Farturruta a la Viescona de la Toya comiendo en el Vista Alegre

 

Señes: Playa La Griega - Colunga

Teléfonu: 985 856 061

Web: http://www.restaurantevistaalegre.com/
Facebook: https://www.facebook.com/Restaurante-Vista-Alegre/
Instagram: [@rest_vista_alegre] https://www.instagram.com/rest_vista_alegre/

Calidá: 3/5

Preciu: 45€

Na caldía nueche de branu, la lluna, sollerte enriba'l monte, alluma la mar y los praos. Na mar, espéyase la lluz claro faciendo un camín cande penriba la manda inmensidá, un camín que dalgún día percorrerá xubiu nun caballu negru cola estrella. A la lloñe aldovínase'l castru de La Islla y más lloñe El Cabu l'Oeste. De frente, dibúxase l'ídolu'l cementeriu de los mayores y al sur, la tierra llevanta 

Asina empieza la novela Nunn de Xandru Martino, el protagonista-convidáu d'esta Farturruta. La novela ta ambientada a primeros del sieglu I nel castru El Picu, en Caravia. Los accesos a día de güei son malos, anque merez la pena xubir, asina que voi proponevos una Farturruta bien guapa y mui cerca dende la que vais poder contemplar el Picu y lo que queda de castru.

Nunn ye una historia d'amor y de compañerismu, d'una aldega d’ástures que ven cómo la so cultura y la so sobrevivencia peligren ante la invasión de los romanos. Una novela preciosa escrita con esa sensibilidá tan de Xandru y que tresllada a una historia de va venti sieglos que, seguro, nun alloña muncho de lo que pasó en realidá.

Vamos percorrer la Viescona de Toya, o a cencielles la Viescona. Tenéis delles opciones pa faela, la más fácil ye faela con 2 coches, dexar ún nel puntu d'entamu, y otru nel Mirador del Fitu, y percorrer la viesca de baxada dende’l mirador hasta’l puntu inicial. Otra opción ye faer la ruta, llegar hasta la collada de Bustacu y volver pel mesmu camín d'ida. Y la tercera, pa los farturruteros más avanzaos, sería igual que la segunda, pero añadiendo la xubida al Picu Pienzu.

Nós fiximos la ruta cómoda, esto ye, llevamos dos coches, ún dexámoslu nel puntu d'entamu conocíu como Casa Julia, y l'otru coche nel aparcamientu del Mirador del Fitu. Percorrimos la viescona de baxada, esfrutando tranquilamente de la vista, llegamos al puntu d'entamu, fuimos recoyer el coche nel mirador y fuimos comer.

D'esta manera, la ruta son unos 4km, con unos 500m de desnivel de baxada. Nun tien nenguna dificultá, y pue facela tola familia.

Empezamos nel Mirador del Fitu, dende’l que tenéis unes vistes espectaculares. Picos d'Europa, El Sueve, Parque Natural de Ponga, y l'otru llau, la mar con Ribeseya, Caravia, Colunga, la Villa y, hasta Xixón.

Baxamos del mirador, y cruciamos la carretera, con un cartelu ente pinos qu'indica l'entamu de la ruta.

Una pequeña xubida y nel intre llegamos a un mirador espectacular sobre la mariña oriental asturiana. Y amás, el monte más baxu de la esquierda, el Picu'l Castru, onde ta’l Castru'l Picu, protagonista de la novela.

Al llegar a un claru del monte, miró atrás. Abaxo, n'El Picu'l Castru vio'l pueblu, asoleyáu na tarde del branu d'aquel branu. Miró a la so izquierda y vio la mar y El Cabu l'Oeste. El sol entamaba a baxar buscando'l finxu'l cielu. Albidró qu'entá-y quedaríen un par d'hores de lluz. Siguió xubiendo entre texos, fayes y dalguna cotolla nes camperes.

Les vistes son impresionantes. Vese claramente Llastres.

Llaniando, la vista camuda de la mar, escontra’l monte. Nun contraste que se da en pocos sitios. Sol mar de nubes, Les Arriondes y tola vega del Seya. Al fondu, flotando sobre’l mesmu, los Picos d'Europa . Un espectáculu que yá merez la visita.

Siguimos caminando y llegamos a la Mayada Bustacu. Una mayada enorme, preciosa, siempres con caballos, inclusive asturcones, hasta la entrada del iviernu. Si siguimos de frente, acabaríamos xubiendo al Pienzu, una xubida bien guapa y recomendable, pero un poco llarga pa Farturruta.

Nós esviamos a la derecha, casi al llegar al bebederu del ganao, per un camín que se ve claramente.

Empecípiase una baxada qu'adulces va metenos na Viescona.

Namás más entrar nel monte, atopamos cola "fayona", una faya centenaria impresionante, que bien merez la pena parase a contemplala.

La Viescona, o la Viescona de Toya, ye’l fayéu de menor altitú de la península ibérica, y de xuru d'Europa. La faya ye un árbol que crez n'altitú, a partir de 800m. Si siguís les nueses Farturrutes, sobre manera les serondiegues, vais comprobar que cuando entramos nun monte primeru atopamos con carbayos, castañales, ablanares, … Y finalmente la faya. Nesti casu asocede xusto al aviesu, tán casi a nivel de mar, a unos 200m a menor altitú que del restu de los árboles que comenté antes.

