Nun ye fácil axuntar toles condiciones pa vivir nel paraísu, pero si daquién les cumple, ési ye Sobrescobiu. Conceyu pequenu y perbién comunicáu (a namás 40min del centru), allugáu na zona centro-oriental d'Asturies, en plenu parque natural de Redes, declaráu pola UNESCO, reserva la biosfera.
Coronáu por dalguna de los montes más pimpanos y preciosos d'Asturies, como'l Retriñón (1862m), la sierra'l Crespón col Corbellosu (1282m) a la cabeza, la Xamoca (1283m) o'l Cuitu Santibañez (o Picu Cuchu, 1648m). Bañáu pel Ríu Nalón, ya ún de los sos principales afluentes, l'Alba; llenu de tabayones y regatos que conflúin nel banzáu de Ruseco, una de les maravíes teunolóxiques d'integración home-naturaleza, que tenemos n'Asturies.
Nun llega a 1000 vecinos, pero los coyanes, qu'asina nomen a los sos habitantes, saben bien lo que ye sentise importantes, pos les sos agües rieguen y quiten la sede a casi'l 80% de los habitantes d'Asturies. Un pueblu solidariu, que tuvo que dexar parte de les sos tierres pa ser el grifu de casi 1 millón d'asturianos. La so hestoria recuérdanos el calter de los coyanes, yá qu'en 1565, Pedro Díaz del Prado de Ruseco y Diego Fernández de Llaínes, alleguen a Uviéu, en nome de tolos vecinos del conceyu a una puya pública pa la compra del conceyu, que yera propiedá de la orde de Santiago; y ganaron la puya.
Por toos estos motivos, y munchos más que vas tener qu'afayar, Sobrescobiu foi declaráu Pueblu Exemplar d'Asturies nel añu 2009. Naturaleza, solidaridá, turismu, teunoloxía y tradición en perfecto amiestu.
Esa cultura d'amor a l'agua, de respetu pola naturaleza, y de solidaridá ente los sos vecinos yá'l restu d'asturianos, según la creación del Parque Natural de Redes, que'l so principal cometíu ye'l caltenimientu de la naturaleza de la zona, consiguió que Rusecu albergue dende 2002 la Casa de l'Agua. Un homenaxe a l'agua, que cunta colos conteníos del pabellón d'España na Expo de Zaragoza de 2008, y que d'una forma bien didáctica, pensando en tolos públicos, esplica tolos usos posibles de l'agua.
Agora quieren dar un pasu más allá y preséntennos el so Manantial de Comillera. Un manantial asitiáu xusto enriba del parque industrial del Conceyu y perfeutu pa la so esplotación nuna planta embotelladora por cuenta la escelente calidá de la so agua. Según los analises efectuaos pol Institutu Xeolóxicu y Mineru d'España, y diversos llaboratorios independientes, l'agua del manantial ye de mineralización mui débil y blanda, lo que dexa catalogala como agua premium.
Siempres lleemos sobro agües cares y esclusives de los llugares más recónditos y exóticos del mundu, dende les isles Fiji hasta los alpes franceses. Sobrescobiu yá'l so manantial de Comillera entren nesa categoría y son capaces d'ufiertar una esplotación por gravedá, sostenible y ensin impactu pa ún de los llugares más idílicos del mundu, el Parque Natural de Redes.
Les posibilidaes qu'ufierta nel mercáu un agua d'esta calidá, y la falta d'agües d'esti tipu n'España, faen de Sobrescobiu'l llugar perfectu pa esta inversión. Un pueblu que fixo de l'agua parte del so ser, y que quier compartir col restu del mundu la so pasión pol nuesu llíquidu más preciáu.
¿Anímeste a conocelo?
Quita la to sede de paraísu en Sobrescobiu.
Pd: Y pa comer ... https://lesfarturesast.blogspot.com/2019/09/la-casona-de-rioseco.html
No hay comentarios
Publicar un comentario