Señes: Bañugues
Comentarios: Güei voi llevavos a faer una Farturruta per Gozón, percorriendo parte la sienda costera del Faru Peñes. Vamos visitar una antigua mina de fierro abandonada en plena sablera moldiando pa siempres el paisaxe la zona y dexando un estrañu contraste ente mar y mina na zona.
Teléfonu: 985 881 548
Calidá: 3/5
Preciu: 30€
Unos 10kms de ruta, con unes 3h y media de duración en total y unos 300m de desnivel. Facilina y pa tola familia ; y per una zona céntrica, pero desconocida pa los asturianos.
Empezamos na Sablera Bañugues, famosa y que se suel enllenar siempres, polo que si faéis la ruta en temporada alta, aconséyovos madrugar p'atopar aparcamientu.
Tien ampliu arenal, y una área recreativa enorme al llau.
Caminamos escontra’l Puertu Bañugues, pequeñu, pero con un encantu especial. Un sitiu preciosu.
Siguimos caminando escontra’l centru del pueblu Bañugues y atopamos Les Cases de la Mina. Les cases de los antiguos trabayadores de la mina de Llumeres.
Al poco, atopamos la esviadura que va llevanos al restorán onde vamos comer. Nun esviéis inda, qu'hai que ganase la fartura. Siguimos rectos.
En pasando por El Llugar, qu'entemez l'usu marineru y ganaderu,
Empezamos una xubidina.
Hasta El Monte, onde atopamos estes precioses cases de planta baxa de colores.
L'últimu tramu, casi de baxada, hasta Llumeres, ye por carretera, anque tenéis un camín pa dir de 1 en 1 pel marxe. Amás ye una carretera más frecuentada por ciclistes que por coches.
Llegamos a l’área recreativa de Llumeres. Una zona dende la que tenemos la preciosa panorámica del llugar. Mina y Mar xuníos.
La mina aportó ser a la esplotación de fierro más importante d’Asturies, y a día de güei, sigui trescalando tou, hasta l'agua, del so carauterísticu tonu acoloratáu.
Barrunten qu'empezó a esplotase en dómina romana, anque la esplotación en sí empezó a finales del sXIX pola Compañía Minera de Gozón, que darréu foi mercada por Duro Felguera.
El mineral estrayíase y tresportábase con un cable aereu que conectaba cola estación de tren El Regueral (Carreño) y que se tresportaba darréu hasta les instalaciones d'Aboño o La Felguera. A la vuelta, los mesmos calderos volvíen llenos de carbón como parte del salariu los mineros. Tamién se tresportaba por barcu con destín al Musel o L'Arena pal so posterior treslláu a países como Inglaterra o Alemaña. Inda queda en pie l'antiguu cargaderu.
La esplotación peslló en 1967, magar ser ún de los mayores xacimientos d’Asturies, por cuenta que salía muncho más baratu traelo de Brasil o Mauritania. Éses fueron les palabres qu'espunxeron los técnicos de Duro Felguera nel informe presentáu pal zarru de la mina.
Poca queda yá de les antigües instalaciones, la bocamina, les oficines, les cases d'aseos y del cable aereu, n’estao ruinosu, a pesar de ser Bien d'Interés Cultural. L'accesu a les antigües instalaciones ta vallao.
Desandamos un poco la baxada a Llumeres, pero en cuenta de volver xubir hasta l’área recreativa, esviamos per un camín a la derecha que va ganando altor. La idea ye llegar a Viodo, pero en cuenta de faelo per carretera, vamos faelo por camín, muncho más guapu.
Xubimos per una pista y, si damos la vuelta, vemos la panorámica sobre Llumeres: la so sablera y les instalaciones de la mina. Tranquilos, que volveremos pasar perhí.
L'indicador de ruta llévanos a la derecha.
Y llévanos a una baxada onde empezamos a ver los nuesos oxetivos.
A un lao, la Sablera Viodo y Arnielles.
Y a la izquierda, la Sablera La Cueva o Llavandera.
La Sablera tien un accesu col qu'hai que tener un poco de cuidao. Baxa paralelu al regueru la Cueva, que desagua na sablera. De piedra. Foi nuesa primer parada pa un bañu. Tien, amás, una pequeña cueva.
