Farturruta de Orllé a la Mayada Melordaña comiendo nel Hotel Arniciu

 

 Señes: Calle Huertas, S/N. El Campu - Casu

Teléfonu: 985 608 078

Web: http://www.hotelarnicio.com/

Facebook: https://www.facebook.com/hotelarnicio/
Twitter: [@hotelarnicio] https://twitter.com/hotelarnicio
Instagram: [@hotel_gastronomico_arniciu] https://www.instagram.com/hotel_gastronomico_arniciu/

Anterior Visita: https://lesfarturesast.blogspot.com/2019/08/nueva-visita-hotel-arniciu.html

Calidá: 4/5

Preciu: 35€

Comentarios: Si vas comer una chuleta d'una de les meyores carnes del mundu (y nun lo digo yo solu, ehí tán los concursos internacionales), lo meyor ye que vaigas conocer los sitios onde pastien y crecen, los oríxenes de la raza especial con una carne único nel mundu, criada en mediu'l paraísu.

Vamos a la Mayada Melordaña, en mediu del parque natural de Redes, tierra de la vaca casina, o asturiana del monte, y ún de les paraxes más espectaculares d’Asturies. La farturruta ye de 12kms, con unos 600m de desnivel, tardamos unes 4h en faela, con paraes incluyíes, ta señalizada y faise per pista ancha ensin dificultá.

Salimos del preciosu pueblu d’Orllé. Bien cuidao. Na parte baxa atópase’l panel qu'indica l'entamu la ruta. Vais atopar ampliu aparcamientu en tol pueblu.

Nel intre atopamos el cartelu que nos indica la ruta.

La primer parte'l camín ye un preciosu fayéu.

Qu'abre dacuando pa que podáis ver estes maraviyoses vistes.

Volvemos entrar en zona viesca, sobre manera castaños y carbayos, y vamos xubiendo adulces per una foz ente montañes, paralela al ríu Orllé.

Una xubida preciosa, siguiendo’l ríu.

Que va dexándonos rincones máxicos.

Con castañales precioses.

En cruciando la ponte Vallumasaltu, tenemos el recuestu más duru la ruta, que va llevanos hasta lo que foi la Mayada l'Acebal.

Volvemos salir la viesca, y el recuestu ya ye más llevaderu.

Al poco atopamos la Mayada Conforcos. Preciosa.

Ellí atópase l'Abellugu de cazadores, horrible, onde tenemos que tomar una decisión: podemos esvianos pa la llamada Foz de Melordaña, que ye una xubida espectacular ente montañes, pero pela que baxa’l ríu Orllé; o siguir pela pista. Un paisanu nel pueblu yá nos indicara que col tiempu d'esi y colo que lloviera nesos díes, meyor fuéramos pela pista porque la foz, con agua ye peligrosa poles zapicaes. Queda pendiente pa otru día.

Asina que siguimos pela pista.

Muncha más abierta, pero tampoco esmerez en guapura.

Y en xubiendo a un colláu, llegamos a la Mayada Melordaña. Una de les más guapes d’Asturies, con una pradería espectacular, col Picu Pelacera y Cabronéu presidiendo les vistes.

Una de les poques, o quiciabes la única, col teyáu de llábana. Y una de les más importantes de too Redes.

Bien grande, con una gran fonte, el ríu Orllé travesándola y con unes vistes espectaculares.

Si siguís xubiendo un poco, tenéis la Foz de Valloseru, un fayéu espectacular que na seronda ha de tar increíble y que llevavos a otra mayada, más pequeña, del mesmu nome. A nós empezónos a nevar (sí, en Mayu) y volvimos hasta’l pueblu d’Orllé pel camín pel que xubimos.

En conociendo los praos y mayaes onde pacen la vaca y el güe casín, lo meyor yera dir probar si tanta guapura pue tresmitise a la calidá la carne, asina que fuimos dende Orllé al Campu, capital de Casu. A apenes 5kms. Y paramos nun vieyu conocíu de Les Fartures, l'Hotel Arniciu.

Con Diego Aladro al frente, que dirixe l'hotel, curia’l ganao, ellabora’l so embutíu y tamién davos el puntu perfeutu a les chuletes. Da-y un toque afumao, pero sutil, y amás, reutilizando madera la zona. Un grande.

Según entres, zona de barra con enorme chimenea presidiendo la zona pa tomar daqué. En pasando per un pasiellu, apuertes a la zona l'hotel rural, y, un poco más allá, el comedor. Y baxando unos pasos, un comedor con una galería con unes vistes precioses.

Empezamos con una Crema de Cabrales. Bien rica. Suavina pero pica un poco. Vien con unos mini tortos calientes.

Siguimos con Embutíu de Güe Casín. El chorizu picantín, bonísimo. El Salchichón, qu'otres vegaes gustónos más que'l chorizu, ta inda un pelín tienru, pero bien ricu tamién.

Siguimos con unes Fabes Verdines con Pulpu y Llagostinos. Caldu maraviyoso, d'hores. Bonísimo, el verdín ye una faba más dura que la normal, pero suavísima y per bona de sabor. Vien con bon condimentu. Mui riques.

Y llegamos a la maravía. Chuleta de Güe Casín. 30 díes de maduración. Sabor maraviyoso, elegante, nada ranciu.

Gües de 5 años, con una carne maraviyoso. ¿La meyor del mundu ? Ensin dulda ente les meyores.

Vien con unes pataques frites a dos temperatures, de les de verdá; y pimientos, aparte. Y un calentador por si queda fria.

De postre, Requesón con miel. Bien bonu.

Tarta de Quesu. Brutal. De les denses que cuesten acabar. Bonísima.

Y nun podía faltar una ración de Quesu Casín, pero en Gorollu, esto ye, poco fermentao, con menos rabilaes, pa que sía más suave. El quesu casín ye ún de los quesos más fuertes que podéis comer, y esti tipu d'ellaboraciones fáenles más algamadices pa que pueda probales tol mundu. Vien acompañao d'un poco de dulce caseru.

Pagamos 35€ per cabeza .

Ensin dulda, xubir hasta la Mayada Melordaña, onde Diego xube pel branu les sos vaques y gües casinos, pa conocer el trabayu duru qu'hai detrás, y les camperes maraviyoses, fai que valores muncho más la so carne, y el trabayu de los ganaderos asturianos. ¿La meyor carne del mundu ? Si faes esta Farturruta, asegúrote que vas tar mui cerca de responder afirmativamente esta entruga.