Farturruta D'Ortigueira a les Playes de Cuaña comiendo en Los Olivos

 

Señes: Vega de Arenas - Navia

Teléfonu: 611 185 336

Web: https://losolivosrestaurante.com/
Facebook: https://www.facebook.com/losolivosrestaurantecatering/
Instagram: [@losolivosrestaurantecatering] https://www.instagram.com/losolivosrestaurantecatering/

Calidá: 4/5

Preciu: 33€

Comentarios: Ortigueira, la nuesa, l'asturiana, ye un pueblu preciosu de la mariña de Cuaña. Abondo desconocíu pa tar onde ta y que sigue calteniendo l'encantu de los pueblos pesqueros.

Tien un puertu pequeño pero precioso onde ye habitual ver bañase a los guaḥes pel branu. Unes vistas increíbles sobro l'esgoladoriu de la mariña asturiana, y ta arrodiada de pequeñes cales de piedra y sable que son una maravía.

Güei convídovos a faer una Farturruta pela mariña occidental asturiana, aportando a pueblos y sableres desconocíos. Inclusive vamos pasar por una sablera con 3 mini saltos d'agua. Son 13kms en total (día y vuelta) per un paisaxe con apenes desnivel, namás les xubíes y baxaes hasta les sableres, que como sabéis siempres hai un importante desnivel p'aportar a casi cualquier sablera asturiana. Tardemos unes 4h en faer la ruta completa, con paraes y baños incluyíos. Pa esfrutar les rutes de sableres al completu, siempres aconseyamos faela con marea baxa. La ruta ta indicada en tou momentu.

Empezamos nel pueblu d’Ortigueira. Tien un faru con unes vistes increíbles nel estremu oriental del pueblu. Pero nós dexamos el coche nel mesmu aparcamientu qu'hai nel pueblu, mui cerca del puertu.

Tres asomanos al puertu, y pasar les instalaciones de l'antigua conservera, que ta nun estáu de caltenimientu llamentable, atopamos el cartelu qu'indica l'entamu la ruta.

Empieza una xubida preciosa ente les cases que s’apilen como un tetris pegaes a la roca. Xubida indicada por cartelos en tou momentu.

Cuando llegues a la parte alta, merez la pena l'esfuerzu de los pasos. Una vista preciosa.

Siguimos según los indicadores peles precioses cases d’Ortigueira.

Hasta llegar a un balcón con unes vistas increíbles qu'indiquen l'entamu la ruta.

Merez la pena , eh?

La primer parte ye preciosa. Camín entre praos.

Con un mini área recreativa con vistes al mar.

El camín xira, y allóñanos de la costa. Ente maizales, llegamos a As Carrilleras.

Y dende ellí, a Medal. Como veis, ye carretera de pueblu, pero ensin peligru.

El camín vuelve xirar y llévanos de vuelta a la mar.

Per una baxada con una bona pendiente hasta la Sablera Figueira.

Llegamos a la entrada la sablera, que como veis, ye espectacular.

Si queréis baxar al arenal, tenéis una bona baxada d'escalones.

Pero la verdá ye que paga la pena.

Playa de sable y piedra, con unes formaciones que recuerden a Gueirúa. Con cueva y tou.

Volvemos xubir los pasos y siguimos.

Empieza un tramu preciosu ente carbayos y castañales, paralelu al regatu de Vega Pintu. Inclusive hai una ponte pela que tenemos de cruciar.

Empieza un repechín de xubida.

Que vuelve a sacanos al asfaltu, al pueblu de Lloza.

Un pueblu con rincones bien guapos. Esti cabazu, indica la esviación a la Sablera de Torbas. Siguiente puntu onde vamos parar. Dende’l pueblu podéis asomavos tamién a los Cantiles d’Aguión, con vistes espectaculares.

Nós fuimos en dirección a la sablera.

Que yá veis que tien una panorámica preciosa.

La Sablera Torbas ye famosa porque tien 3 saltos d'agua que van morrer a la sablera. Ye una playa de sable y de piedra.

Al poco de baxar a la sablera, atopamos el primer saltu d'agua.

El segundu, ye'l más espectacular.

Y el terceru, que ye’l más pequeñu de les trés y qu'apenes trai agua.

Si siguís pola sablera, atopáis una gran roca que dixebra de la siguiente sablera.

Ye la Sablera'l Barcu. Más pequeña, pero bien guapa.

