Abrelatas: Cena de Nuechevieya

Señes: Ería del Hospital, 5 - La Pola Sieru

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Anterior Visita: https://lesfarturesast.blogspot.com/2019/08/nueva-visita-abrelatas.html
Calidá: 5/5
Preciu: 75€

Comentarios:  Nuechevieya de normal ye'l día menos indicáu pa la escelencia gastronómica, ye un día pa celebrar y salir de folixa. Llevo unos cuantos años cenando fuera esi día, ensin cotillón, y amás de lo complicao que resulta atopar un restorán que cumpla les condiciones (de normal suelen añedir cotillón), tienen los precios perelevaos (dafechu xustificáu por ser un día festivu) y nun paga la pena tocantes a relación calidá-preciu.

Hasta anguaño, que fuimos al Abrelatas.

Llocal a españar, ambiente folixeru, continuu trasiegu de platos y ... tou perfectu! La marca la casa ye'l productu asturianu y cumplió, demostrando una vegada más que los nuesos productos afaen a cualesquier tipu de cocina y situación.

Empezamos con una Mantequilla Artesana de Sariegu esbatuyada con Almíbar. Nidia y con esi toque cítricu necesariu. Hubo que contenese, porque col pan ...

Pa beber, Dpieiga Branco. Albarín blancu pa un vinu que llinda con Asturies que comparte la so uva (anque por temes de territoriu, nun puede tar na DOP Cangas). Acidez, pero ensin romper l'equilibriu. Un vinu cítrico y sabroso. Gustóme.

Gamba Roxa Cocida con Mayonesa Cítrica. Gamba roxa d'Huelva. Con un toque de sal percima, y mayonesa si quies p'acompañar.

Con esa calidá de gamba ... nin toqué la mayonesa. Bonísimes.

Bombón de Chocolate con Lleche y Carrillera de Gochu Asturcelta Guisada al Porto. Ún de los clásicos de la casa qu'enxamás cansaremos de comer. Empezamos pol culu del gochín y acabes comiendo la cabeza, onde'l contraste de chocolate y carrillera ye más intensu. Una maravía.

Sopa de Mariscos del Cantábricu. Toque picante, bona testura y bon condimento. Camudamos y entramos un pocu en calor.

Pulpín del Pedreru de Tazones Guisadino con Ensaladilla de Pataca y Pimentón de la Vera, Tocín Ibéricu Joselito y Crema de Pataca. Otru clásicu de la casa, llenu de contrastes y testures. La suavidá de la pataca, el picante del pimentón y l'intensidá del pulpín. Sabrosu, con un pulpu maraviyosu.

Merluza del Pinchu de Cuideiru con Salpicón de Chatka. Primer vegada que la pruebo n'Abrelatas y quedé dafechu namoráu. Merluza perfecta, desfaise, sabe, y amás apurre'l cruxente de la piel. Yá un salpicón con cámbaru rusu que da un sabor buenísimo. Xenial.

Camudamos al tintu, La Fanfarria Tintu. Frescu, con Mencía y Albarín Negru. El vinu nuevo de la bodega con una rcp bien bona.

Sollombu de Vaca Vieya Asturiana de los Valles de Sariegu maridáu con Espárragu Blanco a la Crema. Vaca de 20 años, cuidada y engordada pol mesmu Borja yá'l so güelu, con una intensidá de sabor espectacular y al empar una suavidá na boca bien xugosa. Espectacular.

De postre, Tarta Fina de Turrón Blanco. Soi un fanáticu d'esa tarta ... maravíame.

Tomámoslo cola maraviyosa Diamantes de Hielo. Sidra de Xelu de Viuda de Angelón. Equilibrada, intensa y ... perfecta.

Conozo perpoques maneres meyores d'empezar l'añu. Pero yo que tu probaba la esperiencia Abrelatas en cuanto pudiera.