Publicidá

Blog Archive

Contact Me

Nombre

Correo electrónico

Mensaje

Hover Setting

default

Mi Candelita



Señes: Playa Bañugues - Gozón.
Teléfonu: 985 883 150


Facebook: https://www.facebook.com/micandelita/
Twitter [@mi_candelita_]: https://twitter.com/mi_candelita_
Instagram [@micandelitaarroceria]https://www.instagram.com/micandelitaarroceria/


Calidá: 4/5
Preciu: 41€


Comentarios:  El Llamber (del que vos falemos en 2014, cómo pasa'l tiempu) marcó un antes y un dempués n'Avilés. Cuando nun taben de moda los gastrobares, nin les neotabernes, nin los llocales hipsters con decoraciones en maderes vieyes, Fran Heras sosprendiónos a toos ayudando a xorrecer una de les cais más mítiques d'Avilés, Galiana. Un llocal pequenu, onde creó escuela, y que dexó pol local del mesmu nome qu'abrió en Barcelona (llenu siempres). Darréu abrió tamién El Chigre 1979, na mesma ciudá, con muncho ésitu tamién.


Fai esactamente un añu, volvió a Asturies (ensin abandonar los sos dos locales en Barcelona), a la Sablera de Bañugues, a convertir el so chiringu, n'ún de los restoranes de moda. Otru conceutu, bien habitual n'otros sitios pero qu'equí costó que cuayara (gracies Aramar). Volvió a Asturies, pero tres papase de la cultura mediterránea y pasar por dalguna de los meyores arroceríes, pa importar esa cocina a Asturies, y da-y el so toque propiu. Una cocina que xune'l Cantábricu col Mediterráneu, al traviés de los sos productos, onde un bon pexe complementa ún de los meyores arroces que puedas comer.


El local tamién ayuda. Asitiáu en plena sablera, con una terraza enorme, zona esterior ya interior, amplies cristaleres y un ambiente de paz que convida a relaxase y esfrutar. Comes onde comes, el mar ta siempres presente.


Empezamos la comida iguando'l mundu con un cóctel.


Pan ecolóxico, de maíz, centenu y pan blanco. Buenísimo.


Alcachofa a la Brasa, con un mueyu percima a base del quesu Rey Silo. Un xuegu de testures y sabores espectacular. El quesu da potencia, el cruxente quéda-y xenial y nós casi acabamos col pan.


Amás acompañámoslo d'un pan de cristal con tomate percima. Cruxente y buenísimo.



Pulpín a la Brasa con Chimichurri Marín. Un milfueyes qu'oldea en testures y sabor con un pulpu que ta perfectu. Platu que nos lleva dafechu al mar, y pa tomar en porciones. Cruxe, desfáise na boca y sabe a mar. Brutal.


Sacáronnos los pexes que teníen frescos del día y encamentáronnos l'Oyomol. Tamién conocíu como Besugu Blancu. A la plancha, col puntu perfectu, nuna tabla de madera. Buenísimo.


Non podíamos colar ensin probar los sos arroces. En caún de los qu'ellabora especifiquen qué variedá de granu utilicen, y namás merquen lo meyor de lo meyor: Gleva, Badea de L'Estany de Pals, Albufera D.O., Carnaroli... Por encamientu de Rosa, pidimos l'Arroz con Gamba Colorada y Acelgues. Ún de los meyores que comí nunca. Si te gusta l'arroz ... has de probalo. Bona ración, amás, pa dos persones. Y qué gambes ...


Pa beber, Iñigo Blanco Reserva 2012. De Bodegues Amézola de La Rioxa. Brutal. Color, en ñariz tien un toque cítricu y mineral bien bonu, y na boca, ye un vinu con cuerpu, qu'aguanta perfectamente la comida, y que va ganando. Encantónos.


A los postres casi nun llegamos, pero nos encamentaron probar un La Trucha Golosa, Rías Baixas 2017. Un albariño dulce, que non empalaga y qu'entra xenial col quesu.


Y yá puestos, tomámoslu con un pocu de Rey Silo. Quesazo. Amás taba Pascual pellí comiendo.


Maraviyosu sitiu, que merecería visita namás pola redolada, y que tamién, namás pola so cocina. La unión de dambes coses fai de Mi Candelita un sitiu esceicional, una xoya que tenemos d'esfrutar. Un sitiu que nació de la necesidá de retornar a Asturies por culpa la Cardiopatía de la so fía, y que convirtió a Candela na causa y alma del local. Tantu que destina un euru per cada arroz que lleva'l nome de la so fía a l'Asociación de Padres y Amigos de Cardiopatíes Conxénites (Apaci), n'agradecimientu al so llabor y al sofitu que-yos dieron.


Convidáronnos al postre y al vinu del postre. Pagamos en total 82€. Lo normal sería tomar o l'arroz o'l pescao, asina que nun ta nada mal de preciu.


No hay comentarios

Publicar un comentario