

Manu tráxonos el so Rollu de Corvina con Ensaladilla d'Algues y Esplumosos de Lleche de Tigre. Quiciabes l'orde col anterior platu nun foi'l adecuao, inda siguíamos col cítricu anterior. Delles testures y toque picante de la lleche de tigre.

Camudamos al champagne, Etienne Calsac L’échappée Belle Blanc de Blancs Premier Cru. Chardonnay, güel y sabe, encantónos. Equilibráu.

La maravía de la nueche. Alcachofa Frita con Caldu amenorgáu de tendones y Rabu de Toru. Espectacular l'amiestu de testures y sabores. L'alcachofa brutal, cruxente ya intensa. El caldu impresionante, pura xelatina. Pero tou n'harmonía. Espectáculu.

Escudella Trufada. Con zusmiu de pucheru. La escudella vien como un ravioli rellenu de carne. Otru xuegu de testures y sabores. Bien ricu.



Siguimos con otra de les maravíes de la nueche, Merluza al Vapor con Kale y Mueyu Cítricu. El mueyu lleva estragón, col frita, cebolla, llima, menta, cilantru, un toque de xalapeñu y caldu de la mesma merluza. Vien amás acompañáu con kale. La merluza ta casi cruda, pero suavísima. Platazu.

Camudamos al tintu. Marta Maté 2014. Ribera. Clásicu. Gustónos.  Y tomámoslu col Xabalín en 2 Testures: Sollombu y Paletiya. El sollombu namás marcáu y la paletiya desgüesada. Vien con castaña y chirivia. Ricu, anque ta templáu.

Pa los postres cuntamos con dos grandes: Jhonatan de Cabu Bustu y Alex del Kraken. Amás, camudamos al Collantes Los Cuartillos. Un moscatel avieyáu dos años más de lo nornal con un toque afumáu.

Jhonatan propúnxonos el so Profiterol Glaseáu de Freses con Fruta de la Pasión y Llima. Ganache montada de Chocolate Blancu y Vainilla. Mermelada de Frutos Coloraos casera pa dar un toque duce, y Crema de Vainilla. Espectacular. Ensin palabres.

Pal segundu postre, Castillo de Guzmán. Goliosu. Un amontilláu de 18 graos. Gustónos enforma.

Tomámoslu con un Bombón de Chocolate Blanco, Yuzu, Praliné d'Ablana. Bañáu en xarabe de cítricos y xinebra. Otra maravía.

Tol menú cola bébora, 45€. Gran nueche, munches rises, perbon rollu, y muncho talentu na cocina.