El Recetario de Alex Sampedro

 

Señes: Calle Trinidad, 1 - Xixón
Teléfonu: 984 082 894

Web: https://www.elrecetariodealex.com/

Facebook: https://www.facebook.com/elrecetariodealex/
Twiter: [@elrecetario_] https://twitter.com/elrecetario_

Instagram: [@elrecetariodealex] https://www.instagram.com/elrecetariodealex/

Calidá: 4/5

Preciu: 31€

Comentarios: 15 d'Ochobre de 2007, primer publicación de Les Fartures. El Restorán Los Trés Caracoles, na parte alta de Gascona, rexentáu por Alex Sampedro. 14 años dempués, Les Fartures vuelve a la cocina d'Alex, esta vegada en Xixón, nel Recetario.

Local en plenu centru Xixón, al llau de la estatua de Pelayo, del Conceyu y del puertu. Local pequeñu, d'amplies cristaleres que miren a la cai peatonal. Zona de barra según entres a la derecha, con meses altes pa tomar daqué o picar; y meses en tola parte esquierda. Ambiente y decoración informales, pero bien guapos .

Carta con medies raciones y raciones enteres, perfeuta pa probar. Anguaño ta mentáu con un Bib Gourmand (restoranes con rellación calidá-preciu) por Estrella Michelín. Y nun s'equivoquen nada.

Pidimos Media de Croquetes Cremoses de Xamón. Maraviyoses. Líquides per dientro. Finalista a la meyor croqueta de Madrid Fusión 2019. Tenéis que probales.

Torrendos con Alliñu de Yuca. Bien bonos, cruxentes, con un caldu de carne bonísimo. La yuca da contraste duce que nun namora. Los torrendos son de Soria.

Callos "El Recetario". Ún de los sos platos más famosos. Son a la madrilana, esto ye, con compangu de chorizu y morciella. La verdá ye que saben más a cocíu con callos qu'a callos en sí. Tán ricos, ¿eh? Pero prefiero los tradicionales.

Media de Menezueles de Xata, Crema de Pataca y Güevu Escalfáu. Con yema de güevu a baxa temperatura. Pa entemecer tou. Bonísimo.

Pa beber, Albet i Noya Petit Alset Brut Reserva. 15 meses de crianza. Entra dulce, pero ye refrescante. Gustónos.

Pagamos por tou 62,70€. A 31€ per cabeza. Como veis, xenial de preciu pa tolo que comimos. L'atención bien bona. Sitiu pa repetir munches vegaes probando tola so carta con raciones y medies raciones. Gustónos enforma.