Vinoteo: Carnes del Mundo

Señes: C/Campoamor, Nº 29 - Uviéu /Oviedo
Teléfonu: 984 081 696

Web: http://vinoteo.com/
Facebook: https://es-es.facebook.com/vinoteo
Twitter: [@vinoteo] https://twitter.com/vinoteo
Instagram: [@vinoteooviedo] https://www.instagram.com/vinoteooviedo/

Tornó la cata más estravagante del Vinoteo, onde nos presenten carnes rares que difícilmente podemos algamar. Como siempres, nun ambiente prestosu, didáuticu y acompañándolo d'una bodega de vinos.

Na parte los vinos, cuntamos cola presencia de Pedro Iglesias, delegáu n'Asturies de Bodegas Ébano, Ribera del Duero, que nun conocíamos y prestónos. Lleva poco tiempu nel mercáu. La bodega ta en Valladolid, pero tienen los sos viñeos na zona de Burgos, amás, namás trabayen con viñeos propios.

Empezamos bebiendo Ébano 6. Un vinu fresco, para chatear, ensin más pretensiones. 4 meses en barrica de carbayu francés y procedente de los sos viñeos n'espaldera.

Con él, presentáronnos la carne de Cocodrilu. Direutamente dende Zimbabwe. Toles carnes presentenles en pequenos cachos y ensin sal pa que podamos apreciar meyor el so sabor. Cocodrilu ye una carne con apariencia y testura de pechuga de pitu, que nun sabe prácticamente, anque si la dexes un tiempu en boca, dexa un regustu a pexe blancu, inclusive dalgunos dicíen pixín. Ensin apenes sabor.

Dempués, Camellu.  D'África. Carne con apariencia de xata, pero testura bien dura, foi la que menos nos prestó de toes. Tien un llixeru toque a fégadu a la fin.

Camudamos de vinu, Ébano Salvaje. 14 meses en barriques nueves de carbayu francés, procedente de los sos viñeos más antiguos. Toques a vainilla, inclusive a cacáu. Gustónos muncho más que l'anterior.

Probémoslu con Canguru. Importante sabor a fégadu, con un puntu amariscáu. Bona testura. Foi nuesa carne favorita de la nueche.

La última carne exótico foi la Cebra. De Suráfrica. Tien un sabor ente la trucha yá'l foie, pero bien nidiu. Gustónos.

Y acabamos la cata de carnes probando un güevu d'Avestruz. Equival a unos 12-14 güevos de pita normal, polo que se debe tomar ente delles persones.

Acompañáu de picadiellu caseru.

Y pataques frites. Felicidá.

Como siempres, el Vinoteo ufiértanos coses distintes, gayoleres y coles que pasar una tarde/nueche esfrutando de la gastronomía. Pel hibiernu y llenazu, como siempres.