Facebook: https://www.facebook.com/casatocho
Calidá: 3/5
Preciu: 20€
Comentarios: Güei vamos faer una Farturruta facilina, pa tola familia, ensin apenes desnivel y que forma parte del Camín Primitivu a Santiagu.
Son unos 7kms en total, que fiximos en 2h. Con un desnivel de 250m y perfeuta pa faer con guaḥes.
Salimos del centru de Salas, una preciosa villa medieval, onde podéis visitar la Colexata de Santa María la Mayor (SXVI), al Palaciu de Valdés Salas (SXVI) o a la Torre defensiva (SXIV) qu'alluga’l Muséu Prerrománicu San Martín. Ye una maravía.
Na mesma plaza la Campa tienes un indicador de la ruta. Hasta casi’l final la ruta comparte comparte trazáu col Camín de Santiagu. Emociona imaxinar a Alfonso II pelegrinar a Santiagu per aquelles tierres.
Vamos travesando Salas, coles obres de l'autovía al fondu.
La idea ye remontar el ríu Nonaya, que traviesa Salas, hasta llegar al saltu d'agua. Al poco de salir, a la derecha, vamos atopar una antigua curtidora de pieles.
Al poco, atopamos la Fonte del Pain.
Y travesamos los antiguos cargaderos de la mina de caolín. Estrayíase caolín pa faer cerámica.
Entramos nun camín preciosu, ganando altor adulces, con fresnos, ablanos, carbayos y umeros.
Cruciamos la Ponte de Borra, construyíu ente los SXVII y XVIII.
Siguimos ganando altor adulces.
Hasta qu'atopamos la bifurcación que nos esvia al saltu de Nonaya.
Una pequena baxada p'alloñanos de la Ponte Carcabón.
Y nel intre yá apaez la Cascada de Nonaya. 3 metros de saltu, pero nuna redolada espectacular.
Un llugar preciosu onde aliendes paz. Como siempres, aconseyo visitar saltos dempués d'unos díes d'agua, o en dómina de desxelu, que ye cuando baxen bien cargaos.
Volvemos de vuelta a Salas pel mesmu camín.
En Salas, ye parada indispensable mercar los Carajitos del Profesor. Ún de los postres maraviyosos que tenemos n’Asturies.
Pa comer quixímos probar Casa Tocho, na Ponte Samartín, Ouviñana. Tenéis nel mesmu Salas, el Castiellu, una bona opción pa comer. A metá de camín paramos en Soutu los Infantes, a visitar el so castiellu, del que güei namás queda la so torre, n'estáu ruinosu. Llamentable cómo curiamos el nuesu patrimoniu. El castiellu ye de 1500.
Según cunten, la casa d'al llau, ta fecha de tarucos de panoyes, esto ye, del cuerpu la panoya de maíz. Pasamos pellí y ta en ruines.
Siguimos camín y fuimos comer a Casa Tocho. Allugáu sobre’l ríu Pigüeña, salmoneru, el sitiu ye preciosu.
Según entres, zona de chigre de madera. Con meses pa tomar daqué.
Nun llateral, ábrese un comedor con cristaleres enormes y vistes al ríu. Bien guapu.
Casa Tocho ye bien famosu pol fégadu, asina que, d’aperitivo, siempres te ponen unes Pataques Frites, unes Croquetes y ...
... Fégadu. Y ta bonísimo. Toque picantín.
De segundu, pidimos Fabada. Al estilu occidental, con un toque a lloréu. Gustónos. Y del Compangu, a destacar, el tocín. Bonísimo.
De terceru, Fritos de Bacaláu. Bien ricos.
Y Chuleta de Xata con Pataques. Carne de la bona.
De postre, Barreña. Esto ye, requesón. Con miel casero. Brutal.
Y Flan de Quesu. Bien ricu.
Pa beber, vinu perroneru con casera, y agua. Pagamos por tou 40€. A 20€ per cabeza. Maraviyosu sitiu.
Volviendo escontra la zona centro, paramos en Santolaya Las Dórigas, a ver la Torre Palaciu de Dóriga.
Una torre del SXIV que se reformó como casona solariega. Según cuntáronnos ye priváu y nun se pue visitar. Una pena.
Y la nuesa última parada foi en Monesteriu de San Salvador de Curniana.
Fundáu nel 1024, con una importancia impresionante na hestoria d’Asturies y un pésimu estáu de caltenimientu. En cualesquier otru territoriu, sería llugar de parada obligatoria y taría nel estáu que merez.
Farturruta facilina, poco conocida, nun llugar de cuentu que va llevanos a la dómina medieval, con castiellos, palacios, monesterios y cascaes de suañu. Y parando a comer nun restorán sobro’l ríu, con un fégadu que te va a encantar.
No hay comentarios
Publicar un comentario