Vinu y Cachopu - Marimorena

Señes: Calle Jovellanos, Nº8, Oviedo / Uviéu

Teléfonu: 985 203 606

Web: https://lamarymorena.com/
Facebook: https://www.facebook.com/lamarimorena/
Instagram: [@lamarymorenaoviedo] https://www.instagram.com/lamarymorenaoviedo/

Anterior Visita: https://lesfarturesast.blogspot.com/2019/01/nueva-visita-la-mar-y-morena.html

Comentarios: ¿Tu con qué comes el cachopu? Foi la entruga que nos fixo David Fernández-Prada al poco de sentanos en La Marimorena, y la respuesta foi casi unánime, o con sidra natural o con vinu tinto.

Yá sospriende abondo a los non asturianos que tomemos cachopu con sidra natural (y depués cuando lo prueben, entiéndenlo perfectamente), pero'l xuegu diba más allá pa sosprendenos a los mesmos asturianos con productos que, a priori, nun casen, mariden, harmonicen, o como queráis llamalo.

La idea yera probar 4 vinos y 2 cachopos. 2 vinos con cada cachopu. Y foi un esperimentu que prestó enforma.

Empezamos col so Cachopu Primitivu. El cachopu ganador del concursu en 2017. Xenial presentación, bien cuidada, pa un cachopu rebozáu con farina de trigu y rellenu de quesu azul La Peral y xamón de Gochu Astur-Celta. Predomina'l sabor a quesu azul. Vien acompañao d'una guarnición de puré de pataques con un toque de mantequilla y una llechuga.

Y lo probemos con Raventós i Blanc de Nit Reserva Brut Rosat 2016. Color llixeramente arrosáu, bien frescu y con sabor a fruta . Ta ricu.

Siguimos con La Val 2012. Albariño lleldáu en barrica. Cítricu, mineral, secu. Un albariño más complexu que los que tamos acostumaos a tomar. Tamién gustó.

Camudamos de cachopu, Asturies, d'Occidente a Oriente. Cachopu ganador del concursu en 2018. Cachopu bien orixinal con doble rebozáu, la metá con pan d'escanda y l'otra con pan de maíz. De rellenu, una crema entemez de trés quesos: Gamonéu, Afuega'l Pitu Atroxáu y Taramundi con Nueces. Vien amás con un poco de puerru pa da-y xugosidá y xamón afumáu de Tinéu.

Probámoslu con dos tintos, Habla del Silencio. Vinu más que conocíu, facilón .

Y con el mio favoritu de la nueche, Arnegui Reserva 2013. Un Rioja clásicu, que cumple perfectamente y que con carnes como'l cachopu va perfectu.

A la fin, alderique interesante. L'amiestu ganador pal públicu foi'l cachopu col cava. Ablucante, pero reconfortante. Daqué de gas y que llimpie la boca gústanos, quiciabes pola alcordanza a tomalo con sidra, quiciabes porque tamos abriendo a otros sabores y dexando tras los clásicos. Sía comoquier, estos xuegos siempres tán xenial, pa reafitase nos gustos d'ún, o pa probar coses nueves.