Tien una lleenda bien guapa, recoyida nel llibru Un Paséu pola Mitoloxía Asturiana d'Alberto Álvarez Peña :
Les xanes tienen apariencia de mujeres jóvenes, muy hermosas, de rubia cabellera. Acostumbran a hacer su aparición en la noche o víspera de San Xuan, peinándose con peibes de oro o tejiendo con hilos dorados y son poseedoras de grandes riquezas: bolos de oro, gallinas con su pollerada del mismo áureo material, ganada … Se dice que están encantadas y que otorgarán todos sus bienes al que la desencante. Son dadivosas con aquellos que cumplan sus preceptos, de lo contrario, mostrarán su cara más vengativa. Su origen puede estar en algunas divinidades femeninas indoeuropeas vinculadas a las fertilidad de la tierra y los ganados.En esta playa había una xana que aparecía a lavar en el arroyo y tender su blanca colada, pero cuando se acercaba la gente desaparecía. Según la tradición, el topónimo de la playa, viene de ahí.
Tres el chapuzón, volvemos xubir y baxamos a la otra sablera. La de Viodo, la primera, de sable. Y la d’Arnielles, la de más allá de piedra. Importante si siguís la nuesa ruta, faelo con marea baxa. Si non, vais tener que dar la vuelta y volver pela pista.
Nós caminamos de la sablera de Viodo a la d’Arnielles. Primero pel sable y darréu con cuidao ente les piedres.
Dende la sablera d’Arnielles yá acolumbramos los cargadores del puertu Llumeres. Ye una forma muncho más guapa (y curtia) de volver.
Dende ehí namás quedar xubir al muriu y yá tamos de vuelta en Llumeres.
Volvemos hasta l’área recreativa de Llumeres, con un bon recuestu de xubida. Y dende ellí volvemos hasta’l pueblu d'El Monte. Metímonos nel pueblu al altor de Casa Máximo.
Ellí metímonos pente les cases y fuimos dar al mirador de la Sablera Llumeres. Pue apreciase perfeutamente cómo’l fierro tiñe la mariña col so color carauterísticu.
El mirador amás tien una virxe del Carme n'homenaxe a los marineros finaos.
Dende ellí, tomamos la sienda que va llevanos de vuelta a Bañugues. En cuenta volver pel mesmu sitio que la ida, pela carretera. Ye un pequeñu rodiu, pero vais ver que paga la pena. Podéis faer esti percorríu a la ida y a la vuelta. Nós ficímoslo asina pa faer una mini ruta circular.
La idea ye bordiar la Punta la Narvata siguiendo’l cantil.
Afayando rincones maraviyosos.
Y viendo cómo, de lloñe, apaez yá Bañugues.
Al poco, atopamos col puertu Bañugues.
Nós decidimos comer nel Bar Pelaez, que nun lo conocíamos y teníamos bones referencies. Otra de les opciones que tenéis pa comer ye Mi Candelita, que presta enforma, y ta na mesma sablera Bañugues.
Bar Pelaez tien una terraza maraviyosa con vistes al mar. Dientro, amplies cristaleres, zona de barra. Y na parte de tras, un comedor.
Tuvimos tomando unes botelles de Sidra Peñón na terraza. Taben a tope pa ponese a echala. Pero tienen bastantes nunmechisques y echámosla nós mesmos.
Dientro, nel comedor, camudamos a un Agnus Dei, que nun namoró. Amás de la sidra nel esterior, nun tienen nenguna referencia asturiana nes bébores.
D’aperitivu, traxéronnos Pastel de Tiñosu.
Na carta teníen Calamares y Calamares Frescos. Pidimos los Frescos (abondo más caros). Eso sí, taben bonísimos.
Amasueles a la Marinera. Formoses. Bien bones.
Dempués de los entrantes, pidimos un platu per cabeza. Yéramos 3. 2 Pidieron Chopa a la Sidra. Bien bona. Y el mueyu, bonísima.
Y Pixín a la plancha. Bien ricu. Encantónos.
Pa los principales, camudamos al Mar de Frades. Muncho meyor que l'anterior.
De postre, Requesón con Compota de Mazana. Bien bonu.
Requesón con Nueces y Miel. Bien bonu.
Y Tarta Quesu. De les bones.
Pagamos 160,30€. A 54€ per cabeza. Gustónos. Terraza espectacular (podéis comer fuera), bon productu, tocao lo xusto y bien de preciu.
La Mina y la Mar. Nuna zona que ta al llau, pero que sigue siendo bien desconocida. Sableres con Lleenda. Mines que dexen buelga. Un cantil con rincones preciosos. Y cocina de mar mientres lu tas viendo comiendo nuna terraza. Preciosa Farturruta.
No hay comentarios
Publicar un comentario