Nueva Visita: La Mar y Morena

Señes: Calle Jovellano, Nº8, Oviedo / Uviéu

Teléfonu: 985 203 606

Web: https://lamarymorena.com/
Facebook: https://www.facebook.com/lamarimorena/
Instagram: [@lamarymorenaoviedo] https://www.instagram.com/lamarymorenaoviedo/

Anterior Visita: https://lesfarturesast.blogspot.com/2015/09/nueva-visita-la-mar-y-morena.html

Comentarios: Siempres me prestó La Mar y Morena. El llocal ye preciosu, con un toque sureñu bien guapu. Tienen bona sidra, échenla, y tienen bon vinu. Ta nun allugamientu fantásticu, al lláu de la cai Gascona/Gascuña pero lo aondo alloñada pa salir del so xaréu habitual. Y amás, xusto a la entrada, caltien ún de los pocos cachos que queden en pie de la Muralla Medieval d'Uviéu.

Teníen dellos anuncios que faenos,  asina qu'axuntaron nuna mesa de "prensa" pa convidanos a comer. El primeru foi la presentación de la marca Territorio Ternera Asturiana. La Mar y Morena ye'l primer restorán n'axuntase a esta marca que garantiza qu'el 100% de la carne ellaborada nel llocal ye IXP Xata Asturiana. Ensin dulda, una noticia pergrande.

La segunda, que yá sabíamos, foi que La Mar y Morena resultó ganador per segundu añu consecutivu del concursu al meyor cachopu entamáu pol periódicu El Comercio. Amás, los dos años tocóme como xuráu na fase preliminar y los dos cachopos presentaos gustáronme enforma y paselos a lo final.

A pesar de centrase nel cachopu, siempres foi un restorán que trató perbién el pexe. Asina que nun quedéis namás nel cachopu, hai muncho más.

Empezamos con una Ensalada de Vieira y Mangu. Gran ración, con unes vieires formoses.

El contraste col mangu queda xenial.

Probemos el so Cachopu Primitivu. El cachopu ganador del concursu en 2017. Xenial presentación, bien cuidada, pa un cachopu rebozáu con farina de trigu y rellenu de quesu azul La Peral y xamón de Gochu Astur-Celta. Predomina'l sabor a quesu azul. Vien acompangáu d'una guarnición de puré de pataques con un toque de mantequilla y una llechuga.

Dempués probemos el so Asturies, d'Occidente a Oriente. Cachopu ganador del concursu en 2018. Cachopu bien orixinal con doble rebozáu, la metá con pan d'escanda y l'otra con pan de maíz. De rellenu, una crema qu'entemez de trés quesos: Gamonéu, Afuega'l Pitu Atroxáu y Taramundi con Nueces. Vien amás con un pocu de puerru pa da-y xugosidá y xamón afumáu de Tinéu.

La guarnición ye una amiestu darbeyu y berza.

Si tengo que quedame con ún, tando los dos bien bonos, prefiero'l segundu. Anque la mesa tuvo estremada.

Pa beber, Vinu y Sidra Viuda de Angelón. Una maravía como siempres.