Teléfonu: 985 491 621
Facebook: https://www.facebook.com/Casa-Maria-
Calidá: 3/5
Preciu: 23€
Comentarios: Vamos faer una Farturruta espectacular, apenes conocida, y un poco más esixente de lo habitual. Vamos xubir a un picu con unes vistes espectaculares sobre Payares y Les Ubiñes. Vamos pasiar por una cresta qu'estrema los valles del Valgrande y del Güerna, y vamos acabar comiendo en casa Marisa, un clásicu de la zona que nun falla.
La ruta son unos 14kms, va ser circular, tardaremos unes 4h y media, xubiremos unos 500m de desnivel (llevaderos, tranquilos) y vamos caminar per pistes anches qu’ensin dificultá. Y con vistes espectaculares en tou momentu, asina que meyor faéila nun día estenao. La ruta nun ta indicada, pero siguiendo les nueses indicaciones, nun hai perda posible.
Empezamos nel pueblu preciosu de Chanos de Somerón, a 860m. A la entrada tien un aparcamientu onde dexar el coche ensin problema. Indispensable la parada na Corra'l Tixu. Preciosu.
Chanos ye un pueblu bien guapu. Son los oríxenes familiares de Javi. Y merez la pena dar una vuelta. Amás, tienes que dala sí o sí, porque has d'atravesar el pueblu enteru hasta atopar el puntu de partida (y llegada) de la ruta. Pueblu bien famosu polos sos arbeyos y pol so dichu:
"Chanos de Somerónqu'en cada casa hai un ḷḷadrón,menos na del curaque toos lo son"
Na parte alta del pueblu, vais atopar el camín de salida (el de la esquierda) y el de llegada (el de la derecha).
Tomamos el camín de salida.
Empieza una xubida llixera, preciosa, onde vamos viendo’l Puertu Payares nel so esplendor.
Tras, vamos dexando Chanos.
Atopamos un esvíu, siguimos escontra la derecha. Anque’l nel intre, el camín, sigue alloñándose de Chanos.
Camín preciosu, y con unes vistes espectaculares. Y hasta agora, llevaderu.
Siguimos adulces ganando altor.
Y dexando Llanos tras. Pensái que lo único "malu" ye que, dempués, hemos de desandar tol camín pol cordal, pero va merecer la pena, porque les vistes son inda más espectaculares.
Nel intre vemos una esviación con un camín a la izquierda, qu'empecipia una xubida, la más dura la ruta, en zigzag, por una canal, hasta llegar a un colláu.
Esta xubida ye la parte más dura la ruta.
Pero paga la pena, porque en cuanto llegues a la cresta'l Cordal de Chanos, apaez esta maravía. Les Ubiñes. Una auténtica maravía.
Les vistes son increíbles.
Dende ellí, el camín pol cordal yá ye llanu, con dalguna subidina o inclusive baxaes. Coincide col tramu que tien el gasoductu Asturies-Lleón, polo que vais dir atopando indicadores per tol camín.
Les vistes son increíbles. A la vuesa esquierda, Les Ubiñes; detrás, Payares y Cuitu Nigru.
Siguimos caminando pol cordal, y al fondu yá apaez el nuesu oxetivu, el Curuḷḷu Braña.
Llegamos a la base, y como veis, solo ye un repechín de xubida.
Llegamos a la cima y atopamos una gran cruz, y un puntu xeodésicu, qu'indica’l so altor, 1317m.
Y lo meyor, les impresionantes vistes.
Toca baxar per onde xubimos al Picu.
Y desandar un poco’l cordal. Tái sollertes porque nel intre, apaez la esviación a la izquierda pa volver al pueblu de Chanos. Xusto equí.
La baxada ye distinta a la xubida, primero per un tramu de pista. Yá dexamos tras Les Ubiñes, agora quédanos el Payares y Cuitu Nigru.
Y un Fayéu preciosu. El tramu de baxada ye muncho más pindia qu'el que fiximos a la xubida (por eso aconséyovos que faigáis la ruta nel mesmu sentíu que la fiximos nós).
En poco tiempu empezamos a ver Chanos.
Y nunos minutos yá llegamos al pueblu.
Si recordáis la semeya del principiu, salimos pel camín de la esquierda, y llegamos pol de la derecha.
Volvemos al coche porque en Chanos nun hai sitiu para comer. Sí que tenéis chigre para tomar daqué, nel Albergue’l Cascoxu.
Nós fuimos al pueblu de Felgueras, a 17kms, y yá desandando escontra la zona centro, a comer a Casa María.
Un clásicu de la cocina asturiana, qu'amás tien hotel rural. Según entres, zona de comedor ampliu con barra.
Na zona de fora, terraza cubierta y un cenador un poco más arriba, con unes vistes increíbles. Reserva, que s'enllena de fin de selmana. Nós comimos na terraza cubierta.
Según sentamos, traxéronnos d’aperitivu un bollu preñáu y un poco d'embutíu.
Pidimos de primeru Fabada. Notable. Gustónos.
Y Pote. Gana claramente a la Fabada. Bien bonu.
El Compangu, normal.
De segundu, Caldereta de Cabritu. Espectacular. El mueyu picantín ta increíble, y el cabritu desfáise. Brutal.
Y Corderu al Fornu. Otra maravía. Bonísimo.
Vien con pataques frites y pimientos. Tienen xata de casa.
De postres, Arroz con Lleche Requemao. Bien bonu.
Yogur Casero con Nueces y Miel. Bien bonu.
Pagamos por tou 47€. Tienen sidra, pero con chisqueru llétricu.
Acabante comer, la parada en Santa Cristina de Ḷḷena ye imprescindible. Amás píllavos de camín de vuelta a l'autopista.
Un paséu preciosu pol arte asturianu, únicu nel mundu, con casi 12 sieglos d'antigüedá (foi fundada nel añu 852). Una maravía que merez la pena visitar, tanto per dientro como per fora. Patrimoniu de la Humanidá dende 1985.
Pueblos con Tixu, xubíes con vistes, balcones a una de les montañes más mítiques d’Asturies, cordales por gasoductos, fayeos, cases de comíes con cabritu y un corderu espectaculares y visita a unu de los monumentos más guapos y antiguos d’Asturies. Preciosa y desconocida Farturruta de güei.
No hay comentarios
Publicar un comentario