Publicidá

Blog Archive

Contact Me

Nombre

Correo electrónico

Mensaje

Hover Setting

default

Abrelatas - Sibaritastur - Vinos de Vinoteca vs Vinos de Supermercáu

Teléfonu: 984 182 245


Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas


Web: http://sibaritastur.blogspot.com/
Facebook: https://www.facebook.com/sibaritastur/
Twitter: [@sibaritastur] https://twitter.com/sibaritastur
Instagram: [@sibaritastur] https://www.instagram.com/sibaritastur/


Comentarios:  Jorge Sibaritastur lleva más de 10 años falando de vinos n'Asturies. Ensin dulda, ye ún de los nuesos mayores espertos, que se vio confirmáu, amás, va unos años, col llogru de la certificación de Nivel 3 en Vinos WSET. Nun hai munches persones que la tengan.


Xube un vinu a la so web cada 3 díes (como Les Fartures coles sos cróniques),  asina qu'imaxináivos el bagaxe que lleva enriba. Fala ensin pelos na llingua, pero con muncho conocencia de causa. Y nun-y gusta la cerveza, dalgún defectu tenía que tener ...


Con estes premises averamos al Abrelatas, como yá sabéis, ún de los nuesos restoranes favoritos, a ponenos nes manes de Jorge nuna preba distinta, didáutica y participativa. La idea yera bien senciella, confrontar vinos de Vinoteca con Vinos de Supermercáu, coles mires de desmitificar les vinotecas como sitios elitistes pa xente rico. A priori, mercamos casi tolos vinos los supermercaos, anque a la fin, a pesar de tener más ufierta, estos solu vienden 5 o 6 DOPs, y ye bien complicáu escoyer un vinu bono ente tanta ufierta. Na vinoteca, la conocencia del vinu ye mayor, les posibilidaes de probar coses distintes tamién y los precios afaen al bolsu de caún.


Tres una introducción al mundu del vinu, falándonos de la so ellaboración, de les sos viñes, de les meyores zones y espelleyando per ciertes DOPs, empezamos la preba dafechu. Y ficímoslo probando un vinu d'amuesa pa marcar los tempos. Un 7 Vidas Tintu DOP Cangas. Frescu. Ácidu. Bien ricu. El vinu básico de la bodega, con un preciu que ronda los 8€.



La preba de xacíu, foi a ciegues, y compara vinos de les mesmes característiques y DOPs. A la fin de la mesma, comparáronse les puntuaciones y tuvo más reñíu de lo esperao. Ganaríen con abondo marxe los vinos de Vinoteca, pero penalizó-yos un vinu del que vamos falar más tarde que fixo que baxara la puntuación.

Empezamos con Albariño. Condes de Albarei vs Sara's. La primera una bodega enorme, con unes 80000 botelles añales, con claros toques d'azucre residual, pero un vinu correcto y frescu na boca. En frente, un vinu de producción bien pequena, infinitamente más ricu, con namás unes 8000 botelles al añu, una acidez muncho más marcao y al preciu risible de 7,5€ na Vinoteca. El Condes de Albarei cuesta unos 9€.


Camudamos a Rioja. Vinos nuevos. Milflores 2017 vs Albiker 2018. Uva tempranillo. Milflores, una gran bodega con producción enorme na Rioja. Un vinu que ta perbién pa ser de supermercáu, y a un preciu xenial. Unos 5€. Ganó respectu al Albiker, un vinu de maceración carbónica, recién embotelláu y al qu'inda-y falten un par de meses pa poder apreciar, a lo menos los mortales como yo. Sabor bien marcáu a yogur y chicle. 8€ na tienda.

Tocó Ribera de Duero. Valdehermoso vs Prado del Rey. Dambos del 2017. Dambos Tempranillo. Equí apréciase enforma la diferencia de filosofía ente un "vinu industrial" ya ún más artesanu. Valdehermoso ye un vinu infinitamente más elegante, más finu; sicasí Prado del Rey tien unos taninos muncho más vulgares, ye más toscu y nótase más la madera. Valdehermoso ronda los 9€ y Prado del Rey los 7€.


Y acabamos cola uva monastrell. Casa Castillo 2016 vs Juan Gil 2017. Ganó claramente Casa Castillo, un vinu más elegante. Ye un vinu más xugosu, con toques a fresa ya inclusive especies. Sicasí Juan Gil, ye cereza pura. Intensu y entra bien, pero ta meyor Casa Castillo. Dambos vinos ronden los 7€ na tienda.

Un exerciciu bien interesante p'aprender, comparar, estremar matices, y darréu, poner de mancomún nel restu la mesa. Siempres estremando cualidaes y maneres d'ellaboración, col gustu personal de caún, que ye bien particular ya igualmente válidu.


L'orde final de los vinos por puntuación.

Y qué meyor manera que ponelo de mancomún cenando, cola cocina de Borja Alcázar y la so madre MaryLuz.


Empezamos con una Esbilla de Quesos Asturianos. Pregondón, La Saregana, Casín, Massimo de Rey Silo ...


... y Teyedu.


Siguimos col so famosu Bombón de chocolate con lleche y carrillera de gochu asturcelta guisada al Porto. Fascinante. Namás paga la pena dir al Abrelatas pa probalo. Ye perfeutu.


Tortos de farina de maíz blancu y trigu con besamel de picadiellu caseru y yema de güevu. Maíz blancu con un toque de picadiellu. Pero nidiu. Los tortinos taben perfectos.


Pulpín del pedreru de Tazones guisadino con crema de pataca y ensaladilla de pimentón de la Vera. Otru clásicu de la casa. Perfeutu xuegu de testures y sabores. El pulpín intensu, y con esa testura perfeuta que tanto nos presta. El pimentón da allegría y la pataca anidia tol platu. Xenial.


Arroz con Pitu de Caleya de Sariegu. Otra maravía. Pocos díes antes pudimos probalo con Kiku asturianu y ufff, qué intensidá. Maraviyosu guisu, con munches hores. Yá'l puntu del arroz perfeuto. Platazu.


Y acabamos con una Mousse de Llimón. Toque acedu y testura xenial. Bien bonu.

Como veis, cena completa. Felicitar a Sibaritastur y Abrelatas por esti tipu d'entamos.


No hay comentarios

Publicar un comentario