Nueva Visita: Kocima

Señes: Calle Independencia, 31 - Uviéu/Oviedo

Teléfonu: 984 180 707

Aconseyamos: Menú Degustación

Calidá: 4/5
Preciu: 40€

Web: http://www.kocima.es/
Facebook: https://www.facebook.com/kocimaoviedo/
Intagram: [@kocima_seleccion] https://www.instagram.com/kocima_seleccion/

Anterior Visita: http://lesfarturesast.blogspot.com/2017/09/nueva-visita-kocima.html

Comentarios: Tres un tiempu ensin probar el Menú de Kocima, decidimos volver pa comprobar que tou siguía n'orde. Y asina foi. Recuérdovos el conceutu pa los que nun lo conozáis. Kocima nació como una tienda gourmet na Cai Independencia (al altor del Gloria o La Taberna del Zurdo), pero dende va un tiempu, introdució como novedá un menú degustación pa 4-6 persones máximu a 40€ ensin bébora. Acutes con 48h d'antelación, y Guillermo prepárate un menú degustación que va prestate.

Amás de la so calidá como cocineru, y de lo muncho que vas esfrutar cola so cocina, el gran atractivu de la esperiencia ye comer en completa intimidá na tienda, ensin naide más. L'otru gran atractivu  ye que, dafechu, tolo que cocina Guillermo lleva daqué de chocolate. Munches vegaes ye prácticamente imperceptible, pero parte del xuegu de la comida ye aldovinar onde ta'l toque.

Pa beber, tu decides. O lleves la to bébora de casa y cóbrente el pequenu serviciu por caltenela fría y sirvila; o decides ente la ufierta de vinu, sidra o cerveza qu'hai nel local.

Cenamos 3 persones, y como ún d'ellos yera Borja del Abrelatas, llevamos Monticu como pa una boda pa esfrutar la cena. Empezamos con una Tabla de Quesos. Comte, Cheddar, Olavidia y Fuente Saúco. Acompañenla amás de Mermelada de Kivi, Plátanu, Vainilla y Chocolate; Mermelada de Pimientos con Cayena y Chocolate y Mermelada de Cebolla, Zusmiu de Carne, Vinu Tintu y Cacáu. Les tres mermelaes bien bones, pero ganó la de Kivi, espectacular. Como veis, tabla abondosa, con quesazos. El mio encamientu ye que moderéis si queréis llegar a la fin de la cena.

Acompañen la tabla de quesos con un Lingote de Foie con Praliné d'Almendres, Chocolate con Lleche, Crema de Cacagüés, Polvu de Macarons y Sal Negro y Afumao. De lo meyor de la cena. Buenísimo. La combinación de foie con chocolate y almendra, yá sabemos que queda xenial; pero amás el toque cruxente que-y da'l sal, encantónos. Bona ración amás.

Sicasí, el que menos trunfó fueron les Croquetes con una Llixera Bexamel y Chocolate blancu. Riques y cruxentes, eso sí.

Callos guisaos, con Chipotle y chocolate al 80%. Con xamón. Picantes, bien picantes. Pero pregúntanos antes y pidímoslos asina. Entá con tou, Guillermo tráinos más picante por si quedamos con ganes de más, pero asegurovos que non. Buenísimos.

Fora de menú, tráxonos a probar un Pichón con verdures. Les verduras son Trigueros, Cogordes y Oreyones. Bien bonu, amiestu de dulce de los oreyones yá'l mueyu (con toque de chocolate al 90%) cola intensidá del Pichón.

Yá tábamos a puntu d'españar ... Clásicu al Arroz con Rabu Desgüesáu. Quiciabes sía'l platu onde más se nota'l chocolate. Arroz con caldu de carne y chocolate al 99%, con polvu de cogordes. Arroz perfeuto, y una intensidá de platu p'ablucar. Espectacular. El mio platu favoritu de la nueche.

Acabamos los platos colos sos Calamares de Potera. Guisu tradicional, y nel mueyu un pocu de chocolate con praliné. Calamares perfectos. Con yema de güevu al centru y un pocu d'espirulina. Tou pa entemecer y comer. Buenísimo.

El postre encántame. Semiesfera de chocolate con Nocinarcea. Crema inglesa con NociNarcea (tenéis que probala, ye espectacular), chocolate con lleche y xelatina. El núcleu ye un bombón de cremosu de chocolate. Asina que tas comiendo esa testura nidia y maraviyosa y nel centru atopes un bombón ... buenísímo. Vien con una galleta de chocolate, al estilu les moscovitas y una base de galleta espolvoriscada.

Una esperiencia única, que paga enforma la pena, cola posibilidá de llevar la to propia bébora, y d'esfrutar d'un menu a un gran nivel por 40€. Encántanos Kocima.