Marcos Morán & Borja Cortina

Señes: Priendes - Carreño

Teléfonu: 985 887 797

Web: http://www.restaurantecasagerardo.es/
Facebook: https://www.facebook.com/marcos.moran.casagerardo/
Twitter [@casa_gerardo]: https://twitter.com/casa_gerardo
Twitter [@marcosmoran]: https://www.instagram.com/marcosmoran/

Web: http://varsoviagijon.com/
Facebook: https://www.facebook.com/varsoviabargijon/
Twitter [@varsoviagijon]: https://www.instagram.com/varsoviagijon/

Comentarios: Ún de los nuesos meyores cocineros y ún de los nuesos meyores bartenders n'ún de los nuesos meyores restoranes. Asina puede resumise la nueche que vivimos gracies a Marcos Morán y Borja Cortina, que xunieron cocina y cócteles, ellaboraos colos mixers premium de Scheweppes.

Folixa en casa Gerardo, con munches cares conocíes, qu'empezó nel salón principal, de mena informal con un Gin Tonic con toque de Llima y Alfabaca, porque, como diz Borja, hai que demandar el Gin Tonic como aperitivu, y la verdá qu'entró xenial, y más col calor que faía nel esterior.

Tomemoslu con un Bocáu Cruxente de Quesos, que ye una auténtica maravía.

La idea la nueche yera probar coses distintes, en formatu pequenu, y ver cómo un "gastromaridaxe" puede ayudar a ameyorar tantu'l platu como'l coctail, y asina foi. Polo xeneral, tolos platos supieron meyor col coctel, y viceversa. L'amiestu de dambes coses raspió la perfección.

Xubimos les escaleres y entramos na cocina, ellí yá esperaba tol equipu, lluces de colores, DJ y Marcos y Borja micro na mano. Trasiegu enorme na cocina y  los espectadores alredor tastiando, almirando y comentando.

Empezamos con un Afumaos vs Schweppes Llimón. Un Golden Beer Pint, un coctail con presencia de pinta de cerveza, pero qu'entemecía güisqui y ginger ale. Bien ricu, y alcohólicu ...

Con una Banderilla d'Anguila y Pepinu. Refrescante.

Y Salmón, mazana y Café. De los meyores de la nueche, cruxente cola piel del salmón, daos de mazana y polvos de café para dar sabor (y golor). Bien bonu.



Delicadeza Vs Schweppes Hibiscus. El coctail foi un Negroni Rossastro, con xinebra rosa, vermú, Campari y la tónica d'hibiscus. Amargosu, a mi'l Campari nun m'apasionada nada ... asina que solo nun me namoró, pero coles tapes, entró daveres bien.

Con un Säam de Merluza en Verde. Un cachu de merluza envolubráu n'una fueya verdura.

Y un Cogollu a la Crema. Foi lo que menos trunfó de la nueche.

Cantábricu Vs Schweppes Ginger Ale / Xenxibre Intensu. El coctail foi l'únicu ensin alcohol de la nueche, y tamién foi'l que más nos prestó (sorprendente en mi, eh?). Baby Jane. Amargosu y con toque picante de tabasco. Foi xenial colos platos.

Buñuelo de Saramollete. Pequeñu, y de bocáu. Bien ricu.

Saramollete nel so Consomé. Faltába-y potencia, pero testura maraviyosa.

Tradición Vs Soda Schh. Volvimos al alcohol para tomar la Caipiroja, un coctail con base de palu cortáu, qu'apurrió la potencia abonda para los platos más fuertes de la nueche.



Croqueta de Compangu. Mítica de la casa, y que ta bonísima.

Y nun podía falta la so archiconocida Fabada. En mini platu con mini compangu. Nidia, elegante. Rica.

Acabamos con Oximoron Vs Schweppes Té Matcha. La ida de pinza total de la nueche foi la tarta de Quesu Gamonéu en forma de coctail. De sópitu anubrió un potente golor a Gamonéu la sala y a toos sosprendiónos atopar un coctail para beber. Fuerte, arriesgáu... pero ¿nun ye precísamente lo que-yos pidimos? Qu'arriesguen y llévennos per caminos distintos. Vodca con quesu Gamonéu. Con dos ... Sabía meyor de lo que golía.

Con un Bombón de Chocolate Tanzania y Sal. Otru bocao bien ricu.

Pa finar, la xunión perfeuta de los dos mundios. Balsámicos y Té Matcha. Con cuyar, testures, contrastes y un sabor bonísimo.

Nueche alcohólica (pena de coche de vuelta), perfecta para abrir la mente, probar coses distintes, o platos tradicionales de forma distinta. Agradezse enforma velaes asina onde xuegues, aprender y, sobremanera, esfrutes.