Farturruta a los Llagos la Braña'l Ríu comiendo nel Chigre del Llagar Alonso

 NUEVU ALLUGAMIENTU EN CIAÑU

 Señes: Claudio Sánchez Albornoz 7, 33909 Sama de Llangréu

Teléfonu: 984 085 930

Web: http://www.llagaralonso.com/
Facebook: https://www.facebook.com/LlagarAlonso/
Twitter: [@JaviDiaz21] https://twitter.com/JaviDiaz21
Instagram: [@llagaralonso] https://instagram.com/llagaralonso/

Anterior Visita: https://lesfarturesast.blogspot.com/2021/04/nueva-visita-chigre-del-llagar-alonso.html

Calidá: 4/5

Preciu: 30€

Comentarios: Cuando tas cerrao perimetralmente en Llangréu, busques sitios desconocíos dientro'l conceyu pa poder faer dalguna escapada, y la verdá ye que nos sorprendió pa bien la cantidá de sitios guapos qu'hai pa visitar y que son poco conocíos fora de Llangréu.

Güei llevámosvos a unos llagos que se formaron a partir d'una esplotación minera, son 10'5kms de ruta, con unos 300m de desnivel, que tardamos unes 3h en faela completa (día y vuelta) y que llevavos per paisaxes sorprendentes.

Empezamos nel pueblu la Braña, a pocos kms de Tiuya, un pueblín preciosu llenu de cases pequeñes de colores, que foi aldega minera hasta mediaos del sieglu pasao, y qu'anguaño ye un paraísu preciosu de tranquilidá, con una piscina ye un paisaxe maraviyoso.

Dexamos el coche na zona d'aparcamientu y empezamos una xubida preciosa ente carbayos y castañales.

Al poco atopamos la Fonte del Monte Llerón (un Llerón ye un sitiu onde hai muncha piedra suelto).

El paséu ye daveres preciosu.

Siguimos atopando fontes.

Y llegamos a la Fonte de Santiaguín, de 1900, que tien amás un rincón bien guapu sobre la fonte, con un pequeñu bancu de madera, mesa y arrodiáu de naturaleza.

Empieza un repechín bien guapu que pasa per una casa azul. Como veis, la vista ye espectacular.

Al poco ye más llevaderu. La ruta ye fácil y nun tien tramos duros.

Apaecemos yá a la carretera que va llevanos a la Braña'l Ríu, ye un pequeñu tramu por una carretera con apenes tráficu .

Al poco, llegamos a l’área recreativa de la Braña'l Ríu.

Y nel pueblu atopamos el cartelu esplicativu de la ruta. Otra de les opciones ye xubir en coche hasta equí y namás faer l'últimu tramu. Tamién podéis faer la ruta circular que llevavos dende equí a xubir al Ceacal y al Mirador del Peruanu, nel Picu la Rina, con vistes bien guapes sobre Peñamayor, Sueve , Aramu y tola cuenca'l Nalón.

Nós xubimos pela pista direutamente hasta los Llagos. Otru día esploraremos la ruta más llarga.

Ye un tramu de pista, de menos de 1km, con unes vistes bien guapes. La zona ta repoblada dende va unos años con xardones, pinos o castañales, per parte d'Hunosa, pa la so esplotación futura.

Al poco yá llegamos a los Llagos. Correspuenden a una esplotación a cielu abiertu de carbón d’hulla, qu'entamaron a finales de los años 70 del sieglu pasáu y que tuvo abierta más de 10 años tresformando por completu’l paisaxe.

Son 2 llagos, que ganen n'espectacularidá si ganes un poco d'altor pa velos.

Dende ehí, solo queda la baxada de vuelta hasta la Braña. Y averanos a comer a ún de los nuesos restoranes favoritos: El Chigre del Llagar Alonso, en Sama. A 8kms.

Amplia terraza, y dientro barra y meses alredor. Preciosa decoración. Nel chigre l'epicentru ye la sidra, y non cualesquier Ellaboren la so propia sidra dende va décades, y ta bonísima. Tienen Sidra Natural y Sidra Natural DOP. Podéis pidir otres bébores, pero faéime casu y probái la so sidra. Hai pocos sitios n’Asturies que curien tan bien la sidra como ellos, son especialmente repunantes con cómo s'echa la sidra y en qué condiciones.

Pa comer, siempres ponemos nes manes de Mary, dueña y verdadera alma del local. Enerxía pura y una mano pa cocinar como poques. Empezamos con un poco de Quesu, Anchoa y Pimientos. Pa dir abriendo boca.

Calamares frescos, del día. Bonísimos.

Merluza fresca, tamién trayida del día. Merquen na plaza de La Felguera, qu'eso siempres da un plus de calidá. Bonísima.

Unos Chipirones Rellenos. De Merluza, Gambes y el mesmu Chipirón. Con una base de pataques frites. Maraviyosu.

Y un platu de Llombu con Pataques. Bien bonu.

De postre, Cabrales. De Valfríu. Maraviyosu.

Y Tarta d'Almendra, Tarta de la Güela, Tarta de Quesu y Tarta d'Arroz con Lleche. A cada cuál meyor. Pero la d'Arroz con Lleche ye espectacular.

Salimos a 25€ per cabeza. Ún de los nuesos sitios favoritos.

Farturruta bien desconocida aprovechando la reutilización d'un espaciu mineru nuna redolada natural preciosu, xubiendo per mediu d'un monte metanes la nada, y comiendo n'ún de los nuesos restoranes favoritos, con sidra propio y una cocina d'escándalu. Pero bonu, si amás la faes con amigos llagareros y estrelles de la tele, meyora. Gracies Javi, Angel y Ceci!