Aniversariu Latiza Gastrobar

Señes: Calle Aurelio Martínez, 7 - Ḷḷuarca
Teléfonu: 618 030 273



Facebook: https://www.facebook.com/GASTROBARLATIZA
Instagram: [@latizagastro] https://www.instagram.com/latizagastro/

Comentarios: Faltábanos un sitiu de referencia nel centru Ḷḷuarca, gayoleru, en plenu centru, qu'alloñe de los clásicos turísticos y qu'ufiertara una cocina distinta col productu asturianu de base. Y asina, nel so sestu aniversariu, conocimos Latiza.

Latiza esisti gracies a Beatriz y Luis, que va seis años entamaron l'aventura de crear el so propiu gastrobar, partiendo siempres del productu que puedes atopar en Ḷḷuarca. Bona ufierta de vinos, incluyíos asturianos, tamién curiando la selección de cerveces asturianes.

Según entres, zona de barra allargada, con dalguna mesa alta pa picar y esfrutar tomando daqué. Ya'l fondu, zona de restorán, con lluz sele, meses pequenes ya íntimu. Ta decoráu con muncho gustu.

Pa una celebración tan especial, tiraron d'amigos, y cuntaron cola presencia de Juan d'Apiñón Bistró, Jhonatan de Cabo Busto y Angela de Baiba Café.  Nivelazu increíble d'invitaos que nos fixeron esfrutar una nueche maraviyosa en plenu occidente asturianu.

Empezamos con un platu de Latiza.  Ceviche de Saramollete. Con caldu de carne, un puntu d'alfabaca, vinagre balsámicu blancu y wakame. Refrescante. Bien ricu, y con esa intensidá de sabor que da'l saramollete.

Juampi presentónos el so Dimsun de Verdures con Ensalada de Violeta, Berenxena Afumada y Cuayada de Sésamu. Pa comer cola mano. Templáu. Un saltiáu de verduras, con un toque cruxente y con un toque importante d'aceituna negra. Bien ricu.

Volvimos a Latiza con unes Ortiguilles de Mar, Mermelada de Tomate y Llima. Les ortiguilles son anémones que se suelen comer rebozaes y frites, y tán bien bones. Cruxentes per fora y con un sabor a mar impresionante. En Latiza rebozanles con maíz con pipes. Y si entemeces el sabor intenso a mar, col dulzor del mueyu de tomate y, amás, añedes unos peta-zetes, consigues un platu con una intensidá brutal, un xuegu de testures xenial y mui gayoleru. Encantónos.

Tamos a metá de menú, y apaecieron Jhonatan y María, de Cabo Busto, pa ufiertanos el so Cortante de Cítricos y Llácteos. Dos bizcuechos de yogur, ún en cada estremu, pa xuntalos con tolo qu'hai en mediu y esfrutar d'un sabor a yogur increíble con toques cítricos de la xelatina la llima. Bonísimo.

Los que vivimos n'Avilés sabemos del Gyros de Galiana, que tantes vueltes a casa allegrónos de madrugada, con esa bomba nel estómagu tres innumberables cacharros. Juampi, que tamién lo conoció bien, quixo fae-y una homenax nel so Gyros de Panceta. Panceta cocinada 48h a baxa temperatura, un toque de menta, cilantro, soya y ayu. Bien bonu.

Gurupo, Xarda n'Escabeche y Cebolla Confitada.  Yá sabéis qu'el gurupu ye un platu típicu vaqueiru de la zona occidental. Les sobres del pote entemecíes con farina de maíz y echábase-y un pocu de panceta (cuando había). Equí Luis homenaxa al so padre y entemez el gurupu cola potencia d'una xarda n'escabeche y adulzala con una cebolla caramelizada. Contraste de sabores ya intensidá brutal. Buenísimo.

Volvió Apilón Bistró col so Ástur-Thai. Costiella a baxa temperatura, curry, camarón y fideos d'arroz fritu. Vien envueltu nuna fueya de verdura. Intensidá pura.

Si los platos de la cena tuvieron a perbon nivel, lo de los postres de Jhonatan yá foi d'otru mundiu. Impresionante'l talentu de Cabu Bustu. Yá tábamos llenos, pero nun sobró nada en platu.

Empezamos con Pasión - Carambelu - Ablana. Una maravía. Presentación, sabor, testures ... Un postre onde gana l'ablana yá'l sabor a carambelu, con un gran bombón rellenu de mousse d'ablana crua con chocolate dientro ... pa comer 10 siguíos.

Y Tarta de Freses y Nata a la nuesa manera. Un versión ameyorada del clásicu. Lleva bizcuechu con aceite d'oliva, panacota de nata montada, freses saltiáes con zusmiu de llimón, vinagre balsámicu de módena. Encamienten romper y entemez tou. Ye dafechu maraviyosu. Perfeutu.

P'acabar, Ángela, de Baiba Café, preparónos un Slow Coffee. Esperta en cafés especialidá, fíxonos un café namás infusionáu, bono de beber, con un toque acedu, bien ricu.

Preparó amás un Té afumáu pa les persones que nun s'animaron col café.

Pa beber, punximos en manos de Mon, de Mesón el Centru, compañeros de mesa, y bebimos Juan Gil 2016. Jumilla. Buenísimo, potente, con toque acedu y qu'acaba duce. Encantónos.

Xunta d'amigos, con muncho talentu, pa presentanos un sitiu con muncho que dicir nel occidente asturianu. Merez la pena la visita.