Teléfonu: 985 229 952
Web: https://www.sidreriaelvalle.es/
Instagram: [@sidreriaelvalle] https://www.instagram.com/sidreriaelvalle/
Comentarios: Toos conocemos el famosu refrán "Con fabes y sidrina nun fai falta gasolina", pero ¿daveres mariden la faba y la sidra? Eso propunximos a comprobar el pasáu Llunes 11 de Marzu na Sidrería El Valle n'Uviéu.
Un oasis sidreru metanes la ruta los vinos, con más de 25 años d'hestoria, y apocayá nomada Sidrería d'Asturies, marca de calidá y garantía turística otorgada pol Principáu d'Asturies.
L'arte de maridar una bona comida con una bona bébora, consiste n'harmonizar les característiques diferenciadoras de cada alimentu y desendolcar lo máximo posible les potencialidaes tanto de la comida como de la bébora que la acompañe. Y ensin dulda, fababa y sidra natural siempres fueron una de les combinaciones ganadores más utilizaes nel nuesu país.
A la faba, xunimos la Verdina d'Asturies, qu'apocayá consiguió la marca de garantía, que garantiza'l so orixe asturianu y calidá, y que foi incluyida dientro la marcar "Alimentos del Paraísu" xuntu colo más selecto de los nuesos productos.
Y a la sidra natural, Novalín, escepcional sidra Denominación de Orígen, Sidra d'Asturies del llagar Orizón, trés formes distintes d'ellaborar la sidra y que vienen complementar a la sidra natural, pero que tristemente tán teniendo más acoyida nel esterior qu'el nuesu país.
Sidra 1947 del Llagar Viuda de Angelón. Primer sidra natural penerada, "de mesa", como davezu conocémosla, pero con una crianza mínima de cuatro meses en barriques de carbayu. Una sidra sele como lo define'l mesmu llagar, que nun fai falta echar, con un amiestu maraviyoso de golor a mazana y madera, y l'abondu cuerpu p'aguantar dafechu cualesquier comida.
Poma Aurea, sidra Brut Nature Denominación d'Orixe, Sidra d'Asturies, del llagar Trabanco. Una sidra con burbuya, perfecta pa brindar o acompañar de comíes llixeres. Sidra seco, pero llixero, bien refrescante.
Sidra Práu Monga Brut Nature Reserva Denominación d'Orixe, Sidra d'Asturies, del Llagar Viuda de Angelón. Una maravía que cuesta mínimu 4 años ellaborar, cola segunda fermentadura na botella, al estilu de los meyores champagnes, ensin apenes azucre, seca, con una burbuya bien fina, y con una complexidá de golores y sabores que son perfectos pa combinar con#cualesquier comida.
Acompañámosles de cuatro platos con faba asturiana. Dos con Faba d'Asturies IXP, y otros dos con Verdina d'Asturies, qu'apocayá entró a formar parte de la IXP Faba d'Asturies y de la marca de calidá Alimentos del Paraísu.
Empezamos con un platu de Verdines con Mariscu, el más nidiu de tolos que probemos. La combinación más conocida de la Verdina y qu'amestó dafechu con cualesquier de les cuatro variedaes de sidra que probemos. La sidra natural foi la ganadora de toles opciones, anque'l restu de variedaes sosprendieron daveres.
Fabes con Amasueles. Otru platu clásicu de la gastronomía asturiana, que crez en potencia respecto al anterior. Con una faba que desfái al pegala al cielu la boca, y qu'esplota na boca como una testura de mantequilla maraviyosa. Destacó ente toes, la sidra 1947 como la meyor combinación posible, y la sidra natural siguió rindiendo a per bon nivel.
Xubimos d'intensidá col platu de Verdines con Setes y Caza. Foi'l platu que más sosprendió na mesa a los asistentes, por cuenta que, polo xeneral, yera la primer vegada que se probaba la Verdina con caza. Y encantónos. Un platu que pide más potencia, y daqué de burbuya pa llimpiar la boca. Asina que les nueses dos botelles de sidra brut nature alzáronse como les meyores combinaciones posibles.
Y acabamos col clásicu ente los clásicos. Una Fabada bonísima, con un compangu d'esceición, onde pudimos esfrutar la calidá de la Faba d'Asturies IXP. Mantequilla pura na boca, col picante xustu qu'apurre una morciella de les memorables. Prau Monga Brut Nature Reserva foi, ensin dulda, la sidra que más apurrió al platu, anque teamos más avezaos a combinar la fabada cola sidra natural.
La conclusión foi clara, l'apueste polos productos asturianos, desconocíos inda pa munchos asturianos. La necesidá de confiar nes nueses marques de calidá, como la IXP Faba d'Asturies, IGXP Verdina d'Asturies y DOP Sidra d'Asturies, y qu'empiece a ser habitual atopase con estos distintivos nes tiendes y los restoranes asturianos. L'intrusismu nel mundu de la faba ye daqué bien habitual, d'ende qu'estes marques sían les úniques que garantices que'l productu sía 100% asturianu. Como signu positivu, la gran aceptación que ta teniendo la Faba Verdina yá'l gran potencial gastronómicu que tien.
Tamién comentamos la necesidá de normalizar la presencia de les distintes espresiones de sidra, amás de la natural, nes cartes de les sidreríes y los restoranes asturianos. La sidra tien enforma qu'ufiertar naquellos restoranes onde nun s'echa la sidra, y puede combinase con cualesquier comida, como se demostró nesta esperiencia, y amás competir en preciu con cualesquier otra bébora; y ye un complementu perfectu para les sidreríes que nun echen sidra en tol local. Hemos d'ufiertar comíes de principiu a fin con sidra asturiano, dende sidra natural, pasando por sidra de mesa o brut, hasta rematar la comida con sidra de xelu.
Destacar l'altu nivel de los trés llagares qu'ufiertaron la so sidra, Orizón, Trabanco y Viuda de Angelón. Y el altu nivel qu'ufiertó la Sidrería El Valle, tantu n'atención como na cocina.
Estimar a los asistentes l'atención y les sabies aportaciones.
¡Vemosnos na siguiente! Salú.
Pd: Semeyes d'Ástur Montes para la Revista La Sidra.
No hay comentarios
Publicar un comentario