Col fueu llegó la música, la sidra, la cerveza, otra vuelta les viandes, les dances y ofrecimientos al dios sol. Los amantes desapaecíen ente les solombres de los árboles y les árgomes. El calor yera intensu. El branu algamaba el so finxu cimeru. Les colleches taben a piques de recollese. El tiempu y el mundu yera bonal colos de la so triba, solo esperaben que los dioses siguieran siendo igual de bonales qu'hasta'l momentu. 

La baxada ye preciosa, metiéndose más y más nel monte, con rincones máxicos.

- Aiu, nun camines enxamás delantre de mín, seique nun seya a siguite; enxamás nun camines detrás de mín, seique nun seya a esperate. Camina al mio llau y por favor sé'l mio compañeru. ¿Quies que t'acueya en mio casa? - pronunció Nunn.

- Sí, prestaríame abondo ser el to compañeru de camín y que m'acueyas na to casa pa formar una familia contigo. 

Pasamos pol antiguu calce del ríu Toya, que dexa un pasadizu ente'l calizu llenu de felechos, lique, mofu y roques. Y fayes colgando de sitios inverosímiles de la roca.

Paga la pena parase a esfrutalo.

Cruciando’l pasadizu, alzamos un poco pela vera derecha del ríu, per un camín qu'acaba siendo empedrao.

Namás queda baxalo y atopar les ruines de la mina de la Toya, onde s'estrayía fierro, que tuvo n'activu nos años 20 del sieglu pasáu. Inclusive hai una bocamina, que nós nun atopamos.

- Nun sé cómo sois capaces de trabayar ehí dientro.

- Home, a too s'aveza ún, de toes maneres, cuando tamos dientro, allumamos con venceyos, ensin lluz sedría imposible trabayar. De toes maneres, lo peor nun ye pa poca lluz, ye la humedanza sobre too en dellos requexos. 

- La verdá ye que vos almiro, dexáis la pelleya pa que la xente tenga material col que facer preseos y adornos. 

- Caún trabaya no que puede, toos collaboramos al bien del clan. 

A partir de les ruines, abandonamos el monte, y abre un enorme claro onde podemos ver un camín que va llevanos al puntu onde tenemos l'otru coche.

Solo queda recoyer el coche y xubir a recoyer el que tenemos nel mirador del Fitu. El vieyu trucu del nuesu fotógrafu favoritu Juanjo Arroxu, ye faer esta mesma Farturruta y esperar a qu'un alma caritativa lu xuba en coche hasta’l mirador. La otra opción ye xubir pel tramu de carretera los 4kms de vuelta, daqué que nun vos aconseyamos porque suel tener tráficu abondo, sobre manera en dómina turística.

Dende ellí fuimos a Gobiendes, a visitar la so ilesia perrománica, de finales del S IX, de la qu'apenes queda yá nada del prerrománicu por cuenta de les socesives reformes que tuvo a lo llargo los sieglos.

Tien unes vistes precioses dende la parte de tras.

Averamos caminando al pueblu, onde podéis atopar una xoya de l'arquitectura asturiana. Un horru de más de 200 años, que tien como Taza (la pieza que va ente la muela y la caxa l'horru) una vértebra de ballena.

Una alcordanza del pasáu balleneru de la zona, que les sos espediciones partíen del puertu de Llastres.

Dende ellí vamos a la Sablera la Griega, al restorán Vista Allegre. Un Hotel-Restorán a pie de playa, con unes vistes espectaculares, abiertu dende 1969.

Tien una terraza espectacular, que s'enllena pel branu, asina qu'acutái si podéis, cualesquier de les meses que tán al estremu.

Pa comer, cocina tradicional, mirando al mar, y, lo qu'acabó d'atraenos, foi que ganaron el concursu de la meyor fabada del mundu en 2016, y siempres tan ente los finalistes o semifinalistes.

Sentámonos 4 persones a comer na terraza. A españar. Empezamos con Moxones a la Marinera. Ración más bien escasa, pero de bona calidá, eso sí, con un mueyu que nun diz nada.

Navayes. Bones.

Calamares. Frescos. Aconseyólos el camareru. Y tenía razón. Lo meyor ensin dulda de los entrantes.

Pasamos a mayores, la Fabada. Merécense’l premiu. Bien bona. Faba entera, grande, nidia, pura mantega na boca.

El Compangu aparte. Bonu, sobre manera la morciella, casera.

De postre, pidimos pa compartir, Fritos de Lleche Cruxentes. Rellena d'arroz con lleche, cola masa cruxente. Brutales. Encantáronnos.

Souflé de Natielles Almendraes. Otra maravía. Como si fuera un donut.

Y Tiramisú. Bien ricu .

Pa beber, Escolinas 2018. De Monesteriu de Corias, de Cangas. Bien bonu. Tienen tamién sidra brut en carta.

Pagamos 45€ per cabeza. Con un par de botelles de vinu. Calamares, fabada y postres bonos. Gustónos. Para repetir.

Viesques máxiques úniques n'Europa, noveles precioses col so escritor lleéndonos estractos, taces de ballena y restoranes ganadores de la meyor fabada del mundu con vistes a la sablera. Pocu más pue pidise.