Preba de Sidra Viuda de Angelón

 

Señes: La Teyera S/N - Nava

Teléfonu: 985 716 770

Web: http://www.sidraviudaangelonpomar.es/
Facebook: https://www.facebook.com/sidrapomar.viudaangelon/
Twitter: [@sidraangelon] https://twitter.com/sidraangelon
Instagram: [@sidraviudaangelonpomar] https://www.instagram.com/sidraviudaangelonpomar/

Esiste un sitiu maraviyosu que nomáu’l "Clú de la Sidra", entamáu pola Revista La Sidra, onde s'axunten 1 o 2 vegaes al mes na Escuela d'Hostelería de Xixón pa charrar, aprender, y, poques gracies, probar sidra.

Nesta ocasión convidaron a Fran Ordoñez, propietariu y enólogu del Llagar Viuda de Angelón, a presentar la so sidra a los asistentes. Llenu absolutu. Eso sí, la presentación foi cola metá del so catálogu de sidra, imposible prebar tola variedá qu'ufierten d'una sentada si nun queríamos salir faciendo eses.

Empezamos con un culete de la so Sidra DOP (Denominación d'Orixe, esto ye, fechu con mazanes certificaes 100% asturianes) Prau Monga. Prau Monga ye’l nome d'una de les pumaraes mesmes del llagar, y ye qu'esta sidra fáenla n'esclusiva cola so mazana propia. Ellaborada con 6 tipos distintos de mazana asturiana, Raxao, Regona, Pericu, Blanquina y Xuanina; dan-y el calter que Fran busca na so sidra, un toque acedo pero sedoso a la fin. Tien un arume único a yerba recién cortao y un equilibriu que fai que siempres pruya beber otru culín.

Siguimos con 1947. Una sidra de mesa, o como Fran prefier llamala, "Sidra Sele". Una sidra peñerao y estabilizao, que nun fai falta echar. Tien 6 o 7 meses en toneles de Castañal y pasa los sos 3 meses finales en barriques de carbayu americanu, que tienen el poru más abiertu, que dexa una fermentadura más homoxénea, lo que la convierte na primer sidra crianza. Fran adelantónos que tán faciendo prebes en barriques de carbayu asturianu, qu'ensin dulda ye lo meyor pa la bébora, y qu'esperen que salga al mercao l'añu que vien. Color dorao maraviyosu, sedosa, nótase la madera, y tien muncho cuerpu. Aguanta perfeutamente con cualesquier comida. Maraviyosa.

La xoya la corona, la mio favorita. Sidra Brut Nature Reserva Prau Monga. Sidra esplumoso seco, seco, con segunda fermentadura en botella. Ellaborada como un cremant (un champagne) con un procesu total d'unos 3-4 años. Escueyen la meyor sidra del llagar, y fuercen la segunda fermentadura na so propia botella, lo que fai que caúna tenga la so propia personalidá. Acaldía van moviendo la botella pa que la borra deposite nel pescuezu la botella pa finalmente faer el degüelle (abrir la botella pa espulsar la borra por aciu la presión natural de la botella) y darréu se corche.

Ye una sidra que pasa per barrica nueva de carbayu francés, y nótase. Color payizu, fresca, seca, col gas bien integrao y unos golores maraviyosos a bollería onde se nota la madera Complexísima, perrica. Perfeuta pa beber sola, o pa comíes. A mi maravíame.

Sidra Extra Ecolóxica Viuda de Angelón. Dende fai 3 años, inscribieron casi toes los sos pumaraes nel COPAE, pa certificales como ecolóxiques, esto ye, con una serie de restricciones pa que solo puedan utilizase componentes naturales. Ye una sidra que fai la so segunda fermentadura en depósitu (non como l'anterior, que ye individual en cada botella), y que se corta primero que remate pa que quede un poco d'azucre residual, que-y da esi dulzor necesariu pa faer d'ella una sidra "típico de Navidá". Golor a compota de mazana, con un toque de marmiellu. Y sabor duce, con un toque final tamién a compota. Una sidra pa brindar en celebraciones.

Y acabamos con Diamantes de Xelu. Sidra de Xelu de 11,5% d'alcohol. Sidra típico d'Alemaña o de Canadá, que cuando pañen les mazanes nos meses d'iviernu, tán conxelaes. Equí, esi procesu ha de facese de forma artificial, polo que se conxela la sidra del duernu recién mayada, y d'eses bandexes conxelaes estraen solamente’l corazón, onde se concentra la mayor pureza la sidra, refugando les esquines. Darréu reposa 8 meses en barriques de carbayu. Pa llograr esa botella de 37,5cl precísase l'equivalente a 10 botelles de sidra natural. Ye una sidra con muncha acidez y muncho azucre residual (unos 260gr), polo que ye una combinación perfeuta ente dulce y ácidu. Golores a mazana asada, inclusive pera confitada. Perfeuta pa postres, sobre manera quesos azules. Ye una maravía.

Productos maraviyosos, dende la pura tradición, hasta los procesos más innovadores. Perfeutos pa estes navidaes, o pa cualquier dómina del añu. Ensin dulda, el Llagar Viuda de Angelón ye ún de los productos de los que más arguyosos tenemos de sentinos.