Farturruta: Cascada de Méxica - La Cueva'l Pimpano - El Torneiro

Señes: Calle El Ensanche, 1 - 33717 - Villayón
Teléfonu: 985 625 275

Web: http://www.eltorneiro.es/
Facebook: https://www.facebook.com/eltorneiro/
Instagram: [@eltorneiro.2017] https://www.instagram.com/eltorneiro.2017/



Aconseyamos: Repollu Rellenu.

Calidá: 4/5

Preciu: 15€

Comentarios: En 2014 inauguramos la Sección Farturrutes caminando a les Cascaes d'Oneta y comiendo nel Torneiro. 5 años dempués volvemos pa que conozáis otra Cascada que merez enforma la pena, pero ensin camudar de chigre. El Torneiro prestános pola vida.

La ruta a la Cascada de Méxica ye una ruta bien fácil, de 4Km (día y vuelta) y que puede faer tola familia. Sale del pueblu de Ponticiella, un pueblu bien guapu, iguáu, y con paneres interesaes. El sitiu perfectu p'aparcar ye na Ilesia, construyida al pie d'un preciosu Texu, y con unes vistes al valle precioses.



Traviésase'l pueblu, pasando per una fonte, anque ye un trayectu tan pequenu que nun fai falta llevar agua. Les indicaciones son clares y la perda ye imposible.



Pasáu'l pueblu, y con vistes sobro'l campu santu yá'l valle, atopamos una bifurcación, con un cartelu indicando la cascada escontra la esquierda. El camín recordónos enforma a los accesos a la sablera Barayu. Espacios abiertos, ocalitos (tristemente) y una baxada continua pol valle.

A metá de camín, atopes esti preciosu camín empedráu ente árboles.

Siguimos baxando, y empices a oyer el rumor de la cascada. Ta un pocu escondida, anque bien indicada, y con accesu fácil. Cuando llegues pescancies lo espectacular que ye, con una cayida d'unos 10m, y baxando más, pequenos tabayones que-y dan una visión espectacular. Tien un espaciu planu perfectu pa folgar, comer, o inclusive, bañase.

La cascada de Méxica tien acomuñada una lleenda bien antigua. Cunta la Lleenda que, debaxo l'agua, hai un palaciu d'oru. Ellí vivía un rei moru (moru n'acepción de paganu, non d'árabe), que tenía dos fíes. Un príncipe foi a cortexales y enoxáronse les dos fíes ente sí. Una d'elles cortó-y la melena a la otra y cúntase que'l saltu d'agua, la cascada, ye esa melena.

Paga la pena la visita. A la vuelta, el mesmu camín pero cuesta arriba. El desnivel ye de 300m en namás 2Kms, pero ye llevaderu. Va xubiendo adulces ensin problema.

Volvemos al pueblu y antes de volver a Villayón, paramos en La Cueva'l Pímpano. Ta'l pueblu de Busmente, y tien un pequenu apartaderu onde entren dos o tres coches na carreterra. Aparca, y nel intre atopes con un antiguu molín preciosu, qu'inda funciona.

Pímpano en llingua asturiana, amás de daqué bien bonu, o bien ricu (un alimentu), significa qu'una fonte (o cascada) cuerre gota a gota. Y esti ye'l casu de la Cueva'l Pímpano, una cortina continua d'agua mientres tol añu percima d'una pequena cueva faciendo un paisaxe espectacular, arcu la vieya incluyíu.

Pa llegar, una pequena cuesta d'apenes 300m hasta llegar a la Cueva. Impresionante.

Vuelta al coche y parada en Busmente a visitar esta impresionante panera. Dar les gracies a la familia que nos dexó entrar y fotografiala.

Volvemos a Villayón (2Kms). Comemos n'El Torneiro. Un hotel rural con restorán, que nos encanta. Menú con dellos primeros y segundos por namás 15€, de fin de selmana. Espectacular.

Si tienen, de primeru, has de probar el Repollu Rellenu. Ye una maravía.  Indispensable. Nidiu, con bexamel, carne picao, pimientu y espárragu. Buenísimo.

Tamién teníen pote, y son bien famosos por él.

De segundu, pidimos Cabritín Guisáu. Nidiu, desfaise, buenísimo.

Y Cachopu de Llombu. Bien ricu tamién, anque gana'l cabritín.

De postres, un Flan Caseru. Bien bonu.

Y Arroz con Lleche. Bien ricu.

Tou esto, con vinu la casa, agua y cafés, UN FIN DE SELMANA, y con estes vistas, por namás 15€. Impagable. Acutái, que suel tar llenu. ¿Merez o nun merez la pena Villayón?