Abrelatas & David Montes: Akelarre

Señes: Ería del Hospital, 5 - La Pola Siero

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Instagram: [@abrelattas] https://www.instagram.com/abrelattas/

Anterior Visita: https://lesfarturesast.blogspot.com/2024/09/nueva-visita-abrelatas.html

Calidá: 4/5
Preciu: 35€

Comentarios:  Según entres nel Abrelatas recíbente Borja y Montes con una sorrisa y dos boines, mandil (de rayes), sientes la Txalaparta (esi instrumentu vascu que consiste en tocar tueros de madera), ves platos antiguos y vasos de lloza, manteles de papel estraza y sabes que daqué especial ta a piques de pasar. Y con un cartelu especial diseñáu pa la ocasión por Hugo Priede de La Industria.

Ye l'Akelarre. La xunta d'estos dos bruxos pa la realización de conxuros mientres los sos siguidores esfrutamos y ellos convoquen estraños rituales paganos.

P'algamar l'estasis, ye necesariu la inxesta de bébores que tresporten a otros mundos. Y llegamos a ellos gracies a la Santísima Trinidá del Abrelatas: Fame, en cañeru, de los pocos qu'hai, la cerveza propio que tien el restorán y ellaboró xunto con Cerveza Cotoya, y anguaño, Cerveza D'Equí. Siderale, edición especial en botella de sidra de la cerveza con magaya de sidra Panizales qu'ellabora Cotoya y el Mencía de mesa que suel tener l'Abrelatas nos menús.

D’aperitivu, un poco de Chorizu de Xabalín. Brutal. Intensidá de sabor na boca.

Pata de Xabalín. Como si fuera un xamón. Primero preséntenla, darréu Montes córtala y ...

... pudimos probala col mueyu de la mesma coción del xamón. Maraviyosa.

Crema de Calabaza, Viña y Foie. Tien un puntu acedu maraviyosu gracies a que lleva naranxa, llimón y Martini. Amás, añaden unos bonos cachos de trufa.

Y ellí mesmu rayen el Foie. Allegremente.

Acompañen la crema con una Flor de Sichuan, o Flor Llétrica, que produz un efectu d'adormecimientu llétricu nel cielu la boca. Como si durmiera la boca mientres comes peta-zetes. Pero sele y de curtia duración. Da un toque xenial al platu.

Quesu Fundíu. Nin más nin menos qu'un Cueva Llonín fundíu. Maravía.

Truches Frites con Xamón. Otra maravía. De bon tamañu, amás.

Y Codiyos de Gochu Guisaos. Desfaen solos. Bonísimos.

Acompañaos d'unes pataques cocíes y una vinagreta.

Pal postre, la lliturxa d'un bon Irlandés.

Sirvíu con tol espectáculu posible.

Bonísimo.

Tou esto por 35€, pa un númberu amenorgáu de persones, con tola puesta n'escena qu'estos dos grandes de la cocina, y showmans, namás son capaces de faer. Un tándem espectacular de Borja Alcázar y David Montes, ensin escaecer la mano que mece too, que ye Mary Lluz. Cola Txalaparta taladrando no fonderu. Hipnótica. Orgásmica. Impagable. Maraviyosu. Una esperiencia que cunten repetir ensin llimitaciones d'aforu y a mesa corrida pa que sía inda meyor. Nun vos la perdáis.