Señes: La Peral - Somiedu
Comentarios: Les Tierres de Somiedu son les nueses Highlands particulares. Ello ye que paez que la etimoloxía de Somiedu ye "País de Montes Elevaos", yá que provién de la palabra llatina Summetum (hai otra teoría que diz que provién de Sub-Metum, debaxo de mieu, en referencia a que los sos habitantes tan con mieu siempres espuestos a morrer por culpa la cayida d'un peñascu por cuenta l'altor los sos montes). Los dos molen, pero la primera ye muncho más épica.
Teléfonu: 985 763 825
Instagram: [@eldibandesomiedo] https://www.instagram.com/eldibandesomiedo/
Calidá: 4/5
Preciu: 28€
Nesta Farturruta voi llevavos a xubir a un casi 2000m (1989m, más lo que pongáis de la vuesa parte, yá llegáis a los 2000m), nuna ruta de 12kms, con un desnivel de 600m y que tardamos unes 3h y media en faela. Los 600m de desnivel pueden imponer un poco, pero xúbese bien, la mayor parte del tramu per pista y les vistes tan espectaculares van date la ayuda estra pa xubir.
Empezamos nel pueblu La Peral, dexando’l coche nel aparcamientu qu'atopes a la entrada del pueblu. Tamos a 1370m d'altitú.
Tres una pequeña xubida vemos el primera teitu de la ruta. La Peral ye una antigua braña vaqueira d'alzada, esto ye, moraben nella los vaqueiros colos sos animales nos meses de primavera, branu y seronda ; y baxaben a pasar l'iviernu a pueblos de menor altitú.
Ye un pueblu preciosu, iguáu y pol que paga la pena dar un paséu acabantes comer.
Nós tomamos la pista que va llevanos al restorán onde, a la vuelta, vamos parar a comer. La pista conecta la Braña la Peral cola Braña la Pornacal, que visitamos yá va unos años, na antoxana de les Farturrutes.
Pasamos delantre del D'Ibán, el sitiu onde comemos a la vuelta.
Salimos del pueblu La Peral, pela pista, y nel intre atopamos los últimos teitos de la braña.
La primer parte del tramu ye llana, y, ta enllena de vistes increíbles.
Atopamos la primer fonte.
Y adulces, empezamos a xubir.
Hai que dar un par de revueltes que faen que ganemos abondo altor. Pero al llegar casi enriba, das la vuelta y les vistes sobre’l Puertu de Somiedu son espectaculares.
Al poco, llegamos a la Fonte de Les Maḷḷadas.
Y ehí tenéis unes vistes increíbles sobre’l Penouta.
La pista continua hasta la Braña La Pornacal, pero nós queremos xubir el Picu Mocosu, asina que na mesma fonte, esviamos escontra la derecha de la pista, y xubimos pela canaluca bordiando los piornos que cubren la fastera.
Ye un bon repechu.
Y adulces va apaeciendo, de lloñe, el Mocosu.
Si dais la vuelta, allá embaxo, en pequeñu, veis la Fonte Las Maḷḷadas y el Picu Penouta.
Nós teníamos un día horrible: vientu y agua. Pero cuando abría dalgún claru, les vistes son increíbles. Quédanos llaniar un poco y crestiar pa dir xubiendo adulces al Mocosu.
Les vistes escontra l'otru valle son espectaculares. Nun día esteno ves los Picos d'Europa, Ubinas, Ḷḷeitariegos y munchos montes del occidente asturianu.
La xubida ye empinada. Pero faise cómoda.
Quédanos una última dificultá: los piornos (o escobes), que na última parte pueden faer incómoda la xubida. Si veis esta semeya y l'anterior, veis que bordiándolos pela derecha, llíbrense dafechu.
Finalmente, llegamos a la cima. Con una cruz de cume y una vértiz xeodésicu. Enriba les condiciones yá yeren horribles, llovía y facia muncho vientu. Asina que fiximos la semeya de rigor, y baxamos rápido.
Cuando baxábamos atopamos una alternativa a la nuesa xubida. Ta meyor marcao, pero ye un poco más pindiu que per onde xubimos. El Mocosu vese claramente, y xubáis per onde xubáis, salvando los piornos como vos indiqué, nun vais tener mayor problema.
Déxovos el sitiu onde atopáis la xubida alternativa na sienda principal. Ta siguiendo la pista, pasando la Fonte Las Maḷḷadas. Unos metros más allá. Abandonáis la ruta y siguís les marques del quad.
Queda volver pela pista escontra La Peral. Tou baxada.
Llegamos al D'Ibán de Somiedu. Casona de piedra preciosa.
Con una terraza esterior que ye una maravía. Si podéis, acutái mesa ellí. Nós, cola que taba cayendo, nun tuvimos esa suerte. Imaxínate comer con estes vistes.
Dientro, zona de barra, y 4 meses. Lliteral. Asina qu’acutái que siempres ta llenu. Pequeñu, pero preciosu. Madera, piedra y atención cuidada.
Tienen una carta pequeña, pero lo que faen, fáenlo perbién. De primero pidimos Pote Vaqueiru. Que ye’l pote asturianu, pero cola so variante occidental. Eso sí, tien dalguna faba. Pota al centru la mesa. Abondosu, de fechu aconséyenmos que solo pidamos 1 ración pa los dos.
Pote sobresaliente. Caldu gordo, allegre. La verdura de casa de les que saben. 2 xuegos de compangu per cabeza, abondosu. La morciella rica, suave; pero’l chorizu ye esceicional.
De segundos, Cachopu. Con cecina y quesu semicurao. Ricu. Filete finu y de calidá.
Y Sollombu de Xata. Brutal. Yá albidres que la cosa va bien cuando lo parten ellí mesmu de la pieza de carne. Desfái solo. Carne, poques gracies, de la zona. Dambos platos vienen acompañaos de pataques frites de verdá.
De postre, Flan Caseru. Ricu.
Y Arroz con Lleche. Ensin requemar. Una fonte. Brutal. Cremosu y con llixeru sele, qu'a mi si sabe muncho, ya me repuna) toque a anís.
Pa beber, agua y unes copes de vinu. Nun tienen bébora asturiano. Dixéronnos que la so intención yera igualo.
Pagamos 55.40€. A 28€ per cabeza. Gran sitiu. Gustónos enforma.
No hay comentarios
Publicar un comentario