Publicidá

Contact Me

Nombre

Correo electrónico

Mensaje

Hover Setting

default

La Casona de Rioseco


Señes: Carretera General, Km91 - Rioseco/Rusecu - Sobrescobiu
Teléfonu: 985 609 704


Facebook: https://www.facebook.com/lacasonaderioseco/


Calidá: 3/5
Preciu: 40€


Comentarios: Rusecu ye un llugar maraviyosu onde perdese. Perbién comunicáu cola zona centro y oriental, bien curiáu y peatonalizáu (foi Pueblu Exemplar d'Asturies), dientro'l Parque Natural de Redes, Reserva de la Biosfera, con una Casa l'Agua que nun puedes perder, con miradores para ver panorámiques maraviyoses del banzáu que da de beber a casi toa Asturies y con unos cuantos sitios onde quedase a vivir gastronómicamente.


Güei vengo a falavos d'ún de los más conocíos de la zona, La Casona de Ruseco. En plenu centru de Rusecu, y con aparcamientu propiu, ta esti Hotel/Restorán, onde se come de viciu.


La zona l'hotel (2 estrelles) nun la conozo, pero como tea igual de decorada que'l restorán, va gustavos. Tienen zona de barra para tomar daqué, y entrando per una puerta, un comedor abondo grande, que suel enllenase de fin de selmana. Dispon amás d'una terraza cubierta, con cristaleres que ye una gociada, con más intimidá y que ye perfeuta tantu para los díes de fríu como los díes de calor.


Na zona l'aparcamientu, tienen una mini casa con delles meses, ya inclusive zona de sofá, para eventos y xuntes privaes.


Una de les especialidaes de la casa ye'l Corderu a la Estaca. Por encargu. Pero ye ún de los más famosos d'Asturies. Yo doi fe porque la comí va años, pero tenemos que repitir.


Tamién tienen un fornu de lleña onde preparen tou tipu de platos, y claro, esi toque nótase.


Sentaos yá a la mesa, comimos 6 persones y pidimos dellos platos pa probar toos de too.


Empecemos por una Croquetes Caseres. Bien bones.


Siguimos con ún de los sos platos estrella, les Truches de Ríu con Xamón. Frites, sabroses y cruxentes. Bonísimas.


Otru de los sos platos estrella. Callos. Bien bonos, picantes y pa repitir hasta acabar la pota. Vienen con pataques frites.


La gran especialidá de la casa, amás del Corderu a la Estaca (bonu, y comíu lo comío, tolo demás) ye l'Arroz con Pitu Caleya. Ye un espectáculu. Pitu caleya de verdá, de piel escuro, sabor bravo ya intensu, que da sabor al arroz, y como veis, nada de 1 o 2 cachos. Bona ración.


Vien con una ensalada.


Y a puntu d'españar, traxéronnos a probar una Pata de Corderu al Fornu. Si la trucha foi un espectáculu, si los callos y les croquetes encantáronnos, si quedamos maraviaos col arroz con pitu ... esto tenéis que probalo. Perfectu. Esi fornu ye una maravía y remánenlu perfectamente.


Casi comimos los postres por obligación, pero nun los dexéis pasar. Otra de les sos especialidaes son los Frixuelos. Fechos de delles maneres. Y tamién probemos una Tarta de Quesu espectacular con mermelada casera.


Pa beber, ribera Doble R. Nun pidí yo, asina que nun puedo dicivos si tienen ufierta asturiana o non. 

Instalaciones bien guapes, cerraes amás pa que los crios puedan andar al so aire, local ampliu, zona de corderu a la estaca, un fornu de lleña espectacular y cocina casera de calidá y a esgaya. Merez la pena Rusecu, pero cola so Casona, merez muncho más.


No hay comentarios

Publicar un comentario