Publicidá

Blog Archive

Contact Me

Nombre

Correo electrónico

Mensaje

Hover Setting

default

Pueblo Astur


Señes: Cofiñu - Parres
Teléfonu: 984 081 818


Web: http://www.puebloastur.com/
Facebook: https://www.facebook.com/PuebloAstur
Twitter: [ @pueblo_astur] https://twitter.com/pueblo_astur
Instagram: [@puebloastur] https://www.instagram.com/puebloastur/


Calidá: 4/5
Preciu: 80€


PuebloAstur ye un resort increíble asitiáu en Cofiñu, en Parres, ente'l Mirador del Fitu y Casa Marcial. Un pueblu abandonáu iguáu con unes vistes increíbles sobre los Picos d'Europa.


El pueblu pertenez al completu al hotel, metanes la nada y con una tranquilidá increíble. Dispon de too, SPA, piscina, una réplica enorme de la famosa estatua Newton de Dalí de les que namás hai 8 nel mundu ... Eso sí, prepara la billetera, que nun ye baratu.


Tocantes a la so ufierta gastronómica, equí vien lo sorprendente. De la mano del famosu Ramón Celorio, y con Javier Alonso -Felechosa-, como xefe de cocina, tienen dos menúes degustación, amás de la carta. Ún a 35€ y otru a 70€. Cocina d'altu nivel a preciu muncho más algamadizu que'l restu l'hotel.


Nós probemos el menú de 70€ y encantónos. Amás el restorán ye increíble. Namás por sentase ellí, yá paga la pena. Tienen otru restorán más pequenu na parte de riba del pueblu, pero anguaño namás lu utilicen pa xuntes especiales.


Empezamos colos aperitivos, Ceviche de Cabrachu Tamarindu y Contrastes Florales. Allegre, con un toque picante común a tola cena. Refrescante, perfeutu de mano.


La nuesa Croqueta Melosa de Xamón Ibéricu. Llíquides per dientro, al estilu Marcial que tantu nos presta. Esceicionales. Gran descubrimientu.


Coliflor Turrada con Terrina d'Oca. Suave a esgaya, pa perdese cola cuyar. Bien rica.

Empezamos colos platos. Asegúrovos que costó muncho acabalos.


Pulpu Chingón. Chiplote, Guacamole y Cebolla Enchilada. El pulpu perfeutu, pero la base de cebolla enchilada encantónos. Toque picante y p'acabar col pan.

A éstes perbonos panes. Pan de masa madre, Pan de centenu, Pan de tomate y Pan de maíz.


Vieira Asada. Crema de Trigueros y Espluma de Curry. Vieira formosa, con más toque picante nel platu. La crema de trigueros buenísima.


Una de les estrelles de la nueche, Carabineru con Papada Cruxente de Gochín Asturcelta. Menudu espectáculu. Poco más puede dicise. Combinación xenial con una intensidá de sabores y testures perfeuta.


Otru platazu, Llingua Confitada, Calamar, Cogordes y Encurtidos. El calamar preside, y apurre sabor y testura, y la llingua de fondu, xuntu coles cogordes, da-y un toque xenial al platu.


El mio favoritu foi Guisu de Manines de Gochu y Callos de Bacaláu. Callos menudos, con un toque picante increíble, y coles manines ... terrible. Platu perfeutu.


Camudamos al pexe, Samartín con Zusmiu de Llámpares. El pexe perbonu, pero lo que más nos prestó del platu ye la intensidá qu'apurre esa crema de llámpares. Volvimos pidir que nos repunxeren pan.


Y acabamos los platos con Xarrete de Tenral ECO con Patatinos Risolaos y Boletus. De mano, tráennos un enorme xarrete a la mesa y lo despiecen ellí mesmu. Carne tienro y xugoso, que desfái sola, con una mueyu buenísimo



A puntu d'españar, empezamos colos postres. Tiramisú Rey Silu con Xeláu de Café. Nótase enforma'l Rey Silu, y como nos encanta, pos nos prestó'l postre. Mui ricu.


Souflé d'Ablanes con Xeláu de Canela. Inda meyor que'l primeru. Buenísimo.


Y acabamos con unes MiniCasadielles de Felechosa, que tuvimos que probar sí o sí col café. Perbones.


Pa beber, asturianu. Empezamos con 1947, la nuesa sidra de mesa favorita, de Viuda de Angelón.


Y acabamos con Monasteriu de Corias Carrasquín, la uva autóctona asturiana nun vinu monovarietal


La carta de vinos ye enorme. Tienen referencies a los meyores vinos del mundu a precios que nin podemos reproducir. Tocantes a la representación asturiana, esperábase daqué más. Y tocantes a cerveza, meyor nin falar.


Tres persones a cenar, pagamos 252€. 84€ per cabeza. Relación calidá-preciu bien bona.


La intensidá como nexu d'unión en tol menú. Gran trabayu en cocina, presentación y atención de primera una redolada escepcional. Nun duldéis n'escapavos a Pueblo Ástur. Si podéis col pack completu, y si non, al so restorán. va prestavos.


Eso sí, de día gana bien de más coles vistes.


Pd: Munches gracies a Felechosa pola so cocina y anfitrión enseñándonos l'hotel. ¡Y a Moisés y Borja por una cena memorable!


No hay comentarios

Publicar un comentario