Farturruta al Monsacru comiendo en Bar Seva

 

Señes: Baíña - Mieres

Teléfonu: 681 150 076

Calidá: 4/5

Preciu: 12€

Comentarios: Ún de los llugares más máxicos d’Asturies, llugar de procesión relixosa pa unos, de conexón esotérica pa otros, y, ensin dulda, telúricu pa toos. Un llugar qu’esparde daqué tan especial, que yá los nuesos antiguos lu nomaben Monte Sacru, ye dicir Monsacru.

Esisten 3 xubíes típiques al Monsacru, anque hai variantes con xoyes como la Cueva la Covariella o’l Güeyu del Monsacru. 2 son facilines y la tercera dende la La Collada pola Canal d’Otura ye más dura. Les dos más facilines salen de La Collada (onde podéis ver el famosu Sillón del Obispu) y dende Los Llanos, que ye dende onde salimos nós. Podéis xubir por cualesquier de les dos.

La ruta son unos 8km, idea y vuelta, hasta les capiyes, con unos 500m de desnivel. Nós, amás, xubimos al Picu La Fayona (1022m) y al Picu Monsacru o Cuitu Romiru (1055m), qu'añade un pocu más, pero merez la pena faelo. En total son unos 11kms y unos 600m de desnivel.

Dexamos el coche nel pueblu Los Llanos. Tien una pequeña plaza, que si nun madrugáis, enllénase. Y un pocu más embaxo un aparcamientu, que tamién se suel enllenar. Asina que nun empecéis tarde a faer la ruta o vais tener que dexar el coche en cualesquier llau que podáis.

El camín ta indicáu en tou momentu. Yá sabéis, too p'enriba.

Al poco yá desapaez la pista, y empezamos a ganar altor nun camín zigzagueante que forma parte del encantu místicu del llugar. Solo enfeáu poles torres d'electricidá.

Hai dalgún recuestu un pocu más duru, pero ye una xubida facilina, y faela davezu xente de toles edaes. Amás, cuando precises garrar aire, das la vuelta, ves estes vistas y repones fuerces.

Ún de los encantos d'esta ruta ye’l Texu que, de forma máxica, atopamos saliendo de la roca. L'árbol máxicu de los ástures nel monte máxicu de los ástures.

Nel intre yá llegamos a Entrepuertes. Un respiru na xubida y qu'indica que tamos cerca yá de Les Capielles.

Llaniamos un pocu y yá apaez de lloñe la Capiya de Santiago.

Y siguiendo pol Mayáu de Les Capiyes, la Capiya la Malena.

Averamos primero a la Capiya la Malena, de la Madalena.

'Si vas a la Malena,
de recuerdu traime un cardu:
a ti valte d'alivín,
a min valme de regalu'.

Onde nes fiestes, suel coyese un cardu azul (Erynginum), símbolu solar que s'emplegaba pa esconxurar bruxes, tiniebles y el mal polo xeneral. Esti cardu regalábenlu los mozos a la moza y ella poníalo na ventana o nes puertes. Un ritu asemeyáu fáese en Navarra, País Vascu, Aragón o’l Piamonte, onde’l cardu ye un símbolu solar qu'escuerre’l mal. Igual que n'Escocia, onde ye un símbolu nacional.

Data del sieglu XIII aproximao, que'l so estilu denota un románicu tardíu. Ta compuesta por una nave rectangular y ábside na so cabecera, empobinada al este, que probablemente ye lo único que queda d'una posible encomienda.

Bordiamos la capiya, y el balcón a Soto Ribera, Uviéu y Xixón ye impresionante. Ganamos un pocu d'altor pa dirixinos a los picos La Fayona y al Picu Monsacru o Cuitu Romiru.

Y pasamos de llargu la otra capiya, la de riba, la de Santiagu. A la que vamos volver más tarde.

Siguimos ganando altor y atopamos cola Forcada la Muezca. El pasu natural pol que podéis aventuravos hasta la Cueva la Covariella.

Nós siguimos ganando altor hasta’l primeru de los dos Picos que xubimos, La Fayona (1020m).

Y dende ellí, vemos el nuesu siguiente oxetivu : Picu Monsacru o Cuitu Romiru (1055m). La xubida a los dos picos ye bien facilina y pa toles edaes.

Y les vistes dende dambos, tanto a la mariña, como al restu la sierra l'Aramu como a Picos d'Europa, son impresionantes.

A éstes vese perfectamente’l Torrexón de Peñerúes, al que tamién fuimos de Farturruta.

Volvemos sobro los nuesos pasos a visitar la Capiya de Santiagu.

Capiya en forma octogonal, al estilu templariu, nel so interior queden restos de lo qu'hubo de ser una columna central, que s'interpreta como un Axis Mundi, propiu de les construcciones templaries. Ello ye qu’hai un documentu del Rei Fernando II de Llión, del 1 de Xunetu de 1.158, pol cuál cedía’l territoriu entendíu ente la meseta y el cume del Monsacru a unos flaires de Monte Sacru. Suponse del sXIII.

Supónse que la Ilesia construyóse sobro un dolmen o un túmulu funerariu, al estilu de la d’Abamia (Cangues d'Onís). Otro de los sos munchos intereses ye que tien dientro la Capiya un estrañu altar buecu que cubre un pocu, de poca fondura, llamáu "Pozu de Santu Toribio". Ello ye que la cristianización de símbolos paganos asturianos, acabó utilizando a Santu Toribio como "patrón" de los dólmenes. El pozu anguaño nun tien agua, pero d'antiguo estrayíase agua porque yera "milagrosa". La parte posterior de la Ilesia ta escavada sobro la mesma roca, lo que llamen Cueva del Ermitañu.

Y yá pa rematar, la hestoria diznos que l'Arca Santa y otres reliquies veníes de Xerusalem, tuvieron escondíes unos 100 años na mesma Cueva del Ermitañu, allá pol 711, fuxendo de la invasión musulmana. Darréu, diches reliquies fueron treslladaes pol Rei Alfonso II a la Cámara Santa de la Catedral d'Uviéu.

Volvemos sobro los nuesos pasos al camín zigzagueante de baxada de vuelta hasta’l coche. 

Pa comer, fuimos al Bar Seva, en Baiña, yá perteneciente a Mieres, pero a tan solo 10kms de Los Llanos. Chigre-tienda , con bona terraza n'un pueblín bien guapu.

Más de 100 años d'antigüedá. Según entres, zona de barra y un par de meses. A la izquierda, salón con chimenea. Y pasando por un pasiellu, otru comedor, qu'amás, ye salón de baille. Atención especial a la fabada y los callos. Cuando llaméis p’acutar, encargalos. Nós pidimos el menú qu'había esi día.

Sopa de Mariscu. Picantina, allegre, cargadina.

Prestónos muncho.

De segundos, Manes de Gochu Estofaes. Bonísimes. Y yá veis, una ración enorme.

Y Entrecot de Xata, con pataques frites y güevu. Maraviyosu.

De postre, Mousse de Llimón. Bien bonu.

Y Tarta de Mazana Casera. Impresionante.

Con vinu perroneru, casera y agua. Clin incluyíu. Pagamos -ATENCIÓN-, 12€ per cabeza.

Farturruta por un llugar máxicu, yá dende los nuesos antiguos ástures, guardian de les reliquies veníes de Tierra Santa, posible enclave templariu, qu'entemez lo pagano y lo cristiano y que, independientemente de lo que creas, tien unes vistes increíbles sobro la mariña y sobro Picos d'Europa.