Dende esta sablera, xube una rampla onde vamos ganando altor a la sablera, y que dexa estes vistes.

La xubida acaba nel pueblu del Barcu. La ruta sigue hasta El Porto / Viavelez, pero nesti puntu nós yá tomamos el sentíu de vuelta hasta Ortigueira. Como esta última parte ficímosla travesando la sablera, la vuelta facemosla pela parte de riba.

Ye un tramu de baxada que va llevanos de vuelta a la Sablera Torbas.

A la vuelta, la marea yá ta muncho más alta.

Dende ehí namás queda volver hasta Ortigueira pel mesmu camín que fiximos a la ida.

N’Ortigueira tenemos una lleenda d'un trasno (como conocen naquella zona al trasgu), recoyida nel llibru Un Paséu pola Mitoloxía Asturiana d'Alberto Álvarez Peña, que diz:

En Ortigueira se utilizaba el ouca (algas) para abonar las tierras de labor y para ello, una vez recogidas, se apilaba en tierra para que fuese secando. El trasno no tenía mayor afición que volcar los montones y esparcirlos. También ser decía que era aficionado a mover las antiguas lanchas de remos. En Ortigueira se contaba que el trasno vivía en una cueva próxima al puerto, llamada A Cova'l Diablo, que en la actualidad ya no existe. 

Los pescadores del Finisterre bretón tenían también su trasgu particular, al cual llamaban le bosj, que se subía a las lanchas. 

Na semeya veis la famosa Casa Gris que vien nel llibretu del discu de Llan de Cubel

Es tradición que las casas más antiguas de Ortigueira fueron construidas por marineros bretones, que habían llegado para dedicarse a la caza de ballenas. Cuando se marcharon, entregaron las llaves de sus casas en el palacio de Mouguías. Las primeras casas que se construyeron fueron A Casa del Portal (actualmente destruida para hacer los almacenes del puerto) y A casa de Odosia. Eran casas de cuatro aguas, tabicadas por dentro con madera y en las ventas tenían unas piedras salientes, agujereadas para meter un palo entre ellas y tender las redes que se teñían de ocre con casca (corteza) de pino o de omeiru (aliso). 

Si queréis, podéis averar al Faru d’Ortigueira, que merez enforma la pena.

Tien unes vistas increíbles d’Ortigueira, dende l'otru llau.

Pa comer, fuimos a Los Olivos, a tan solos 6km d’Ortigueira, al otru llau de la ría del Navia. Los Olivos ye Alfonso Santiago, esto ye, el Palermo, que tres 27 años decidió pesllar y treslladar la so actividá a otru conceutu dafechu distintu.

Ta asitiáu mui cerca la Sablera de Navia, y ye un restorán creáu pa entamar eventos. Amás d'una carpa enorme, tien un llateral a teyavana preciosu, con zona de prau y cascada incluyida.

Tien esi aire de merenderu, pero con cocina de muncha calidá. La carta nun ye estensa, y casi meyor, predominen los platos pa compartir, y tiren de parrilla, que-y da un toque xenial a tou.

D'aperitivo traxéronnos Empanada d'Atún Coloráu, Guacamole y Aceituna Negra. Bien rica.

Pidimos Croquetes de Rey Silo. Maraviyoses. Per dientro casi líquides. El cruxente brutal. Nivelazu, tenéis que probales.

Pote Asturianu. Gustónos. Caldu gordo, con dalguna faba.

El compangu tien un toque de parrilla.

Y acabamos con Pulpu a la Brasa. Mui bonu.

De postre, pidimos Sorbete de Llimón con Suflé de Vainilla y PetaZetes. Refrescante. La testura la xelatina y los petazetes-y dan un toque brutal al postre. Encantónos.

Y Suflé d'Ablanes y Caldu d'Ablanes Turraes. Absolutamente maraviyosu. Pa los ablaneros como yo, perfeutu.

Acabamos con un toque de Licor43. ¡Qué tiempos na Quattro!

Pa beber, Sidra Brut Reserva EM. 2015. Fálta-y un pocu d'allegría, pero ye sorprendente ver cómo aguanta una sidra del 2015. Bien.

Pagamos 66€. Maraviyosu descubrimientu nuna redolada preciosa.

Pueblos qu'abren al mar con lleendes, rutes per sableres de suañu con cueves y cascaes, pueblos ente maizales, castañales y carbayos al pie de sablera y terraces al llau de la sablera onde se come de maravía. Preciosa Farturruta.