Cuan Mor

Señes: 60 George St - Oban - Escocia

Teléfonu: +44 1631 565078

Web: https://www.cuanmor.co.uk/

Facebook: https://www.facebook.com/CuanMor/
Twitter [@cuanmor]: https://twitter.com/cuanmor
Instagram [@cuanmoroban]: https://www.instagram.com/cuanmoroban/

Calidá: 3/5
Preciu: 18€

Comentarios: Llegamos a Oban, una de les capitales marineres d'Escocia. Un pueblu abondo guapu con un paséu pol puertu, onde ves de cutio entrar barcos a descargar pexe. Tolos restoranes tán enfocaos a la mar. Gastronómicamente yera'l nuesu caberu cartuchu del viaxe, y viendo lo visto, nun tuvo mal del tou.

El restorán más conocíu ye'l Ee-USK, mentáu por Michelín y con per bonos precios. Pero foi imposible acutar mesa, taba llenu. Asina que siguiendo encamientos del sitiu onde agospiamos, fuimos a Cuan Mor, una especie de cervecería con toques modernos y meses atarraquitaes, llenu hasta los topes de xente.

Dixéronnos qu'esperáramos 1h en barra con un busca, y que nos avisaben cuando hubiera mesa. Casi lo agradecimos porque asina cenábamos a una hora "decente", les 9 de la nueche y mientres podíamos tomar unes cerveces.

Sentaos na mesa, con vistes al puertu, continuu trasiegu de xente y camareros. Meses con muncho pexe, pero tamién con hamburgueses y "fish and chips" (eso nun puede entrar enxamás na estaya pescao :)).

Pidimos unos Scampi and Chips. Esto ye, una especie de croquetes de gamba con pataques conxelaes y un mueyu tartar. Típicu platu de freizu.

Y equí venía la prueba. Besugu. Bona ración de besugu, bien baratu pal preciu al qu'equí tamos avezaos. Bien fecho, anque ensin apenes sabor. Y sosu. Vien acompañáu de llimón, ensalada y unes pataques conxelaes duces.

Pa beber, bona esbilla de vinos, cerveces en cañero, bomba y botella y dalguna sidra. Pidimos delles cerveces locales en cask-bomba. Riques y a temperatura ambiente. Y tamién sidra escocés, que nun va pasar a la posteridá.

Pagamos por tou, 37,58€. Bona relación calidá-preciu.

Pd: los güisquis posteriores nel llocal nun los incluyo nel preciu. Pero una de les visites más recomendables de Oban ye a la so destileria. Un güisqui perrico, algamadizu y con una visita que paga la pena, anque dientro de la fábrica nun dexen faer semeyes por mor del manexu del alcohol.