Facebook: https://www.facebook.com/El-pintu
Instagram: [@el_pintu_laviana] https://www.instagram.com/el_pintu_laviana/
Calidá: 4/5
Preciu: 40€
Comentarios: 3 años yá d'El Pintu, y los que-yos queden. La verdá ye que foi una gociada ver cómo fueron creciendo, asomando la cabeza y entrando de llenu como unu de los sitios de referencia pa comer n’Asturies. De primeres alcuérdome cuando lo encamentaba y la xente de fora de Llaviana apenes lo conocía y agora sois munchos los que m'escribís aconseyándomelo a mi.
Gran llabor de Diego y Zori, currando enforma, dexando clara la so identidá nel local: cocina de base tradicional, ensin prieses, con toques creativos, a bon preciu y consiguiendo que teas como na to casa.
Anguaño la celebración del so tercer aniversariu viose desllucida pola tema la COVID, pero quixeron preparar un menú especial que se-yos foi de madre porque, por cuenta de les llimitaciones d'aforu, viéronse dafechu sobrepasaos.
Pa ello xuntáronse de bonos amigos como David Montes "El Furtivu", Javi Felechosa de Pueblu Astur y Alberto Ojeda de d'Albert.
Amás, empezamos con daqué especial. Les primeres botelles, recién embotellaes y entá ensin etiquetes de la Cerveza Fame 2021. La cerveza de mesa qu'ellabora’l restorán Abrelatas, anguaño con Cerveza d'Equí. La primer cerveza amestada con uva albarín de Cangas. Ta bonísima.
Mantega de Quesu Gallegu. Nun sabemos cuál.
El pan, fechu por Javi Felechosa. Maraviyosu.
Crackers d'Aceituna Negra, Oriéganu con Alioli de Maracuyá. Un confiteru animándose con un entrante, y bien bono que taba.
Puerru asturianu, Boletus, Foie y Freses Picantes. Amiestu de temperatures, la crema boletus ta caliente y el tartar de freses, a temperatura ambiente. Y amiestu de testures. Encantónos.
Cococha al Pilpil y Pistu de Chorizu de Xabalín. Potentes, allegres. Encantáronnos. Estos contrastes son marca la casa del Pintu y sálen-y xenial.
Pasamos al vinu blanco. Agustí Torelló Mata Xic. Un xarel-lo llixero y frescu.
Merluza al Vapor con Mueyu Verde d’Algues y Plancha. Sabor a mar total. La merluza perfeuta. Gustónos.
Camudamos al tintu, Fariña Lágrima. Entra solo. Gustónos.
Carrellera de Xata Asturiana, Coliflor y Tomate. Brutales. El favoritu la comida, y eso que tuvo a un nivel maraviyosu.
De postre con Maxibom d'Artimora y Alfabaca cola so Crema Inglesa y Crispearls de Chocolate. Xenial. Encantónos el postre.
Acabamos con un "Vermujito de Maracuyá" de La Vermutería. Dicir vermujito en Llaviana habría de ser constitutivu de delitu.
3 años creciendo, ufiertando esa gastronomía asturiana que tantu nos gusta, que mima la gastronomía tradicional y ye capaz de da-y un aire fresco dende’l ciñu. Encántanos El Pintu y esperemos celebrar con ellos munchos años más d'Aniversarios.
No hay comentarios
Publicar un comentario